VOV4.M’nông – Đoàn khối Ăp ngih pah kan n’hanh Doanh nghiệp n’gor Dak Nông mhe ƀư jao an ndơ druh ndăm ƀư “Mpoh ang trong ƀon tơm” an nuĭh ƀon lan n’hanh n’gâng kan xă Trường Xuân (nkuăl Dak Song).

Mpôl druh ndăm an ndơ ƀư mpoh ang trong ƀon tơm ta Trường Xuân.

Ndơ ƀư geh 40 bóng ŭnh măt nar, mpoh ang 2 trong ta ƀon Njang Bơ n’hanh ƀon Ding Plei (xă Trường Xuân) đah dĭng lĕ jong rlău 2km. Ndơ ƀư geh dĭng lĕ 60 rkeh prăk yor đoàn viên, druh ndăm ăp ngih pah kan, doanh nghiệp tâm n’gor rgop, kơl; druh ndăm nău kan điện Dak Nông ƀư.

Druh ndăm nău kan điện ƀư nglăp bóng ŭnh điện mpoh ang

Ăp trong hăn tâm 2 ƀon dơi mpoh ang mbra rgop mât đăp mpăn rnă njrăng ta ăp ƀon lan, nta an uĕh kônh wa hăn nsong. Ndơ ƀư “Mpoh ang trong ƀon tơm” mpơl đŏng nuih n’hâm hăn lor, kơl êng yor nău rêh ntŭk gŭ rêh bah druh ndăm Dak Nông gay ndrel ty ndâk njêng ƀon lan mhe.

Nŭih blang: Y Sưng Phê Ja