VOV4.M’nông: Năm nti mhe hŏ tât. Ƀư tĭng nau kơl an ân kon se nŭih rnoi mpôl đê̆ mro geh Quốc hội kơl an. Mhe aơ, Kruanh Quốc hội Vương Đình Huệ hŏ tât râng nau ntơm lăp dŏng Ngih săm ƀŭt Trung học Phổ thông Kỳ Sơn, Nghệ An ndrel lăp năm nti mhe 2022-2023. Kruanh Quốc hội lah rjăp, mât chăm, ntĭm nti ueh ân ăp oh lah nau ueh ngăn, lah mpông trong rƀŏnbg tât nau mhe, kơl an kon nŭih rklaih luh ach o, rluk mâl, gay geh nau hơm răm, dah rŏng, đăp mpăn.

            Kỳ Sơn lah nkuăl n’har bri, nkuăl prêh, nkuăl rnoi mpôl đê̆, tâm rnoh 1/74 nkuăl geh nau jêr ngăn bah lam dak. Ngih săm ƀŭt THPT Kỳ Sơn geh ndâk tâm năm 1967 lah ngih săm ƀŭt THPT êng du ntŭk bah nkuăl Kỳ Sơn đah rlau 95% lah oh kon nŭih rnoi mpôl đê̆ tă bah 21 xã, nkuăl têh tâm nkuăl. Trong hăn tât ngih săm ƀŭt bah ăp kon se hăn rlet trong bri, rlet trong dak, ngăn lah yan mih dak lip, rluh neh geh mro.

            Lor ma ndâk ngih săm ƀŭt mhe, ntŭk ntu ngih săm ƀŭt ơm lĕ sat, lĕ djơh, mô geh ngih gŭ ân kon se nti ndrel nai nti, ăp kon se joi êng ntŭk gŭ, ntŭk sa, mât êng nau rêh gay ma hăn nti. Ngih săm ƀŭt THPT Kỳ Sơn geh ndâk mhe đah nau nkra nâp, khoa học, geh tŏng nau dơi bah neh dak tŏng ân 2000 kon se nti, đah 245 jrâu nti.

            Ntoh nau tâm nar leo lăp dŏng, Kruanh Quốc hội Vương Đình Huệ nkah tay nau mĭn bah Kruanh Hồ Chí Minh mpeh nau ntĭm nti, nkre lah rjăp, Đảng ndrel Ngih dak nơm mro mrăng uănh khlay nau ntĭm nti, uănh aơ lah nau kan bôk năp, mro dŏng ăp nau ueh gay ma mât chăm ân nau kan ntĭm nti, đăp mpăn ăp kon se, bol ma tâm nkuăl rđŭng, nkuăl yôk, nkuăl gôl dak, ăp nŭih kŏ geh hăn nti, geh gĭt play săm ƀŭt tâm di, tâm ban.

            ‘Hun hao nau kan ntĭm nti, đăp mpăn nau tâm ban nau kan ntĭm nti, mô ân geh nŭih geh nchlơi êng ba kơi, ngăn lah nŭih rnoi mpôl đê̆ nkuăl jru, nkuăl jêr jŏt, nkuăl rnoi mpôl đê̆ nar lơn geh mât chăm, kơl an gay ma n’huch nau jêr, ăp nhoat hun hao năn đah nkuăl êng lah nau mĭn rđau kan têh ndrel mro mrăng bah Đảng, Ngih dak nơm. Rnâng kan rđau kan Trung ương hŏ ntrŭnh nau mrô 29 mpeh nau rgâl mhe nau kan, ăp ntil nau ntĭm ndrel nti. Quốc hội hŏ rgum ƀư ăp nau mĭn kan bah Đảng, ƀư jêh ndrel ntrŭnh âk nau kan, pháp luật gay geh ntĭm nti hun hao, ngăn lah nau ntrŭnh mrô 88 mpeh rgâl bôk nau kan ntĭm nti, ndrôm săm ƀŭt ntĭm nti. Mât chăm, kơl an ân ueh ân ăp kon se lah nau ueh ngăn, lah mpông trong gay ma rƀŏng tât nau mhe, rklaih kon nŭih luh bah ach o, rlu mâl, gay geh nau rêh hơm răm, đăp mpăn, ueh lăng”.

            Ndri ma, Kruanh Quốc hội Vương Đình Huệ ntoh nau ŭch, ăp nai nti kon se mra lah nŭih leo trong ang mpeh nau rêh, nau dŏng, nau gơih, đah nau kan bah nơm, lôch n’hâm ŭch rŏng, ntĭm nti ân ueh, mô knŭng ntĭm nti nau mĭn ma hôm lah nkoch nau ŭch, nsôih gay ăp oh gơih nti, gơih geh nau tât ma ăp nau mhe mpeh nau blau ndrel khoa học.

            Kruanh Quốc hội Vương Đình Huệ ntoh nau ŭch ndrel nau rnơm bah ăp oh mra geh kơt tĭng ăp nau gơih nti, nti blau bah ăp kon neh Nghệ An, nsôih ntĭm nti, nsôih hô, ê lor nti ân nơm, gay blau, gay gĭt, gay rêh nsum, gay ƀư rjăp, ntĭm nti nchrăp ân nơm nau ueh gay ma ndâk nau dơi, rgop kơl an ƀon tơm neh dak.

Kruanh Quốc hội đă gưl uỷ, n’gâng kan ndrel ntŭk kan ntĭm nti ngăn ngên kơl nau rđau kan, ndâk văn hoá ntĭm nti tâm ngih săm ƀŭt, gay ăp ngih săm ƀŭt mô knŭng lah ngih săm ƀŭt ueh ma hôm lah, nai lah ngai, kon se lah kon se, ngih săm ƀŭt lah ngih săm ƀŭt, jrâu nti hôm lah nau ueh, nau ơm bah nkuăl, bah nroi mpôl geh răk, geh bun dăp, hun hao tâm nuih n’hâm, nau rŏng, nau mĭn bah ăp kon se, bah ngih săm bŭt.

            Ngih săm ƀŭt THPT Kỳ Sơn lah du ntoh mhô bah n’gor tâm nau ndâk văn hoá ntĭm nti geh nsum ma nau rgâl mhe, n’hao nau nâp ntĭm nti ndrel nti. Nkre lah, rgum ndâk ndrel ntrŭnh ƀư leo lor Ngih săm ƀŭt THPT bán trú mhe geh nsum ma nau ndâk ntrong nau ơm ueh nau kan ntĭm nti geh tât nau ueh ngăn bah nkuăl prêh Kỳ Sơn.

            Kruanh Quốc hội mbơh, năm 2022-2023 lah năm bôk năp ƀư nau ntrŭnh mrô 88 mpeh nau rgâl mhe bôk nau kan, săm ƀŭt nti, nau kan ntĭm nti ndrel nau mêt uănh nau kan tĭng Bôk nau kan ntĭm nti phổ thông 2018 đah jrâu 10. Uỷ ban Rnâng kan Quốc hội mra ƀư nau kan mêt uănh mpeh nau ƀư nau kan rgâl mhe bôk nau kan, ndrôm săm ƀŭt ntĭm nti phổ thông tâm năm 2023 gay ma năn kơp, doh rklaih ăp nau nkol, đăp mpăn ăp nkô̆ bah Đảng ndrel Quốc hội nchrăp ƀư ân tŏng ăp, ân nâp nâl./.

Nŭih rblang: H’Thi