VOV4.M’nông: Pơh rlau aơ, Kruanh Quốc hội Vương Đình Huệ mâp măt ăp nŭih kan nsum bah Rmôt kan Văng sa, Văn hoá ndrel pâl n’aih; ntoh măt rđau kan ăp n’gor tâm nkuăl Chiến khu Việt Bắc. Ntoh nau tâm nar mâp măt, Kruanh Quốc hội lah rjăp, nau khlay văn hoá ơm yau cách mạng bah Việt Nam lah nau ơm geh mpeh pâl n’aih geh âk ntil, âk mpưm ndrel mpêt khlay. Ndri ma, tâm nau kan pâl n’aih ân geh nsum ma nau kan mât, hun hao ăp nau khlay văn hoá, ơm yau cách mạng.

            Kruanh Quốc hội Vương Đình Huệ lah rjăp, srê Covid-19 lơh khuch jâk ngăn, yơn kŏ lah rnôk gay ma Việt Nam ndâk tay nau kan, ăp ntil ƀư nau kan pâl n’aih Việt Nam tĭng nuih n’hâm nau nuih mrô 08 bah Bộ Chính trị mpeh nau hun hao njêng nau kan văng sa tơm ndrel tĭng Luật pâl n’aih hŏ geh Quốc hội; ntrŭt dăng nau kan mpeh ntŭk ntu gŭ âm, ntrong ƀư nau kan, rmôt ƀư nau kan tăch rgâl ndrel ăp ntil ndơ mpeh pâl n’aih, rgâl nau mĭn gay ma leo nau kan pâl n’aih jêng nau kan văng sa rgum nsum, leo nau tâm rgop ƀư ndrel nkuăl.

            Sŏk nau ntoh mrô bah ăp nau nkoch hun hao pâl n’aih bah ăp dak lam ntur neh mpeh nau rgum năch tât uănh, bonh đă nau rvăt năp ăp ntil ndơ ueh khlay bah ăp nkuăl, ăp dak, Kruanh Quốc hội lah rjăp, hun hao nau kan pâl n’aih khlay lah nau mĭn, nau rƀŏng uănh ndrel njêng nau ueh êng. Ndri ma, ăp nŭih kan bah rmôt kan văng sa, văn hoá ndrel pâl n’aih ân geh rgop nau ngơi nsum gay ma ndrel nau nsum ty bah Trung ương, nkuăl ndrel ăp ntŭk mât nau kan gay ma ntrŭt dăng nau nâp lơn tay nau kan pâl n’aih tâm rơh tât.

            Kruanh Quốc hội rnê prêh, Hội đồng Dân tộc bah Quốc hội, Viện văng sa Văn hoá tâm rmôt ăp Hội Khoa học ndrel Kỹ thuật Việt Nam, hŏ tâm rgop ƀư nau tâm nchră ndrel săch nkô̆ “Tâm rgop hun hao nau pâl n’aih geh nsum ma nau mât, ƀư ueh ăp nau khlay văn hoá nau ơm cách mạng Chiến khu Việt Bắc” đah 6 n’gor, geh: Cao Bằng, Bắc Kạn, Lạng Sơn, Thái Nguyên, Hà Giang, Tuyên Quang:

            ‘Gâp kŏ tâm ban nau đah nkô̆ nau nar aơ bah rơh tâm nchră. Pâl n’aih ndrel ngăn lah hun hao nau pâl n’aih nsum geh đah nau mât, ƀư ueh ăp nau khlay văn hoá ơm khlay ndrel cách mạng. Rnoh văn hoá ơm cách mạng bah Việt Nam lah ngoai tâm ăp nau kan pâl n’aih geh âk ntil, âk mpưm ndrel mra dơi lah mpêt khlay bah Việt Nam đah lam ntur neh. Ndri ma, tâm nau ndâk nau kan pâl n’aih ân geh nsum ma nau mât, ƀư ueh ăp nau khlay văn hoá, nau ơm cách mạng. Aơ lah ntrong kan ơm mpeh nau kan văn hoá ăp ntil, ăp nau ueh bah nơm”.

            Kruanh Quốc hội mbơh nau, jêh rơh rƀŭn Văn hoá lam dak, tâm nau rgum nchră bah Tổng Bí thư Nguyễn Phú Trọng, Đảng ndrel Ngih dak hŏ jao N’gâng kan Văn hoá, Thể thao ndrel pâl n’aih ndâk du nau kan nkô̆ nau mpeh hun hao văn hoá, tâm nê geh nkô̆ mât, hun hao ăp nau ơm ueh.

            Kruanh Quốc hội Vương Đình Huệ đă, nau kan hun hao pâl n'aih nsum bah 6 n'gor ân geh rgop nsum ƀư 3 nau kan nkô̆ nau bah neh dak mpeh nau ndâk njêng ƀon lan mhe, hun hao văng sa, rêh jêng nkuăl rnoi mpôl đê̆ ndrel gôl yôk, jut jăng ach o nâp nâl.

            Tâm rơh tât, nau kan pâl n’aih ân geh rgop ƀư ngăch nau ntrŭnh ƀư nau ndâk ndrel ma hun hao văng sa, rêh jêng, ƀư ăp nau ntrŭnh, nau kơl an bah Quốc hội Chính phủ, tâm nê geh nau kơl an nŭih pah kan nkre nkân jâng, nkre pơk trong nơih ân nŭih pah kan đăp mpăn pah kan jan sa.

            Kruanh Quốc hội Vương Đình Huệ lah rjăp, Quốc hội, ăp ntŭk kan Quốc hội ŭch rmôt ăp Hội khoa học kỹ thuật Việt Nam ndrel viện văng sa văn hoá, ăp nŭih kan bah rmôt kan ân geh tâm rgop nau, gay ma ƀư jêh nau kan,  ăp nau ntrŭnh ƀư bah Quốc hội, kŏ kơt lah nau kan mêt uănh geh tât nau kan aơ. Quốc hội rnê prêh ndrel mra rdjăt nau rgop mbơh bol ma moh nau kan rgum mô lah êng săk nơm, mô lah đah săm ƀŭt, gay ma mhâm ƀư, Quốc hội nar lơn tâm dăch ma nau ngăn lơn./.

            Nŭih rblang: H’Thi