VOV4.M'nông: Nar Tết nguyên đán Nhâm Dần 2022 dôl dăch tât. Âk nuĭh kan, rnăk ach o, rnăk dơi kơl (lơn lah nkual ƀon lan nuĭh rnoi mpôl đê̆) rvê mpeh du nău Tết mô ăp tŏng, tă  khuch bah nuh srê Covid-19. Gay ăp nuĭh ƀon lan geh Tết da dê n'hanh "mô an du hê geh ndul êng bah kơi", ăp nar dja, âk nău kan mât chăm Tết an nuĭh ach o, ƀon lan nuĭh rnoi mpôl đê̆ geh nău rêh jêr jŏt dôl ƀư ăp n'gor lam dak. Ăp nklâm ndơ năm  mhe răm mƀak kơl kônh wa răm  nuih n'hâm khay năm mhe.

Tă lah tơm nuh srê lor bôk năp dŭt têh ta n'gor Dak Lak tâm kêng dŭt khay 7-2021 đah 51 nuĭh F0, buôn Ea Bhok, xã Ea Bhok, nkuâl Cư Kuin hŏ rlău ăp nar phit klach. Yơn nơm geh kơl ngăch bah n'gâng kan dak si n'hanh ăp n'gâng kan, ăp gưl n'hanh n'gâng kan kônh wa hŏ rlău dơi ăp jêr jŏt nê, plơ̆ tay đah nău kan ngăn ăp nar. Wa Nguyễn Văn Dũng, Kruanh Ủy ban nhân dân xã Ea Bhok an gĭt, tâm rnôk ƀon geh mpă wêl, n'gâng kan xã kuăl jă ăp nuĭh lŏng nuih n'hâm kơl ndơ ngêt sa an ăp rnăk ach o, rnăk geh tât khuch nuh srê COVID -19 gay khân păng ơm đăp mpăn nău rêh. Ăp trong ntop kơl dơi n'gor an ƀư năn ngăch:

Xã hŏ nsŏng kơl dăn Huyện ủy, Ủy ban ntop kơl ăp nuĭh F0 kơt nê lah 10kg phe, F1 sĭt ta ƀon lah 5kg. Ăp nuĭh dah rŏng hăn kan êng plơ̆ sĭt ri xã dôl tĭng ƀư Nghị Quyết 68 gay ntop kơl an kônh wa năn ngăch gay geh prăk gay kônh wa wăng sa tay ta ntŭk n'hanh n'gâng kan ta ntŭk nkoch trêng tay an kônh wa mô uănh lhơ, tĭng ƀư jăp nău njrăng đă ƀư 5K bah Bộ y tế.

Mô dơn êng buôn Ea, Bhok, ta lĕ rngôch ăp ƀon lan êng ƀa ƀă bah ƀon lan nuĭh rnoi mpôl đê̆ geh tât  khuch Covid-19 dơi geh ntop kơl mpeh ndơ ngêt sa, dak si dak gle da dê.....

Tết Nguyên đán Nhâm Dần 2022 dôl tât dăch, Đảng, Chính phủ, Uỷ ban Trung ương Mặt trận Tổ quốc Việt Nam dôl rđău đă ăp n'gâng kan, ăp n'gor ngăch hăn ôp uănh, rƀah gĭt nău lư rêh jêng bah ăp nuĭh dơi kơl, ƀon lan nuĭh rnoi mpôl đê̆ geh nău rêh jêr jŏt, tât khuch bah nuh srê COVID-19, geh tât khuch bah trôk nar lơh, nuh srê geh ma nău ji ngot dŭt ntŭr… gay năn ngăch ntop kơl phe, ndơ sa n'hanh nklâm ndơ, đăp mpăn ăp rnăk geh Tết hơm răm da dê. Wa Ta Rương Lương, Groi Kruanh UBND xã Hương Hữu, nkuâl Nam Đông, n'gor Thừa Thiên Huế an gĭt, ăp nar dăch Tết dŭt âk mpôl, ăp nuĭh lŏng nuih n'hâm khâl, pă nklâm ndơ Tết an ƀon lan rnoi Cơ Tu ta ntŭk:

Nău mât chăm an rnăk dơi kơl, rnăk ach o, lơn lah rnăk ƀon lan nuĭh rnoi mpôl đê̆ mâp jêr jŏt tâm rnôk Tết dja, lah rlău ma Jrô kan Lao động ri Ủy ban nhân dân nkuâl geh ăp nklâm ndơ êng, hôm Chính phủ geh nklâm ndơ êng gay pă an rnăk ach o, rnăk jêr jŏt.

Gay đăp mpăn an kônh wa lĕ dĭng nuĭh geh Tết rhơn mƀak da dê, ndrel đah nklâm ndơ bah Kruanh dak n'hanh bah n'gor Thừa Thiên Huế, UBND nkuâl Nam Đông nchrăp rlău 4,5 tấn phe n'hanh 200 nklâm ndơ, ăp nklâm ndơ 500 rbăn prăk pă an rnăk jêr jŏt. Wa Nguyễn Thanh Bình, Groi Kruanh UBND n'gor Thừa Thiên Huế an gĭt: N'gor  dŭt uănh khlay ntop kơl ăp nuĭh dơi kơl, nuĭh ach o n'hanh ƀon lan nuĭh rnoi mpôl đê̆ gay kônh wa lĕ dĭng nuĭh geh du Tết hơm răm, đăp mpăn da dê.

