VOV4.M'nông: Kơl lor an nuĭh geh n'hâm suan đah cách mạng lah trong kơl mha êng mpơl nău way di “Ngêt dak kah gĭt tu  tơm” bah Ðảng, Ngih dak đah ăp nuĭh hŏ n'groh lĕ n'hâm suan an n'gâng kan cách mạng. Kơp ntơm bah rnôk Kruanh Hồ Chí Minh sŏk nar 27/7 lah nar Tahen ơm khĭt- rmanh, 75 năm rlău aơ, lam trong kan pháp luật, trong kơl lor an nuĭh  geh n'hâm suan dơi an ƀư lam lĕ rngôch, mô dơn mpơl nău kơl mha êng bah Đảng, Ngih dak đah nuĭh geh n'hâm suan ma hôm rgop khlay tâm mât đăp mpăn rêh jêng kon nuĭh, hun hao neh dak nâp dăng.

          Đah lam rêng kơl an nuĭh geh n'hâm suan nar lơn ma dơi ăp tŏng n'hanh dơi lam trong kan chính trị râng an ƀư ăp kôp, pah kan mât chăm nuĭh geh n'hâm suan rgâl geh âk, njêng trong leo nkah gĭt n'hâm suan jru hvi, rloh rlău bah Trung ương tât ăp ƀon lan. Tât aƀaơ, lam dak năl geh rlău 9,2 rkeh nuĭh geh n'hâm suan, tâm nê geh rlău 1,3 rkeh nuĭh geh n'hâm suan dơi kơl sa prăk ăp khay. Ăp năm nkra rnoh ndơ kơl du tơ̆ an 6 tât 8 rbăn nuĭh, leo rlău 580 rbăn tơ̆ nuĭh geh n'hâm suan hăn săm way ăp năm n'hanh ntop kơl ntĭm nti an nklăp 40 rbăn tơ̆ nuĭh. Rnoh di ntop kơl an nuĭh geh n'hâm suan dơi rgâl hao tâm di đah trong tor rgâl hao rnoh prăk khay tơm.

Tĭng Nghị định mbrô 75, nar 24/7/2021 bah Chính phủ, quy định rnoh dơn prăk ntop kơl n'hanh nău way trong kơl dơh an nuĭh geh n'hâm suan đah cách mạng hŏ rgâl hao du đêt rnoh ntop kơl an ăp nuĭh dơi kơl, đah prăk kơi ntop n'hao tay nklăp 800 rmen prăk gay rgâl kơi ntop nklăp 10 trong kơl mhe an nuĭh geh n'hâm suan n'hanh rnăk wâl nuĭh geh n'hâm suan kơt: Ntop kơl prăk ôp huêng tahen ơm khĭt dơi rgâl hao ntơm bah 500.000 prăk/01 tahen ơm khĭt/01 năm hao 1.400.000 prăk/01 nuĭh tahen ơm khĭt/01 năm; rnoh kơl mât săm ta rnăk dơi rgâl hao  ntơm bah 1.110.000 hao 1.461.600/nuĭh/năm; rnoh kơl mât săm  rgum dơi rgâl hao ntơm bah 2.200.000 hao 2.923.200 prăk/nuĭh/năm…    Wa Châu Văn Đa, Kruanh jrô kan nuĭh geh n'hâm suan, Sở Lao động Thương binh n'hanh Xã hội n'gor Trà Vinh lah:

       Tĭng ƀư trong kơl dơh an nuĭh geh n'hâm suan ri Trà Vinh aƀaơ dôl mât bơi 65 rbăn nuĭh geh n'hâm suan, tâm nê rlău 19 rbăn tahen ơm khĭt, n'hanh tahen kop ji sôt rmanh lah rlău 11 rbăn nuĭh n'hanh ăp nuĭh êng ƀa ƀă. Aƀaơ, Trà Vinh dôl ntop kơl an bơi 12 rbăn nuĭh, trok kơl ăp khay tĭng trong kơl dơh đah nuĭh geh n'hâm suan đah cách mạng. Aƀaơ, tĭng quy định, Sở Lao động- Thương binh n'hanh Xã hội njuăl prăk an ăp n'gâng kan tâm dâng ndơ̆ kơl tâm nar 1 tât nar 10 n'hanh nar ngoăy nău trok kơl dơi njuăl ma bưu điện ndơ̆ n'hanh tĭng ƀư lôch bah năp nar 10 ăp khay.

