VOV4.M’nông: N’gâng kan dak si kơp dơn, tât rnôk aơ srê hŏ geh nkân njrăng dơi oi tâm lam dak. Yơn lah, rnoh nŭih ntưp tâm ƀon lan ri lơn ma âk yor geh âk nau kan plơ̆ ƀư tay. Đah ăp nŭih ntưp srê Covid-19, n’gâng kan tâm nkuăl ndrel rmôt nai dak si ân geh ôp khâl, mêt uănh ân rjăp nau tât bah nŭih ji kŏ kơt lah nau nchuăn leo ndơ ngêt sa, ndơ dŏng...đăp mpăn nŭih ntưp srê Covid-19 geh kơl an, săm.

Mhe aơ, Ngih dak si Đa khoa nkuăl ƀon têh Cần Thơ hŏ ƀư ndơn 45 tấn o-xy tă bah ăp nŭih bu kơl an ân nau săm ji srê Covid-19 jâk. Tâm nar ndơn, nai dak si Chuyên khoa II Trần Quốc Luận, Giám đốc Ngih dak si Đa khoa nkuăl ƀon têh Cần Thơ ntoh, nau nsum ty kơl an bah ăp ntŭk kan, rmôt kan, nŭih geh n’hâm lŏng lah nau ueh khlay ngăn đah ăp nŭih ntưp srê Covid-19 đăp mpăn gŭ săm:

‘Đah rnoh O-xy geh pă, gâp ân lah rnôk aơ geh dŭt n’hâm khlay ngăn, ngăn lah đah rlau 300 nŭih ntưp ma srê Covid-19 tầng 2 dôl khuch ndrel tầng 3 dôl săm tâm aơ. Phung hên mra nsôih dŏng rnoh O-xy aơ ân săk tam ngăn, têm nkrem ngăn ân nŭih ntưp ma srê Covid-19”.

Rnôk aơ, ăp n’gor, nkuăl ƀon têh ndâk ăp ngih dak si tâm ăp xã, phường, nkuăl têh gay ma kơl an, mât chăm săm nŭih F0 tâm ngih. Hăn nsum đah ntrong kan dak si, Thành đoàn ăp nkuăl hŏ rgum ăp ndơ kơl an nŭih ntưp srê Covid-19 săm tâm ngih. Nô Dương Hiệp Hưng, Bí thư Thành Đoàn Quy Nhơn, n’gor Bình Định, ngơi:

“Phung hên mbơh ntŭk gay ma kuăl mbơh gay ma F0 moh geh nau ŭch ri mâp ma ngih dak si kŏ kơt lah Đoàn druh ndăm gay ma kơl an. Rnôk aơ, phung hên hŏ leo 126 nŭih hăn kơl an gay ma kơl an ân ăp nkuăl joi ƀoi tĭng trong hăn, tét nkân njrăng”.

Êp nê, gay ma n’huch ngăn nŭih ntưp ji jâk jru ri nau tơm lah đăp mpăn nŭih ji geh dŏng dak si bah ơm, bah ngai, nkre n’hao nau blau bah ngih dak si, mro nchrăp ndơ dŏng, nŭih kan, dak si săm, ô xy...đăp mpăn ndơ ngêt sa ndrel mât chăm, bonh đă nuih n’hâm ân nŭih ji, rgop ma ăp ntil dak si Đông y ndrel Tây y tâm nau săm.

Tĭng n’gâng kan dak si, rnôk aơ, tâm rnoh rlau 200 rbăn nŭih ntưp ma srê Covid-19 dôl uănh săm tâm dak nơm, geh rlau 100 rbăn nŭih F0 dôl ma uănh, săm êng tâm ngih, geh tât 47%, bơi tât 15 rbăn nŭih geh uănh săm tâm ăp ngih nkah rgum nsum, geh 7%; Rnoh hôm e bơi tât 100 rbăn nŭih dôl săm tâm ăp ngih dak si. Rơh êp ăp, rnoh nŭih khĭt yor srê Covid-19 hôm âk tâm nkuăl ƀon têh Hồ Chí Minh ndrel mra hao tay tâm Bình Dương, Đồng Nai, mô lah ta Thủ đô Hà Nội.

Gay mât đăp mpăn ân ăp nŭih ntưp srê Covid-19 geh săm, n’gâng kan dak si hŏ đăp mpăn nau pă dak si njrăng srê, ngăn lah đah 46 dak si geh nau ntrŭnh mrô 2626 bah N’gâng kan dak si. Tĭng groi Thủ tướng Vũ Đức Đam, tâm nau nchrăp, N’gâng kan dak si mra rvăt 400 rbăn dĭng Mol-nu-pi-ra-vir, yơn tât rnôk aơ knŭng geh 250 rbăn dĭng. Yơn lah, hôm geh dak si njrăng rdâng kman lah Fa-vi-pi-ra-vir, rnôk aơ hôm 2 rkeh găr. Ăp nê mra geh leo lăp dŏng, săm ân nŭih ntưp srê Covid-19. Groi Thủ tướng Vũ Đức Đam, đă:

‘Fa-vi-pi-ra-vir pă nkre hôm 2 rkeh grăp ân ăp nkuăl, ntă nŭih ntưp srê lah pă nkre. Dăch tât mra geh dak si phai-dơ ndrel du ngih máy dôl ma nchrăp nkra dak si Mol-nu-pi-ra-vir tâm dak nơm. Rnôk aơ nsôih ƀư jêh nau săm tâm ngih. Ŭch n’huch rnoh nŭih khĭt, ân geh nau mêt uănh tă bah ngih dak si tât nŭih ji. Đah 2 tăp, tăp bôk năp lah khám tă bah ngai, mô ân geh nŭih mô geh khám tă bah ngai, tăp tal 2 lah tâm ngih dak si ngăn”.

Groi Thủ tướng Vũ Đức Đam kŏ đă, N’gâng kan dak si đăp mpăn dak si săm, mô ân mô tŏng dak si, rđau, đă, ntĭm mbơh ân ăp nkuăl, ăp ngih dak si nchrăp rvăt dak si săm, ndơn nau mêt uănh, mât rnoh ueh tam dak si geh lăp dŏng, rgum rvăt dak si săm ngăn, pă, ntop kơl an năn dak si ân ăp nkuăl, đah ăp ntil dak si geh nau tam, ân geh rnoh têm ân tâm di ma ăp nau tât ndak mô ueh...Nkre ntĭm mbơh, pơk trong nơih ân ăp ntŭk kan, rmôt kan ndal rvăt, nkra dak si săm srê Covid-19, ntrŭt dăng nau rlong, jao nau kan, ê nkra vắc xin, dak si săm srê Covid-19 tâm dak ân nchrăp nau pă ndrel têm tơm prăk./.

Nŭih rblang: H’Thi