VOV4.M'nông: Nar 19/8, HĐND n'gor Dak Lak khóa X, năm kan 2021-2026 ƀư Rơh hop way nkô̆ tâl prăm gay mĭn uănh, n'glêh an âk trong nchrăp kan têh. Ta rơh hop ăp nuĭh hŏ mĭn uănh, an dŏng 12 nghị quyết khlay, tâm nê geh 7 nghị quyết geh tât 3 bôk nău kan gưl neh dak mpeh rnoh tât hun hao wăng sa, rêh jêng kon nuĭh nkual rnoi mpôl đê̆ n'hanh mpeh yôk yang, bôk nău kan jut jăng ach o jŏ jong, rdâk njêng ƀon lan mhe lvang năm 2021-2025. 

Na nê̆, nghị quyết mpeh hun hao wăng sa rêh jêng kon nuĭh  nkual rnoi mpôl đê̆ n'hanh mpeh yôk yang năm 2022, n'gor mbra n'hŭch 3,5% rnoh rnăk ach o. Lĕ rngôch rnoh prăk an ƀư nău kan dja lah 443 rmen prăk. Nghị quyết tĭng ƀư rnoh tât kan gưl neh dak mpeh rdâk njêng ƀon lan mhe, tât năm 2025, Dak Lak nsrôih geh 4 đơn vị gưl nkuâl, 100 xã di rnoh rdâk njêng ƀon lan mhe. Gay tât rnoh kan bah lơ nê, Hội đồng nhân dân n'gor Dak Lak tâm ban ŭch trong nchrăp tơm prăk ntuh kơl hun hao tơm prăk ngân sách Ngih dak 5 năm 2021-2025 lah 1.557 rmen prăk, tâm nê tơm prăk ngân sách Trung ương lah 657 rmen prăk, tơm prăk ngân sách n'gor lah 900 rmen prăk./.

Nuĭh rblang: Điểu Thân