Đah nău nsrôih âk n’hanh nuih n’hâm "mô an geh du hê ndul êng bah kơi”, n’gor Gia Lai dôl rgum âk tơm ndơ gay ntlơi jăng jay truh sat, nkưp nde. Hang rbăn mblâm jay nâp uĕh mbrơi rgâl ăp mblâm jay truh sat, dôl jêng chor jay n’hŭt răm an ăp rnăk ach o, rnăk dơi kơl, nuĭh geh n’hâm suan. Nău lăp kan dăng bah lam trong kan chính trị mô dơn rgop kơl rgâl geh nău rêh ma hôm ƀư  an nuĭh n’hâm ăp rnăk wâl rhơn nđơn nsan hao.

Đah mông nar pah kan ndăn ngăch bah ăp nuĭh rdâk ƀư, jay mhe nô Ksor Si (39 deh, ƀon Mái, xã Ia Hrung, nkuâl Ia Grai) mbrơi mpơl jêng. Jay hvi bơi 50m2 đah bar jrô bĭch, du jrô wơt năch. Nô Ksor Si an gĭt, rnăk dŭt mpŏng kâp nar jay dơi ƀư lôch jêh sa nkra, gay rnăk wâl geh ntŭk gŭ rêh đăp mpăn, soih hvi, oh kon geh ntŭk gŭ nti.

"Jay ơm ri truh sat, rmŭ ôm, rgoh n’gơ lĕ hôm. aƀaơ jay mhe nâp uĕh, oh kon geh ntŭk gŭ nti ren. Gâp lah uĕh Đảng, Ngih dak he hŏ nsrôih kơl rnăk geh ntŭk gŭ đăp mpăn. Jêh aơ tay geh ndơ, gâp mon tay jay ŭnh n’hanh jay ŭm."

Ta nkuâl Ia Grai, 542 rnăk ach o, rnăk dơi kơl, nuĭh geh n’hâm suan dôl ntop kơl ntlơi jăng jay truh sat, nkưp nde. Kơp tât khay 2/2025, lam n’gor Gia Lai hŏ ntơm rdâk ƀư mon mhe n’hanh nkra tay 1.423 mblâm jay, tâm nê 132 mblâm jay hŏ ƀư lôch jêh. Ăp mblâm jay dja kơl an ăp rnăk dơi kơl, nuĭh geh n’hâm suan, rnăk ach o n’hanh dăch kêng ach o, rgop rgâl geh ntŭk gŭ rêh an âk nuĭh ƀon lan jêr jŏt. Gay đăp mpăn rnoh ngăch, rlău ma tơm prăk dơi tâm pă, ăp nkuâl rgum tay nar rgop luh kơl bah ƀon  lan, mpôl tahen, rgŏ jă ăp tơm ndơ kơl lam rêh jêng kon nuĭh gay mon mhe n’hanh nkra tay jay gŭ, lơn lah ăp rnăk mpeh bar bôk nău kan gưl neh dak.

N’gor hŏ dơn geh ndơ ntop kơl âk bah ăp mpôl, ăp doanh nghiệp n’hanh nhih pah kan Trung ương. Bộ Công an hŏ ndơ̆ kơl 231 rmen prăk ntop kơl  bôk nău kan, tâm nê 201,301 rmen prăk hŏ njuăl tâm tài khoản Prăk nkrem "Yor an nuĭh ach o" bah n’gor. Rlău ma nê, du đêt doanh nghiệp geh trong nchrăp ntuh kơl ta n’gor kơl trong leo ƀư đah lĕ rngôch rnoh prăk bơi 20 rmen prăk đŏng. Wa Lê Ngọc Quý – Kruanh UBND nkuâl Ia Grai an gĭt:

“Đah nău nsrôih chính trị, rlău ma rnoh ntop kơl 60 rkeh  prăk gay mon mhe n’hanh 30 rkeh prăk gay nkra tay, mpôl hên rgum, rgŏ jă kônh wa ƀon lan kơl, nuĭh tơm rnăk, rnoi deh keh na, rgop, ndăn nar luh kan bah ăp mpôl; n’hanh ăp trong leo, ndơ dŏng, lŭ loih gay n’hao rnoh hvi jay, ƀư tay jay rhŏ dŏng an nău  kan tuch tăm, mât rong, n’hao geh nău rêh an rnăk ƀon lan”.

