VOV4.M’nông- Ôi nar 20/9, ta Hà Nội, Hội liên hiệp bu ur Việt Nam ƀư rơh rƀŭn nchră mbơh tơih nău nchrăp kan mpeh “Ƀư tĭng nău tâm ban bu ur bu klô n’hanh doh rklaih ăp nău ndal đah bu ur n’hanh oh kon se” lvang năm 2021-2025. Nău nchrăp kan geh tâm bôk nău kan nkô̆ mpŏng ngih dak hun hao wăng sa rêh jêng nkual rnoi đê̆ n’hanh gôl yôk lvang năm 2021-2030.

Nău nchrăp kan “ƀư tĭng tâm ban bu ur bu klô n’hanh doh rklaih ăp nău ndal đah bu ur n’hanh oh kon se” uănh khlăy 4 nkô̆ nău pah kan geh: mbơh tơih, rgŏ jă rgâl mhe nău mĭn, nău kan jut jăng ăp nău mô tâm di, nău tâm lah tâm rnăk vâl n’hanh ntŭk rêh jêng, ăp nău way mpeh văn hóa geh mô ueh n’hanh du đê̆ nău rêh jêng ngăch ndal đah bu ur n’hanh oh kon se. Rdâk njêng n’hanh pơk hvi ăp nău kan n’hao nău dơi mpeh wăng sa an bu ur, ntrôl an tâm ban bu ur bu klô; Mât đăp mpăn nău ngơi n’hanh tât râng ăp nău kan ngăn ngên bâh bu ur n’hanh oh kon se tâm nău pah kan hun hao wăng sa rêh jêng, uănh nđôi n’hanh mbơh nău rêh jêng, n’hao nău dơi kan an cán bộ bu ur rnoi đê̆. Nkre lah n’hao nău nău dơi ƀư tĭng pah kan ndrel an cán bộ tâm lĕ trong kan chính trị n’hanh bu ranh ƀon, nuĭh geh nău knơm tâm ntŭk rêh jêng. Tâm lvang năm 2021-2025 nău nchrăp kan 8 nău mpŏng kan 9 rbăn rmôt kan way kan ntŭk rêh jêng; 3 rbăn săm ƀŭt mpêt nkrem manh thôn ƀon, 1 rbăn ntŭk kan knơm ntŭk rêh jêng, 1.800 câu lạc bộ leo kan bâh nău rgâl mhe geh ndâk nsơm mô lah njêng mhe ta ntŭk rêh jêng.

Nuĭh rblang: Thị Đoắt