Kêng măng 26/9, ta Ntŭk Kruanh dak, Kruanh dak Võ Văn Thưởng mâp măt Mpôl đại biểu Prăk nkrem Vừ A Dính n’hanh CLB Yor Hoàng Sa, Trường Sa he. Jêh 25 năm ndâk njêng n’hanh an dŏng, Prăk nkrem Vừ A Dính lĕ jao prăk kơl nti an âk oh kon hŏk rnoi mpôl đêt ntoh lư tâm dak; âk oh lĕ dơi râng ăp nău nchrăp ƀư ntĭm nti jru yor Prăk nkrem ƀư, tă bah nĕ rgop khlay n’hao uĕh nuĭh kan gĭt blău an neh dak.

CLB Yor Hoàng Sa, Trường Sa he lĕ ƀư âk nău kan ngăn, boăt nthoi nău tâm rnglăp, play nuih, nuih n’hâm bah nuĭh ƀon lan lam dak, rgop soan... gay râng ndâk njêng, mât njrăng Hoàng Sa n’hanh Trường Sa bah neh dak. Kruanh dak Võ Văn Thưởng nkoch nău răm bah năp săk rnglăy ngăn ngên n’hanh geh nkô̆ nău bah Prăk nkrem Vừ A Dính n’hanh CLB Yor Hoàng Sa, Trường Sa he tâm âk năm bah năp. Kruanh dak Võ Văn Thưởng mĭn lah an mât uĕh tay nău kan bah Prăk nkrem Vừ A Dính, nthoi nău way ơm dŭt khlay ma Prăk nkrem lĕ ndâk njêng; mô rlu ntop kơl, kơl ngăn ngên an ăp oh kon hŏk rnoi mpôl đêt.