VOV4.M'nông: Ôi 27/5, ta nkual ƀon têh Kon Tum (n'gor Kon Tum) ƀư Nkoch n'hơ nău kan an nuĭh quet nte. Đah nkô̆ "Mpôl hên ŭch geh băl”,  Nkoch n'hơ rgum geh 10 doanh nghiệp ƀư njêng, tăch rgâl  n'hanh mbơh joi nău kan tât râng. Ta rơh nkoch n'hơ, bơi 60 nuĭh quet nte đăng ký ŭch joi geh nău kan n'hanh ntĭm nti nău kan.

Tâm nê, geh du đêt nuĭh quet nte hŏ joi geh nău kan tâm di đah he nơm ta trong kan thủ công mỹ nghệ, choh bok ao, công nghệ thông tin, ƀư njêng tiểu thủ công nghiệp, rhŏ dŏng…  Lam n'gor Kon Tum aƀaơ geh rlău 7.300 nuĭh quet nte, tâm nê 1.220 nuĭh quet nte jru hô. Lơn âk nuĭh quet nte ta n'gor Kon Tum rêh nsing tâm rnăk wâl n'hanh ƀon lan da dê. Nkoch n'hơ nău kan “Mpôl hên ŭch băl" rƀŏng tât nuĭh quet nte ndrel đah nău kơl nuĭh quet nte joi geh  nău kan tâm di hôm lah rnôk  gay nuĭh quet nte tĭng kơn rgâl  nău mĭn, lor nchrăp tay, nsing nơm joi geh nău kan n'hanh ntĭm nti nău kan an nsĭt geh wăng sa an săk nơm./.

Nuĭh rblang: Điểu Thân