VOV4.M'nông: Tĭng n'glêh an mbrô 861, nar 4/6/2021 bah Thủ tướng Chính phủ an nchih săk ăp  xã nkual III, nkual II, nkual I mpeh ƀon lan rnoi mpôl đê̆ n'hanh mpeh yôk yang lvang năm 2021- 2025, n'gor Kon Tum geh 25 xã mpeh 8 nkuâl, nkual ƀon têh nuĭh ƀon lan mô hôm mpeh săk dơi phăt dơm thẻ bảo hiểm y tế. Nău dja hŏ ƀư rnoh nkrum lam bảo hiểm y tế bah n'gor hŭch âk. Ta năp nău ngăn geh bah lơ nê, n'gâng kan dơi kan n'hanh n'gâng kan ăp gưl bah n'gor Kon Tum dôl nsrôih tĭng ƀư âk trong nkra gay n'hao rnoh âk nkrum lam bảo hiểm y tế gay đăp mpăn nău mât chăm n'hâm suan an nuĭh ƀon lan.

Ƀon Kon Hơ Ngo Klah, xã Ngọc Bay, nkual ƀon têh Kon Tum geh 277 rnăk ƀon lan đah rlău 1.400 nuĭh, lơn âk lah nuĭh Ba Nar, mbah Rơ Ngao. Ntơm bah khay 7/2021 nuĭh ƀon lan tâm ƀon mô hôm geh săk dơi phăt thẻ bảo hiểm y tế. Rlău 14 khay, tât aƀaơ ƀon Kon Hơ Ngo Klah mơ geh nklăp 500 nuĭh râng thẻ bảo hiểm y tế đah lơn âk lah ăp nuĭh way kop ji, bu ur bŭn n'hanh kon se hăn nti. Wa A Đồi, du hê nuĭh ƀon lan tâm ƀon an gĭt, rnăk păng geh 10 nuĭh ri dơn rvăt dơi thẻ bảo hiểm y tế an 2 hê dơm. Ăp nuĭh hôm ƀa ƀă tâm rnăk way rvê đah nău kop ji mô geh prăk but săm ji:

        “Rnôk ntơm nơh lah he phăt thẻ ji ntĭt kơt he ji kop siăk he ndjôt thẻ hăn tât nhih dak si bu an ngêt dak si. Aƀaơ mô hôm geh. Mô geh thẻ lah rvê ngăn. Dŭt krit jêr mô geh thẻ lah rnôk kop ji. Kop ji lah hăn ran tât nhih dak si, saơ nhih dak si bu sŏk prăk sĭt jay hăn đor manh, rôk joi bum blang tăch trok".

        Nău 25 xã mpeh 8 nkuâl, nkual ƀon têh bah n'gor Kon Tum nuĭh ƀon lan mô hôm mpeh săk dơi phăt thẻ bảo hiểm y tế hŏ ƀư rnoh âk nkrum lam thẻ bảo hiểm y tế ta ăp xã dja hŭch âk. Yuh Y Ngọc, cán bộ Văn hóa- Xã hội xã Ngọc Bay, nkual ƀon têh Kon Tum an gĭt, tât aƀaơ lam xã mhe geh bơi 3.900 nuĭh râng thẻ bảo hiểm y tế geh tât rnoh 61%. Rnoh hôm ƀa ƀă rlău 3.000 nuĭh dŭt jêr râng tă bah nău rêh hôm âk jêr jŏt tă bah n'gâng kan n'hanh ăp nsum mpôl bah xã hŏ dŭt nsrôih tâm trong nkoch trêng, rgŏ jă:

       “Ăp ôi nar ngoăy chào cờ ăp pơh geh nkoch trêng mpeh trong kơl bảo hiểm. ăp rơh hop bah thôn ndop nkoch trêng an ăp oh yuh, ăp rnăk râng bảo hiểm y tế. Dŭt jêr jŏt bah ăp rnăk lah mpeh prăk kaih. Hăn kan an bu ri dơn tŏng sa an ăp nar dơm ntop đah rvê an kon hăn nti đŏng jêng mô geh ndơ gay ma rvăt bảo hiểm”. 