Tâm bôk nău kan ntlơi jăng jay truh sat n’gor Gia Lai, mpôl công an n’hanh tahen lah nuĭh kan n’gâng tơm. Mô dơn kơl nchuăn rdeng lŭ loih, kuĭh lâng neh, rdâk rpaih jay, ma hôm kơl râng rdâk njêng, ntưm chor, ntrôl ngăch ƀư lôch jêh ăp mblâm jay đŏng. Du đêt cán bộ công an hôm rgop lĕ ma prăk khay bah he kơl rnăk ach o mon ƀư jay mhe đŏng. Tâm rnoh dja, thiếu tá Lê Đình Hải – Kruanh Công an xã Ia Mrơn, nkuâl Ia Pa hŏ rgop 60 rkeh prăk. Kơt tĭng nô, cán bộ, tahen Công an xã nsum ti rgop kơl tay 60 rkeh prăk n’hanh ndăn bah dih mông gay kơl kônh wa rdâk jay. Thiếu tá Lê Đình Hải an gĭt:

“Lôch ra uănh, u gŭ đah 1 hê său, n’hanh 2 hê se, gâp saơ nău rêh bah u jêr jŏt, gâp hŏ nsŏng kơl an Đảng uỷ, UBND xã gay ntop kơl tơm prăk gay rdâk njêng. Yơn mpeh săk rdâk njêng lah che (I sai u) yơn hŏ khĭt, ri jêr geh dơn ndơ kơl. Yor kơt nê̆, gâp hŏ sĭt nchră n’hanh tâm ban ŭch đah ur n’hanh kônh wa ŭch kơl ƀư jay mhe an u têh uĕh, n’hŭt răm lơn gay đăp mpăn nău rêh".

Tĭng trong nchrăp, n’gor Gia Lai ntlơi jăng 8.485 mblâm jay tâm năm 2025 tâm bôk nău kan “Nsum ti ntlơi jăng jay truh sat, nkưp nde". Nơm geh n’grŏ tĭng bah lam trong kan chính trị, tâm bar pe khay mhe aơ, âk mblâm jay “5 dâk bôk năp" – dŭt ngăch, dŭt uĕh, dŭt nâp, n’hanh dŭt thuk- hŏ dơi ƀư lôch jêh, nsĭt tay nău rhơn an rhiăng rnăk ƀon lan. Wa Rah Lan Chung – Groi Bí thư Tỉnh ủy, Kruanh UBND n’gor Gia Lai đă:

"Pah kan ntlơi jăng jay truh sat, nkưp nde ân ƀư mbơh kloh, geh nău tâm ban, nâp  uĕh n’hanh geh nău dơi tam ngăn; rgum ăp tơm ndơ bah ăp nhih pah kan, đơn vị, doanh nghiệp, mpôl kan, ăp nuĭh, nsum mpôl ƀon lan tâm n’hanh bah dih n’gor. Nkre rgŏ jă ƀon lan rgop gay n’hao nâp uĕh jay gŭ an rnăk ƀon lan. Bah meng nê, ân way ntrŭt ntrôl, uănh năl groi nđôi, rhuăt luh nău tă ơm gĭt kan, nkhôm rnê n’hanh mpư rnê ăp mpôl, ăp nuĭh geh nău dơi ngăch prăl tâm nău an ƀư trong leo kơl."

Đah nău nsum ti bah lam trong kan chính trị n’hanh mpôl tahen, bôk nău kan ntlơi jăng jay truh sat, nkưp nde ta Gia Lai dôl dơi ntrôl ngăch ƀư. Ăp mblâm jay nâp djhư̆n mô dơn kơl đăp mpăn nău rêh ma hôm njêng jâng nsing nâp gay ăp rnăk ach o nsan hao, hun hao wăng sa, rgop rdâk njêng n’gor nkuâl nar lơn ma têh ndrŏng uĕh.