VOV4.Mnông- Tâm 2 nar bâh 14/1 tât 16/1, ta nkuăl ƀon têh Buôn Ma Thuột, Đoàn n’gor Dak Lak tâm rgop đah Công ty PNJ ntŭk kan ta Tây Nguyên-Nam Trung Bộ n’hanh Hội doanh nhân mom ƀư ntŭk tăch ndơ jê̆ mô sŏk prăk gay ma kơl ndơ dŏng an ƀon lan geh nău jêr jŏt yor geh nău khuch tât bâh nuh srê Covid-19 di rơh tết Nguyên đán Nhâm Dần.

Ta ntŭk tăch ndơ geh rlău 40 ntil ndơ geh sik, phe, tăp, ngi, dak măm, hạt nêm, bột ngọt, banh, kẹo, dak njŭnh n’hanh du đê̆ ntil ndơ dŏng êng. Ăp ntil ndơ lĕ geh nchih lĭr rnoh khlăy na nê̆, nuĭh ƀon lan dŏng “N’ha đaih rvăt ndơ tâm rŏng gay ma rvăt ăp ndơ nơm ŭch geh. Rlău ma n’ha đaih rvăt ndơ, nuĭh ƀon lan tât ntŭk tăch rvăt ndơ hôm nha geh tât râng ăp nău kan tết way ơm, dăn nău ƀŭn lap bôk năp, dăn nău nchih che đồ n’hanh dơn geh âk ndơ lì xì. Ăp đoàn viên mom ndăm bâh ntŭk kan đoàn n’gor n’hanh ntŭk ntuh kơl hôm nha geh ƀư rnoh kơl an rlău 200 nklâm banh chưng ntêm an nuĭh jêr jŏt, mô geh ntŭk gŭ ta nkuăl ƀon têh Buôn Ma Thuột.

Nuĭh rblang: Thị Đoắt