VOV4.M'nông: Ăp năm rlău aơ, nơm geh tơm prăk manh bah trong an manh dơh, rlău 225.000 tơ̆ rnăk ach o, rnăk dăch kêng ach o n'hanh ăp nuĭh dơi kơl ta n'gor Gia Lai geh ndơ ma nsan hao tâm nău rêh, rlău dơi ach o n'hanh klaih ach o jŏ jong. Tơm prăk an manh dơh hŏ jêng jâng nsing ndăl nuih n'hâm kơl nuĭh ach o đăp mpăn nău rêh.

          Rnăk nô Rơ Châm Tích, lah ngoăy tâm ăp rnăk ta ƀon Lung Prông, xã Ia Kriêng, nkuâl Đức Cơ hŏ rgâl "geh" lôch geh suan ntop bah tơm prăk an manh thuk dơh. Ntơm bah nău rêh dŭt jêr jŏt, nhih jay nkưp nde, rnăk hŏ klaih rlău ach o, nkra nhih jay têh uĕh. Nô Rơ Châm Tích, nkoch mpeh nău tam dŏng tơm prăk manh he hŏ manh dơi:

      “Ntơm bah rnôk dơn tơm prăk manh bah ngân hàng chính sách, rnăk gâp hŏ  geh ndơ ma nkơng dŭt âk tâm nău kan, hun hao nău mât chăm điều, cà phê. Rnôk mô hŏ dơi tât đah tơm prăk manh ri hôm âk jêr jŏt ngăn, tâm năm 2017 he tăm cà phê, lôch nê he tăm điều, nsĭt geh wăng sa đăp mpăn”

        Yuh Kpă H’nen gŭ ta tổ 9, thị trấn Phú Thiện geh sai đah 5 sào lŏ me bơ̆ an ƀư tơm prăk. Yor rnoh lŏ mô geh hvi, bol ur sai dŭt jăp gơih mô gŭ rlu đah nău kan yơn mô hŏ rlău dơi nchuăt joi tĭng mbâr sa ăp nar. Nơm geh ndơ kơl bah oh nô, ƀon lan, n'gâng kan ta ntŭk, tơm prăk manh 30 rkeh prăk bah Ngân hàng Chính sách Xã hội nkuâl, yuh hŏ rvăt tay neh mir, tăm bum blang. Yuh Kpă H’nen an gĭt, tât aƀaơ rnăk hŏ trok dơi rnon têh, nău rêh hŏ đăp mpăn lơn đŏng.

        “Ntơm nơh rnăk bah Nen dŭt jêr jŏt, rnôk gâp dơi manh geh tơm prăk bah ngih dak saơ nău rêh bah gâp aƀaơ mbơm oi ngăn rđĭl đah ntơm nơh".

        Tĭng Ngân hàng Chính sách Xã hội n'gor Gia Lai, đơn vị hŏ an ƀư geh 17 bôk nău kan n'gluh an manh têh đah rnoh âk n'gluh an manh rlău 16.800 rmen prăk, rnoh âk an manh khay 9 năm aơ bơi 5.800 rmen prăk, đah nklăp 400 rbăn tơ̆ rnăk manh tơm prăk gay ntuh kơl hun hao tuch tăm, rgop tĭng ƀư geh nău dơi ngăn ngăn bôk nău kan gưl neh dak mpeh n'hŭch ach o, rdâk njêng ƀon lan mhe ta ntŭk. Wa Lê Văn Trí, Giám đốc Chi nhánh Ngân hàng Chính sách Xã hội n'gor Gia Lai an gĭt, tâm let năp tay, đơn vị đăp mpăn 100% nuĭh ach o n'hanh ăp nuĭh dơi kơl dơi tât đah tơm prăk an manh dơh bah ngih dak, nkre đah ăp trong rƀŏng bah n'gor mpeh rgâl dăp rgum wăng sa n'hanh rdâk njêng ƀon lan mhe.

       “Tâm 20 năm an ƀư Nghị định 78 hŏ năl dơi trong ntĭt leo ƀư n'hanh trong rƀŏng mât tơm prăk geh nău tam. Ngân hàng chính sách xã hội n'gor Gia Lai mbra kan nsum đah ăp n'gâng kan, ăp mpôl kan chính trị xã hội gay nsĭt tơm prăk manh tât di nuĭh dơi kơl, rgum ăp rêng kan mât dŏng tơm prăk manh, nkoch trêng rnăk manh tơm prăk gay hun hao tuch tăm mât rong, rƀŏng trong an rnăk manh dŏng tơm prăk di nău kan gay rgop kơl an nuĭh ach o n'hanh ăp nuĭh dơi kơl êng ƀa ƀă hun hao tuch tăm mât rong, đăp mpăn nău rêh n'hanh nsan hao klaih rlău ach o nâp jong”

       Aƀaơ, Gia Lai geh 91 xã di  rnoh rdâk njêng ƀon lan mhe, yơn lah rlău 46% rnoh nuĭh ƀon lan lah nuĭh rnoi mpôl đê̆, nău  rêh, wăng sa hôm mâp âk jêr jŏt. Đah nău ngăn geh nê, tơm prăk an manh dơh dôl hôm lah jâng nsing ndăl geh nău tam đŏng, kơl ăp thôn ƀon geh tay tơm suan an nău kan ƀư njêng tuch tăm mât rong. Ăp mpôl kan hội, nsum mpôl dơn nsing nơm, mô dơn nsĭt tơm prăk tât di nuĭh, ma hôm kơl an nuĭh ƀon lan gĭt trong ƀư, tâm pă tâm kơl nsum nsan hao./.

Nuĭh rblang: Điểu Thân