Wa Hồ Thị Châu Loan, Groi Giám đốc Sở Lao động Thương binh n'hanh Xã hội n'gor Nghệ An an gĭt, n'gor aƀaơ geh rlău 68 rbăn nuĭh geh n'hâm suan, dâk tâl pe lam dak. Ăp khay prăk ngân sách ngih dak trok kơl an nuĭh geh n'hâm suan rlău 136 rmen prăk.

“Ăp năm nkhêp geh nar 27/7, n'gor an dŏng ăp trong nchrăp gay ƀư ăp nău kan nkah ndray Nar tahen ơm khĭt rmanh ta n'gor ngăn ngăn, geh nkô̆ khlay n'hanh dŭt uănh khlay đŏng. Bol ma n'gor hôm âk jêr jŏt, đah nuĭh geh n'hâm suan âk, yơn mpôl hên way nsrôih gay tĭng ƀư jăp ăp trong kơl an nuĭh geh n'hâm suan đah cách mạng, đăp mpăn ăp tŏng năn ngăch. Nkah ndray 75 năm Nar tahen ơm khĭt rmanh, ri rlău ma nău kan way ăp năm, ri năm aơ n'gor geh nău kan, nê lah mpôl hên ƀư tâm nchră mâp măt, mpư rnê nuĭh geh n'hâm suan ntoh lư ta n'gor".

        Rlău ma ăp trong kơl bah Đảng, Ngih dak, nău nsum ti bah nsum mpôl đah rnăk nuĭh geh n'hâm suan dơi mât chăm n'hanh geh âk nău kan ngăn ngăn đŏng. Dơn kơp ntơm bah năm 2011, trong leo ƀư "Nkah gĭt sĭt n'glĭng” lam dak hŏ dơn geh bơi 5.600 rmen prăk, ƀư mhe bơi 39.000 mblâm jay tâm rŏng, nkra bơi 25.000 mblâm jay tâm rŏng đah rnoh prăk bơi 13.000 rmen prăk; lam dak geh rlău 4 rbăn 100 Me Việt Nam dăng janh hôm rêh dơi ăp mpôl kan dơn mât chăm, pêt siăm dŭt nău rêh. Kêng dŭt năm 2020 geh bơi 99% rnăk nuĭh geh n'hâm suan dah mô lah rlău rnoh geh nsum bah ƀon lan ntŭk he gŭ; 98,7% xã/phường/thị trấn ƀư jăp pah kan kơl rnăk tahen ơm khĭt, rmanh, nuĭh geh n'hâm suan; nsrôih ƀư lôch jêh nău kơl jay gŭ đah nuĭh geh n'hâm suan đah cách mạng n'hanh mô hôm geh rnăk nuĭh geh n'hâm suan mpeh săk ach o. wa Nguyễn Bá Hoan, Thứ trưởng Bộ Lao động Thương binh n'hanh Xã hội an gĭt:

       “Tâm bah ri aơ  nơh, pah kan lam nuĭh kơl mât chăm, pêt siăm, săm an nuĭh geh n'hâm suan dơi ƀư jăp đŏng. Nău rgum ăp mpôl kan lam rêh jêng kon nuĭh, ăp nuĭh lŏng nuih n'hâm mât chăm nău rêh nuĭh geh n'hâm suan, mât siăm Me Việt Nam dăng janh, hôm mât chăm ntŭk tâp bôr an ăp tahen ơm khĭt đŏng, rdâk njêng ăp ntŭk nkah tahen ơm khĭt...ta du đêt ntŭk dơi an ƀư đah nău mât ŭanh bah ăp gưl n'gâng kan n'hanh ăp  nuĭh lŏng nuih n'hâm, doanh nghiệp n'hanh ăp nuĭh. Nkhêp nkah ndray 75 năm, ăp gưl n'gâng kan hŏ mât uănh, dŏng hang rhiăng rmen prăk bah Trung ương, prăk ngân sách ta n'gor hôm rgum tay bah ăp tơm prăk êng ƀa ƀă ma ntŭk kan Mặt trận Tổ quốc Việt Nam, ăp hội, ăp doanh nhân gay mât chăm, pêt mât, kơl siăm an nuĭh geh n'hâm suan đŏng n'hanh gâp  mĭn lah pah kan dja dơi uănh khlay tay n'hanh dơi ntrôl dăng tâm let năp tay”./.

Nuĭh rblang: Điểu Thân