VOV4.M’nông: N’gor Kon Tum geh rlau 50.600 nŭih geh n’hâm ma cách mạng. Rnơm ƀư ueh nau kan kơl an bah Đảng, Ngih dak ndrel nau ƀư rgum geh nau kan “Kơl an” ri ma tât rnôk aơ 99,82% rnăk geh dơi kơl bah n’gor geh nau rêh tâm ban mô lah prêh lơn rđil nau geh nsum bah ƀon lan tâm ntŭk gŭ.

            Tâm xã Hiếu, nkuăl Kon Plông, n’gor Kon Tum, rnăk tahen sôt rmanh Đinh Lôi, ƀon Vi Ching lah du ntŭk geh gĭt âk. Tâm ăp năm rlau aơ, n’gâng kan kŏ kơt lah ăp rmôt kan bah xã Hiếu mro kơl an, mât chăm ân tahen sôt rmanh ndrel rnăk vâl. Ndrel đah nau kơl an bah Đảng, Ngih dak tâm nau hun hao văng sa, mât chăm ân rnăk vâl nŭih ƀon lan nkuăl jêr jŏt, ri rnăk vâl tahen sôt rmanh Đinh Lôi hôm geh kơl an, ntĭm nau hun hao văng sa n’hao nau rêh. Ndrel tâm ăp nar lễ, tết, nar tahen sôt rmanh, tahen khĭt 27/7... ntoh măt n’gâng kan, rmôt kan bah xã kŏ tât khâl, pă nklâm ndơ bonh đă nuih n’hâm tahen sôt rmanh ndrel rnăk vâl. Tahen sôt rmanh Đinh Lôi mbơh:

            “Kŏ rnơm geh Đảng, Ngih dak kơl an, nau kơl an đah ăp tahen sôt rmanh ăp tŏng, năn. Jêh ri n’gâng kan, rmôt kan bah xã kơl an, tâm kơl ri ma gâp ndrel rnăk vâl geh hun hao văng sa, nau rêh geh kơt kônh wa ƀon lan. Rhơn ri dĭng gâp ueh n’hâm soan, gâp hôm râng kơl an kon sau tăm tơm si, ƀư lŏ”.

            Lah du n’gor geh nau dơi văng sa rêh jêng hôm âk nau jêr, yơn lah Đảng bộ, n’gâng kan n’gor Kon Tum mro uănh nă, nau kan tahen sôt rmanh, tahen khĭt, mât chăm, rklaih nau kơl an đah nŭih geh n’hâm ma nau kan chính trị lah nau tơm ndrel vay ƀư mro. Đah nuih n’hâm aơ, mô knŭng lah nkuăl ueh nơih ma n’ăp nkuăl jru, nkuăl ngai jêr, nkuăl rnoi mpôl đê̆, nau kan mât chăm, kơl an nŭih geh n’hâm đah cách mạng geh kơl an. Wa Mai Thị Luận, Groi Kruanh UBND xã Đăk Rơ Ông, nkuăl Tu Mơ Rông mbơh, lam xã geh 56 tahen sôt rmanh ndrel rnăk tahen khĭt. Nau kan “kơl an” lah nau ƀư mro mrăng đah n’gâng kan ndrel rmôt kan bah nkuăl:

            ‘Kơl an tât ăp kô, Đảng uỷ, HĐND, UBND xã ƀư rơh mâp măt di nkah nar tahen sôt rmanh, tahen khĭt. Rơh tết ƀư nau ôp khâl bonh đă ăp kô ndrel ăp rnăk vâl băl mpôl dôl ôp brah bah ăp tahen khĭt. Êp nê tâm ăp ƀon kŏ jao ân Bí thư Chi đoàn, jêh ri bnh đă đoàn viên, druh ndăm, bu ur kơl an nar hăn kan kơt lah hăn koh long, jik pih bum blang, rôk pih ba jêh ri ăp nau kan kơl an ăp kô”.

            Nau mbơh tă bah Sở Lao động-Thương binh ndrel Xã hội n’gor Kon Tum ân saơ, tâm 5 năm rlau aơ n’gor ƀư ôp khâl ndrel pă nklâm ndơ ân bơi tât 99 rbăn nklâm ndơ ân nŭih geh n’hâm tâm rnôk tết năm mhe ndrel nar tahen ơm, tahen khĭt 27/7 đah rnoh prăk bơi tât 24 rmen 200 rkeh. Ndrel ma nê, tơm prăk “kơl an” bah n’gor rgum geh bơi tât 5 rmen gay ma rgop nkra ân ueh ăp môch tâp tahen, ôp khâl rnôk ji kuet, kơl an khám săm jo ân ăp nŭih geh dơi kơl, kơl nkra ngih mhe, ndâk rlau 1.200 ngih ân nŭih geh n’hâm ndrel rnăk dơi kơl đah rnoh rlau 37 rmen 200 rkeh. Nau kan kơl răk rong, mât chăm ân nŭih geh n’hâm, Mẹ Việt Nam janh dăng geh ƀư ueh, jêng nau ueh bah nau kan “kơl an”. Wa Nguyễn Thanh Tính, Groi giám đốc Sở Lao động-Thương binh ndrel Xã hội n’gor Kon Tum, lah rjăp:

            ‘Nau kan ntrŭnh ƀư ân ueh nau kan kơl an đah nŭih geh n’hâm hŏ kơl an nŭih geh n’hâm đăp mpăn nau rêh lơn, rgop nau mât đăp mpăn chính trị, rêh jêng. Geh nau ueh tam jru ngăn tâm nau nkoch mbơh nau rŏng dak, nau vay ơm cách mạng tâm rmôt cán bộ, đảng viên, công chức, viên chức ndrel ăp kơn ƀon lan. Nau rêh nuih n’hâm, drăp ndơ bah ăp nŭih geh kơl an nar lơn geh rgâl ueh”.

            Rnơm ƀư ueh nau kan kơl an bah Đảng, Ngih dak kŏ kơt lah ƀư rgum nsum dơi nau kan “Kơl an” tât rnôk aơ, 99,82% rnăk dơi kơl bah n’gor Kon Tum hŏ geh nau rêh tâm ban mô lah prêh lơn nau rêh nsum bah nŭih ƀon lan tâm ntŭk gŭ, nau rêh nuih n’hâm, drăp ndơ bah ăp gưl kan bah n’gor Kon Tum kŏ ân saơ dĭng lĕ 102 xã, phường, nkuăl rêh bah n’gor kŏ ƀư ueh nau kan “Kơl an” ndrel nau kan tahen sôt rmanh, tahen khĭt tĭng 6 nkô̆ nau bah N’gâng kan Lao động-Thương binh ndrel Xã hội./.

                        Nŭih rblang: H’Thi