VOV4.M’nông:   Tĭng nău mbơh “ach o âk trong Việt Nam 2021” mbra geh tay 10 rkeh nuĭh dơi geh bah ăp nău kơl n’hanh bôk nău kan rƀŏng tĭng bah Chính phủ mpeh ntop kơl kon nuĭh n’hanh n’hŭch ach o tâm lvang 2021-2025. Ndrel đah nău rƀŏng jŭt n’hŭch ach o, ngăn lah ta ăp nkual jru ngai, bah năm 2020, Chính phủ lĕ geh Bôk nău kan rƀŏng tĭng lam dak an êng nkual ƀon lan rnoi mpôl đêt n’hanh nkual yôk. Tă bah 2 năm tâm rgop đah 10 ngih pah kan, n’gâng kan nău kan, âk ntŭk ta lam dak, bôk nău kan lĕ ƀư tĭng ăp njoăt hăn khlay gay ƀư tĭng nău rƀŏng “Mô an nuĭh geh ntlơi bah kơi”.

Bah du rnăk ach o jŏ jong, rnăk yuh Lò Thị Da, ta xă Quảng Chiểu, nkuăl Mường Lát lĕ dơi ntop kơl tơm, kon ntil bah bôk nău kan n’hŭch ach o bah n’gor. Jêh 5 năm ƀư tĭng, tât aƀaơ rnăk yuh lĕ geh dĭng lĕ ndrôk rpu, sŭr djăr hao tât rhiăng mlâm, ndrel đah nĕ mir tơm sa play, du năm an geh rlău 10 rkeh prăk, jêng rnăk sâm geh bah ƀon.

        “Knơm geh nău ntop kơl bah n’gor gâp dơh oi nău rvê đah prăk, knŭng mât rong, srih tăm, dơh đŏng yor gâp mô geh prăk yơn dơi ntop kơl tơm, kon ntil. Mpeh đah kỹ thuật ri dơi kơl bah sam ƀŭt, cán bộ ntĭm kỹ thuật gay gâp ƀư tĭng”.

Đạ K’Nàng lah xă bôk năp bah nkuăl Đam Rông (Lâm Đồng) dơi kơp dơn xă rklaih ach o.

Săch rnăk rlong, ntoh lư ƀư leo lor n’hanh pơk hvi lah ngoăy tâm âk trong ma n’gor Thanh Hóa ƀư bôk nău kan rƀŏng tĭng lam dak an êng nkual rnoi mpôl đêt n’hanh nkual yôk. Wa Hà Văn Thủy, Groi Bí thư Rnâng kan Nkuăl ủy Quan Hóa an gĭt, an rgâl trong mĭn trong ƀư tâm bôk nău kan, nău nchrăp ƀư; rgum nkoch trêng, rgŏ jă, nkoch cán bộ, đảng viên ntoh lư, jăng nău mĭn kâp knơm tâm ngih dak:

“Bah năp đaơ ntop kơl an dơm, pă dơm yơn nău rƀŏng tĭng aƀaơ lah nuĭh ƀon lan an hăn ndrel đah bôk nău kan nchrăp ƀư, săch ăp nuĭh tŏng rnoh an ƀư tâm di. Aƀaơ ndơ an gay ntop kơl n’hŭch ach o an rgum ntuh kơl hun hao nkual, hun hao wăng sa rêh jêng, nta an hun hao nkra njêng nâp nâl”.

Bôk nău kan rƀŏng lam dak an nkual rnoi mpôl đêt lĕ dơi Quốc hội tă bah nghị quyết mrô 120 nar 19/6/2020. Trong tâm pă prăl lĕ dơi Ủy ban Thường vụ Quốc hội uănh an tâm nar 22/5/2022. Aơ lah bôk nău kan dŭt têh, rơh bôk năp Đảng, Chính phủ an prăk n’hanh nău uănh mĭn khlay, ndơn an hun hao nău kơl rnoi mpôl đêt tâm lvang bah năp đaơ. Tĭng Kruanh n’gâng kan chủ nhiệm Ủy ban dân tộc bah Quốc hội, aơ lah bôk nău kan dŭt n’hâm khlay đah têh hvi âk: rgum ta ntŭk 13.222 thôn dŭt jêr jŏt tâm 3.434 xă bah 51 n’gor nkual rnoi mpôl đêt. Aơ lah ăp nkual ƀon lan geh wăng sa rêh jêng jêr jŏt ngăn lam dak, geh ta 3 nkual lah Tây Nam Bộ, Tây Nguyên, n’hanh Tây Bắc. Yor nê, nău rgum lĕ rnoh nuĭh, tâm nchră đah ăp ntŭk gay uănh lah tŏng ăp, ndơ̆ an tâm nău mbơh jêh rnôk geh Nghị quyết Quốc hội lah nău ƀư roh âk năm. Kruanh n’gâng kan, chủ nhiệm Ủy ban dân tộc Hầu A Lềnh an gĭt:

“Mpeh nău tâm rgop đah ăp n’gâng kan, nău kan, êng bôk nău kan dŭt têh geh 10 nău nchrăp ƀư, 14 nău jêt nchrăp ƀư, 36 nău kan. Jêng lah 36 nău kơl, dơi rgum bah ăp nău kơl hôm e tam bah lvang bah năp. Yor nê bôk nău kan dŭt âk, geh n’ăp nău kơl mhe, geh n’ăp nău kơl ơm dôl geh tam. Yor nê nău rgum an ndâk njêng du trong di ntĭm mbơh ƀư Bôk nău kan lah nău ƀư dŭt n’hâm jêr, âk n’hanh nê̆. Yor aơ lah rơh bôk năp Đảng n’hanh Ngih dak an tơm prăk êng jêng mô an ƀư du trong thơ tha; an geh nău uănh nđôi hăn uănh nđôi tay”.

Kruanh n’gâng kan, chủ nhiêm Ủy ban dân tộc Hầu A Lênh.

 Bôl tơm prăk hôm e âk jêr jŏt yơn Quốc hội, Chính phủ lĕ ntop prăk ntuh kơl an n’hŭch ach o rlău 2 tơ̆ nkôp đah lvang bah năp, na nao ntĭm rđău gay ƀư tĭng tŏng ăp nău kơl n’hŭch ach o, nsrôih ƀư tĭng bôk nău kan rƀŏng tĭng lam dak n’hŭch ach o nâp nâl tĭng trong lĕ rngôch, âk trong n’hanh n’hŭch plơ̆ tay ach o nta an nuĭh ach o, rnăk ach o dơh gĭt ăp nu naư rêh jêng, ngăn lah ta ăp ƀon lan, nkual yôk, nkual gôl dak, rgop ƀư tĭng nău rƀŏng hao jêng wăng sa, tŏng ăp rnă njrăng rêh jêng, jêh nău rƀŏng n’hŭch rnăk ach o.

Ndơ kơl đăp mpăn nău rêh bơi 62.000 rmen prăk rdâk nkra jêh srê Covid-19, hang rbăn tấn phe ntop kơl ndal n’hanh hang rbăn rmen prăk bah tơm prăk nchrăp lor tơm prăk trung ương gay kơl ƀon lan miền Trung mkra khuch dak bŭk, phŭt sial lơh lah nău nsrôih dŭt têh, ngăch, an nuĭh ƀon lan dơi geh nău rêh, nău dơi mât uănh dak si, nău dơi rêh. Mô êng, nĕ lah ăp nău nsrôih yor nău dơi kon nuĭh bah Đảng, Ngih dak Việt Nam.

Trần Sỹ Đức VOV1/Nuĭh rblang: Y Sưng Phê Ja