VOV4.Mnông-Wa Đỗ Văn Chiến, kruanh Ủy ban trung ương Mặt trận Tổ quốc Việt Nam ndrel đah mpôl pah kan mhe tât khâl, pă ndơ an nuĭh Khmer ntoh lư nkuăl ƀon têh Cần Thơ di rơh tết Chôl Chnăm Thmây năm 2022.

Ndơn kan an nuĭh leo kan Đảng, ngih dak, wa Đỗ Văn Chiến rhơn tết Chol Chnăm Thmây tât hòa thượng Đào Như, groi kruanh Hội đồng trị sự Trung ương giáo hội phật giáo Việt Nam, viện trưởng Học viện phật giáo Nam tông Khmer; kruanh rnâng kan trị sự Giáo hội phật giáo Việt Nam nkuăl ƀon têh Cần Thơ, ndrel đah hòa thượng, thượng tọa, chư tăng, phật tử n’hanh ƀon lan rnoi mpôl nuĭh Khmer vơt tết way ơm Chôl Chnăm Thmây ueh răm, đăp mpăn, hơm răm n’hanh geh âk nău dơi tâm let năp tay. Wa Đỗ Văn Chiến ŭch, ăp hòa thượng, thuơng tọa, chư tăng, phật tử ndrel đah ƀon lan rnoi Khmer geh rgŏ jă kon său, oh mon nsrôih nti, bol ma jêr jŏt mô dơi nklơi nti. Nkre lah, ŭch ƀon lan geh n’hao tay nău tâm rnglăp, nsum ti ƀư tĭng ueh ăp nău ntrŭnh, trong kan bâh Đảng, nău kơl, pháp luật bâh ngih dak, ntop rdâk njêng ƀon tơm ăp nar lơ ma hun hao.

Nuĭh rblang: Thị Đoắt