VOV4.M’nông:   Tĭng di ach o âk trong, aƀaơ n’gor Gia Lai hôm e 12,09% rnăk ach o. Tâm nĕ dŭt âk rnăk ach o lah nuĭh rnoi mpôl đêt. Ăp ntŭk tâm n’gor lĕ n’hanh dôl ƀư âk trong mkra nău kan rêh jêng, ntop kơl nău kan, rgâl nău mĭn, trong ƀư, gay kơl kônh wa hao rklaih ach o nâp nâl.

Ôi ơm pŭt m’ot hăn kor ntăk cao su an công ty, jêh nĕ hăn tâm mir cà phê, kêng măng sĭt tât jay lŏ mât chiăp ndrôk êp deh, yơn yuh Rơ Lan Iêk (ta ƀon Krêl, xă Ia Krêl, Đức Cơ) lŏ dŭt ŭch đah nău ŏk r’ah. Yuh nkoch, sai roh ơm, du hê yuh mât 3 hê kon dôl năm sa, năm nti. Bah năp đaơ, 4 hê me kon way mô tŏng sa yor nău kan manh bu bah yuh rnôk geh rnôk mô, mir cà phê ranh. Năm 2018, yuh Iêk manh 50 rkeh prăk bah ngân hàng chính sách xã hội gay tăm tay cà phê. Năm bah kơi, yuh dơi du công ty cao su gŭ ta xă dơn lăp ƀư công nhân, jêh nĕ dơi ntop kơl ƀư jay gŭ. Bôl rnoh prăk khay mô hŏ âk, yơn yuh lĕ geh prăk đăp mpăn, dơi rwăt ndrôk me. Yuh Iêk rhơn an gĭt, năm e, rnăk yuh lĕ rklaih ach o:

“Đah công ty ntop kơl an oh 70 rkeh prăk ƀư jay bah 2020. Mât kon hăn nti, gâp nsrôih ƀư phung pah kan, hăn kor rtăk cao su mro”.

Âk rnăk rnoi đêt lĕ manh prăk mât rong, nta nău geh đăp mpăn rklaih ach o

Rnăk yuh Iêk lah ngoăy tâm 53 rnăk ta xă Ia Krêl, Đức Cơ mhe rklaih ach o tâm năm 2021. Năm bah năp, gay ntop kơl ăp rnăk hao rklaih ach o, ăp nău kan dơi kan ƀon lan ƀư âk jrô ntiăr nti kỹ thuật n’hanh mbơh ƀư du đêt ntrong kan tăm cà phê, n’hao uĕh mir tơm tăm. Ngân hàng chính sách xã hội nkuăl sĭt tât xă ndơ̆ jao prăk gay nuĭh ƀon lan dơh gĭt tơm prăk kơl an. N’gâng kan tâm rgop đah nuĭh ƀon lan nsing nơm tâm ntŭk gŭ rêh kônh wa mô tăch neh, n’hao dơi rklaih ach o. Wa Rơ Mah Quách, Groi Bí thư Chi bộ, Kruanh thôn ƀon Krêl, xă Ia Krêl, an gĭt:

“Jêr jŏt ngăn lah aƀaơ neh ntu nar lơ jêt, rnăk wâl oh kon nar lơ âk. Rnoh neh đêt, ri nău geh đêt. Nar aƀaơ hin, kon se druh ndăm an hăn nti âk, gay rklaih ach o. Nti lĕ jrô 9, jrô 12 ri dơi ƀư ăp công ty, geh nti, geh bằng cấp ri mư dơi hăn kan”.

Xă Ia Krêl, nkuăl Đức Cơ geh rlău 2.100 rnăk, ta 10 thôn, ƀon. Tâm nĕ, 35 rnoh nuĭh lah nuĭh rnoi mpôl đêt. Aƀaơ rnoh rnăk ach o bah xă hôm e 13,4%. Wa Nguyễn Thị Thúy Loan, Kruanh UBND xă Ia Krêl, an gĭt, năm 2022, ntŭk ŭch geh hŭch 2,2% rnăk ach o, tâm ban 47 rnăk:

 “N’hao trong kan nkoch trêng gay rgâl nău mĭn, trong ƀư tâm ƀon lan gay khoa học lơn, janh kơt dŏng khoa học kỹ thuật công nghệ an mât rong n’hanh tuch tăm. Tal 2 đah rnăk ach o, rnoh rnăk nkra njêng mô geh ri mbra nta nău kan. Ăp công ty tât nkoch mbơh nău kan; nta ăp nău nơih ngăn an ăp rnăk ach o, lơn lah 47 rnăk ach o tâm trong nchrăp rklaih ach o năm 2022 dơi gĭt”.

Rnăk ach o ta nkuăl Đức Cơ dơi nta an nău kan jan sa

Tĭng di ach o âk trong, aƀaơ n’gor Gia Lai hôm e 12,09% rnăk ach o. Tâm nĕ geh tât 88% rnoh rnăk lah nuĭh rnoi mpôl đêt. Ƀư tĭng Bôk nău kan rƀŏng tĭng lam dak mpeh n’hŭch ach o nâp nâl, bah 2016 tât 2021, n’gor Gia Lai lĕ ntuh kơl rlău 1.270% prăk, mbơh ƀư ăp nău kan ntop kơl rnăk ach o nti nău kan, rgâl tơm tăm, mpa rong... Tĭng trong nchrăp mrô 313/KH-UBND mhe dơi UBND n’gor Gia Lai an dŭt khay 2 mhe rlău, năm aơ n’gor nsrôih n’hŭch ach o 2% rnoh rnăk ach o lam n’gor, 3% rnăk ach o nuĭh rnoi mpôl đêt. Wa Phạm Trần Anh-Groi Kruanh N’gâng kan Lao động-Thương binh n’hanh Xã hội n’gor Gia Lai an gĭt, n’gâng kan mbra hăn ndrel đah ăp ntŭk gay jêh nău rƀŏng n’hŭch ach o năm 2022 bah n’gor:

“Nău kan lao động, thương binh mbra tâm ôp tâm nchră an n’gâng kan ƀon lan, gưl ủy bah ndâk njêng ăp trong mkra na nê̆, ntop kơl rnăk ach o rklaih ach o. Nkre dŏng săk rnglăy tơm prăk bah trung ương; nsrôih tâm rgop đah ăp mặt trận, nsum mpôl, chính trị, rêh jêng ăp gưl gay rgŏ jă ăp nuĭh bah doanh nghiệp, bah ntŭk gŭ rêh, kon nuĭh gay ntuh kơl an nuĭh ach o hun hao nkra njêng”.

                              Nuĭh rblang: Y Sưng Phê Ja