        Nău lư bah Bảo hiểm xã hội n'gor Kon Tum an saơ, rnôk kêng dŭt năm 2021, rnoh nkrum thẻ bảo hiểm y tế ta n'gor lah 89,59% rnoh nuĭh, hŭch rlău 4% rđĭl đah kêng dŭt năm 2020 tâm ban đah bơi 38.000 nuĭh mô hôm râng thẻ bảo hiểm y tế. dŭt rvê geh thôn mpeh săk rgâl bah nău n'glêh an 861 aƀaơ hôm ntơm bah 20 tât 30% nuĭh ƀon lan râng bảo hiểm y tế.

        Ta năp nău đă n'hao rnoh âk râng thẻ bảo hiểm y tế gay đăp mpăn nău mât chăm n'hâm suan an ƀon lan tâm ban kơt tŏng đah nău ŭch geh rdâk njêng ƀon lan mhe, n'gâng kan dơi kan n'hanh n'gâng kan ăp gưl bah n'gor Kon Tum dôl nsrôih tĭng ƀư âk trong nkra.

        Lah nkuâl geh rnoh âk nkrum lam thẻ bảo hiểm y tế rlău 95%, aƀaơ hŭch hôm nklăp 91%, wa Phạm Hồng Dương, Groi Giám đốc Bảo hiểm xã hội nkuâl Đăk Hà, an gĭt đơn vị dôl tĭng  ƀư trong rƀŏng Bảo hiểm xã hội n'gor Kon Tum lah "hăn tĭng mƀon, goh tĭng mpông, ra tĭng nuĭh" gay rgŏ jă ƀon lan râng bảo hiểm y tế:

       “Mpôl hên n'hao dăng pah kan nkoch trêng. Ƀư âk rơh tâm nchră nkoch trêng đah tĭng thôn, tĭng xã. N'hao âk nuĭh kan rgum sŏk. Nkre rgŏ jă lam nuĭh tât  râng nsum".

        Wa Hoàng Thu Thủy, Groi kruanh Jrô kan nkoch trêng n'hanh pơk hvi âk nuĭh râng, Bảo hiểm xã hội n'gor Kon Tum, an gĭt:

       “Bảo hiểm xã hội nkoch trong ƀư gay nuĭh ƀon lan râng mhâm ƀư an dŭt tâm di. Lor an ma kon se jê̆, ăp kon se nti. Lôch nê an lor ăp nuĭh âk năm deh, an lor ăp nuĭh kan tơm tâm rnăk wâl râng lor n'hanh tâm pă glêh mông nar râng. Khân păng mbra râng 3 khay, 6 khay rgâl bah hôm ma khân păng râng lĕ ma năm gay nta trong dơh an khân păng dơi râng".

        Đah ăp trong nkra mhe nkoch bah lơ nê, tât kêng dŭt khay 9 mhe aơ rnoh âk nkrum thẻ bảo hiểm y tế bah n'gor Kon Tum hŏ hao ntơm bah 89,59% kêng dŭt năm 2021 hao rlău 91%. Yơn lah i ngăn an saơ gay nuĭh ƀon lan, lơn lah nuĭh rnoi mpôl đê̆ geh nău rêh hôm jêr jŏt bên dơi đah trong kan mhe n'hanh njêng dơi nău jŏ jong mpeh rnoh âk nuĭh râng thẻ bảo hiểm y tế ta năp  măt hôm ân geh nău ntop kơl prăk bah ngân sách. Dơi gĭt, Bảo hiểm xã hội n'gor  Kon Tum hŏ dăn đă đah ăp gưl geh nău dơi kan mĭn uănh tâm pă ngân sách Ngih dak rvăt tay mô lah ntop kơl rvăt bảo hiểm y tế  đah rnoh dŭt đêt 70% an nuĭh ƀon lan ta nkual mhe geh rgâl bah nău n'glêh an 861 kơl nuĭh ƀon lan geh ndơ ma mât chăm n'hâm suan, hun hao wăng sa tĭng kơn n'hao nău rêh drăp ndơ n'hanh nuih n'hâm./.

VOV Tây Nguyên

Nuĭh rblang: Điểu Thân