VOV4.M'nông: Kêng măng 8/8, ta Jay Quốc hội, Kruanh Quốc hội Vương Đình Huệ ƀư tơm rơh pah kan bah Kruanh Quốc hội đah Bộ Tài nguyên n'hanh Môi trường mpeh nău rgâl nkra, kơi ntop Luật neh ntu. Mbơh ta rơh pah kan, Bộ trưởng Bộ Tài nguyên n'hanh Môi trường Trần Hồng Hà an  gĭt, trong nchrăp rgâl nkra Luật neh ntu dôl sŏk nău rgop bah ăp nuĭh geh tât khuch dơi rdâk njêng jâng nsing grêt dăch Nghị quyết 18, ăp Nghị quyết, n'glôch jêh êng ƀa ƀă gay ƀư jêng nău way ăp tŏng, năn ngăch ăp nău mĭn, trong nchrăp bah Đảng mpeh mât n'hanh dŏng neh ntu; đăp mpăn lam trong kan pháp luật...Tâm rnôk rdâk njêng trong nchrăp Luật, Bộ hŏ lor nchrăp ôp uănh tay ăp tŏng rlău 100 luật, bộ luật geh tât trong kan neh ntu gay dăn đă rgâl nkra tâm Luật dja dĭl mô lah dăn đă rgâl nkra ăp Luật geh tât gay đăp mpăn dơn ngoăy, ăp kôp bah lam trong kan pháp luật tĭng di nuih n'hâm bah Nghị quyết mbrô 18-NQ/TW. Lôch rnôk djăt ăp nău rgop, Kruanh Quốc hội Vương Đình Huệ lah rjăp: trong nchrăp Luật neh ntu (rgâl nkra) mbra dơi Quốc hội an nău rgop lor bôk năp ta Rơh hop tâl 4, Quốc hội khóa XV n'hanh nchrăp mbra mĭn uănh an n'gluh dŏng tĭng rêng 3 rơh hop, nsrôih tâm năm 2023 ƀư lôch jêh rgâl nkra Luật neh ntu./.

Kruanh Quốc hội Vương Đình Huệ dăn đă, Chính phủ hao ndơ̆ si ƀŭt trong nchrăp Luật tât ăp nhih pah kan bah Quốc hội bah năp nar 1/9 gay gŭ mĭn, an nău rgop ta rơh hop Ủy ban Thường vụ Quốc hội.

Nuĭh rblang: Điểu Thân