VOV4.M’nông: Pơh rlau aơ, ta rơh rƀŭn tal puăn, HĐND n’gor Dak Lak gưl X, ăp ntoh măt hŏ rgum tâm nchră âk nkô̆ nau khlay geh tât ăp nau kan ƀư nkô̆ nau, nau kan hun hao văng sa, rêh jêng, đăp mpăn neh dak-rnă njrăng 6 khay dŭt năm, ăp nau kan geh tât nau rêh bah ƀon lan.

            Nau mbơh ta rơh rƀŭn, 6 khay bôk năm, bol ma geh nau khuch srê Covid-19, yơn nau văng sa Dak Lak hôm geh nau ueh, rnôk nau geh hao 7,37%, nau sŏk soay ngih dak geh 4.860 rmen, hao bơi tât 4% rđil đah rơh aơ năm e, rnoh tăch luh geh 845 rkeh đôla Mỹ, hao rlau 61%. Ăp nau kan pala n’aih, tăch rgâl, ê nkra geh ueh. Yơn lah, nau pă tơm prăk ntuh kơl dêh, knŭng geh 20%, pă kan pah ê geh kơt nau nchrăp, rnoh chuh vắc xin Covid-19 ngai 3 ndrel 4 lam ƀon lan hôm dêh, ăp nau kan bah neh dak hôm mbrơi...

            Bah nau tâm nchră, ăp ntoh măt tâm ban đah nau mbơh nau tă geh ƀư 6 khay bôk năm, nkre đă du đê̆ nau rgop gay ma ƀư nau kan 6 khay dŭt năm, kơt: Ntrŭt dăng nau rgâl mhe hành chính ndrel rgum ntuh kơl, hun hao gung trong ueh mhe...Mpeh nau tuch tăm, geh tât sầu riêng Việt Nam geh tăch tât Trung Quốc ntơm lơ 11/7/2022, wa Trần Hồng Tiến, Bí thư nkuăl uỷ Krông Pách ân lah: aơ lah nau nkhêp ndrel nau ntul rlong ndŏ luh đah nau kan tuch tăm bah n’gor tâm rơh tât:

            ‘Phung hên ŭch UBND n’gor ndrel ăp ntŭk kan ngăn lah nau kan tuch tăm geh ăp ntrong kan, ăp nau nchrăp kơl an ân ƀon lan. Cử tri tâm n’gor uănh ngăn tât nau kan yor rnôk aơ nơm geh nklăp 12 rbăn ha sầu riêng geh klih đah rlau 125 rbăn tấn play mra geh tăch lah nơm mô ƀư ueh ri mra jêr ngăn”.

            Uănh kơl an tât nau hun hao nkual rnoi mpôl đê̆, wa Y Ca Ênuôl, Groi Kruanh Ban dân tộc, HĐND n’gor Dak Lak rvê rnôk tĭng nau geh kơp dơn ach o mhe ri rnoh rnăk ach o bah n’gor hao ueh âk. Tâm nê, nkuăl rnoi mpôl đê̆ hao tât 65,3%. Wa Y Ca Ênuôl đă, ân geh nau kơl an lơn tât ăp nŭih aơ:       

            ‘Đă UBND uănh kơl rđau đă ndrel geh ăp nau kan rjăp lơn mpeh nau  kan n’huch ach o. Ƀư nau n’huch ach o săk tam, kơl an nau kan đah nkuăl ngai, gay ma n’huch ach o ngăch ndrel nâp nâl. N’huch rnoh rnăk ach o tâm nkuăl rnoi mpôl đê̆, ngăn lah rnăk ach o rnoi mpôl đê̆ tâm ntŭk, ƀư ân tâm ban đah ăp bôk nau kan”.

            Tâm nchră mpeh nau kan văng sa, wa Nguyễn Ngọc Hùng, Groi Kruanh Rnâng kan Văn hoá rêh jêng HĐND n’gor Dak Lak rvê mpeh nau kan nai dak si dăn rlu nau kan ndrel nau ƀư rlong tăch dak si, ndơ dŏng dak si mbrơi, khuch tât nau mât chăm n’hâm soan ƀon lan. Ndri ma, ntoh măt đă ân uănh tât nau kan rklaih 2 nkô̆ aơ:

            ‘Lah nau aơ mô geh ntrong kan gay ma rklaih gay ma dŏng ân ueh ri klach lah tâm rơh tât ăp ntŭk kan ndâk njêng nsum, ngăn lah bah n’gor mra geh nau mô tŏng nŭih pah kan. Ndri ma phung nơm ân geh ntrong kan mhâm ƀư ân ăp nŭih nơm râng pah kan ueh, đăp mpăn ƀư nau dơi bah nau kan nsum, tă bah nê nơm mơ geh mât ueh nau rđau kan ăp nau aơ”.

            Tâm 6 khay dŭt năm, UBND n’gor Dak Lak mhe lŏ rgum njrăng, rdâng srê Covid-19, nkre ndâk, hun hao văng sa-rêh jêng. Gay ƀư jêh ăp nkô̆ nau hun hao năm 2022, wa Trần Phú Hùng, Groi Kruanh HĐND n’gor Dak Lak đă UBND n’gor rgum doh rklaih ntŭk hôm nkol, ndrel ntrong kol mpeh nau pă tơm prăk nsum:

            ‘Đă Uỷ ban tâm nau kan ân ƀư ăp nau kan, ăp ntŭk kan gay geh tâm nchră kơp uănh ân n’hêl, der geh nau ma rnôk hội đồng ân ƀư nau ntuh kơl, yơn lah, rnôk geh nau ntrŭnh đă lŏ geyh nkol bah ăp bôk nau kan nê lah rklaih ntrơn ntŭk gŭ hôm mbrơi. Ndri ma roh âk khlay, đă Uỷ ban ngăch ƀư ntrơn rgâl nau kan aơ”.

            Ndrel ma nau nchră nau kan, nau tă geh dơi ƀư nau hun hao văng sa, đăp mpăn neh dak 6 khay bôk năm ndrel ăp nau kan ntrong kan tơm tâm 6 khay dŭt năm, tâm rơh rƀŭn aơ, HĐND n’gor Dak Lak hŏ tâm nchră âk nau kan khlay, kơt: nau ntrŭnh pă ntop mpeh tơm prăk soay hao khlay đah nau kan ndâk njêng bah n’gor, Nau ntrŭnh nchrăp rnoh sŏk ăp ntil nau dŏk ndrel nau dŏng nau ntrŭnh mpeh ntrơn rgâl nau ntuh kơl bah ăp nau kan kơl an hun hao nkual n’har bri-Bôk nau kan jê̆ bah n’gor Dak Lak, nau ntrŭnh mpeh nau ƀư, nkô̆ nau, nau ntrŭnh ntop tơm prăk Ngih dak ƀư bôk nau kan bah neh dak hun hao văng sa, rêh jêng nkuăl rnoi mpôl đê̆ ndrel gôl yôk, lvang năm 2021-2030./.

                        Nŭih rblang: H’Thi