VOV4.M’nông: Kêng măng 9/9, UBND n’gor Gia Lai ƀư rƀŭn lôch 20 năm ƀư nau ân manh prăk đah ăp rnăk ach o ndrel ăp nŭih geh kơl an êng tĭng nau ntrŭnh mrô 78 bah Chính phủ. Ƀư tĭng nau ntrŭnh 78 bah Chính phủ, 20 năm rlau aơ, ntrong kan Ngân hàng chính sách hŏ hăn tât 100% thôn, ƀon, tổ dân phố tâm n’gor Gia Lai, đah 220 ntŭk ân manh, rlau 3.300 ntŭk têm nkrem ndrel ân manh prăk, rgop nau kơl an ân rlau 225 rbăn rnăk ach o, rnăk êp ach o rklaih luh ach o nâp nâl.

Hŏ geh rlau 783.500 nŭih geh dơi manh tơm prăk gay ma hun hao văng sa, 63 rbăn kon se nti, sinh viên geh nau rêh jêr jŏt geh manh prăk gay ntĭm nti, kơl an ndâk 14 rbăn ngih ân rnăk ach o, ndâk 212 rbăn ntŭk dak kloh ndrel ntŭk ngih ăch chrach răk kloh ƀon lan. Lvang năm 2021-2025, n’gor Gia Lai đă ăp rmôt geh tât lŏ ntrŭnh ƀư ân tam nau ân manh prăk ndrel đah ăp ntrong rƀŏng bah nkuăl mpeh nau ntrơn rgâl văng sa, ndâk njêng ƀon lan mhe./.

Nŭih rblang: H’Thi