Tâm rnôk nô nău nuh srê tât krit nji, ăp rnăk dơi kơl, rnăk ach o n'hanh ăp ƀon lan nuĭh rnoi mpôl đê̆ mâp dŭt âk jêr jŏt mpeh ndơ ngêt sa. Mpôl hên hŏ uănh khlay gay ntop kơl năn ngăch an kônh wa tâm rnôk Tết dja. Bah meng nê n'gor hŏ n'hao âk tơ̆ ôp uănh tay ăp tŏng rnăk ach o, rnăk dơi kơl, rnăk ƀon lan nuĭh rnoi mpôl đê̆ ta A Lưới n'hanh Nam Đông n'hanh jao nău dơn kan an UBND nkuâl A Lưới n'hanh Nam Đông ngăch  ntop kơl gay kônh wa wơt du khay tết răm mƀak, đăp mpăn, ăp tŏng.

Rnôk Tết dja, rlău 53 rbăn rnăk ƀon lan nuĭh rnoi mpôl đê̆ ta 5 nkuâl mpeh yôk yang n'hanh 8 xã bah ăp nkuâl bri dâng n'gor Quảng Ngãi dơi dơn nklâm ndơ Tết. Ăp nklâm ndơ rnoh khlay 180 rbăn prăk lah dak mắm, dak ngi, bột ngọt… Aơ lah trong ntop kơl du đêt ndơ dŏng sa khlay an ƀon lan nuĭh rnoi mpôl đê̆ tâm rnôk Tết Nguyên đán Nhâm Dần 2022. Wa Nguyễn Thế Nhân, Groi Kruanh Ban Dân tộc n'gor Quảng Ngãi an gĭt, ăp rnôk Tết tât năm mhe sĭt, ndrel đah ăp nklâm ndơ bah trong kơl dja, ăp nkuâl, ăp ntŭk kan hôm nsum ti nsĭt Tết răm mƀak tât đah ƀon lan n'hanh nuĭh ach o nkual yôk prêh.

Rlău ma trong kơl dja, Uỷ ban Mặt trận tổ quốc Việt Nam hŏ kuăl jă ntop kơl nsum lĕ rngôch ăp rnăk ach o ta n'gor. Kuăl jă ƀon lan nsum ti ntop kơl nklâm ndơ Tết an ƀon lan nuĭh rnoi mpôl đê̆ n'hanh rnăk dăch kêng ach o.

Bộ trưởng, Chủ nhiệm Ủy ban Dân tộc Hầu A Lềnh an gĭt, rnôk Tết Nhâm dần năm 2022 geh nău mha êng rđĭl đah ăp năm bah năp nơh, yor âk rnăk ơm ach o, hôm ntop đah nău tât khuch têh bah nuh srê Covid-19 đŏng jêng lơn ma jêr jŏt lơn. Ntop tâm nê, năm aơ lah năm dŏng di rnoh ach o mhe, jêng rnoh rnăk ach o jêng âk lơn.

Nău khâl, pă nklâm ndơ an kônh wa rnôk Tết năm aơ lah nău kan dŭt geh nkô̆ khlay gay rgŏ jă, ntroh n'gôr, tâm pă jêr jŏt n'hanh ntop kơl an kônh wa geh Tết rhơn mƀak, đăp mpăn tĭng di nuih n'hâm rđău đă bah Đảng, Chính phủ lah mô an du hê nuĭh ƀon lan mô geh Tết.

Ta rnôk dja, âk nuĭh kan, âk rnăk ƀon lan nuĭh rnoi mpôl đê̆ ta mpeh yôk yang, ta nkual jru nkual ngai, dôl dŭt rvê lah mhâm ƀư gay geh du Tết tŏng hơm răm tâm rnôk âk jêr jŏt bah nuh srê. Wa Lê Văn Thanh, Thứ trưởng Bộ Lao động - Thương binh n'hanh Xã hội an gĭt:  

Bộ Lao động Thương binh Xã hội ndrel đah Ủy ban Trung ương Mặt trận Tổ quốc Việt Nam hŏ kan nsum gay rgŏ jă Prăk nkrem an nuĭh ach o ndrel đah ăp tơm ndơ rgop êng êng, gay mhâm ƀư ăp nuĭh ƀon lan geh nklâm ndơ da dê, bol mô ăp tŏng lĕ, yơn ma nsrôih lĕ dŭt n'hâm. Bah meng nê, Bộ hŏ đă ăp n'gor uănh khlay mât chăm an lĕ rngôch nuĭh ƀon lan ta ntŭk he geh Tết da dê, mô geh du hê ndul êng bah kơi n'hanh rgŏ jă bah ăp tơm êng êng. Lơn lah uănh khlay tât nuĭh ach o n'hanh săk nuĭh ach o, ntop kơl lam rêh jêng kon nuĭh, ăp nuĭh dja lah ăp nuĭh mô geh nău lap gay khân păng geh Tết n'hanh kơl ăp nuĭh geh du năm tết rhơn mƀak.

 Đah nău mât uănh bah Đảng, Chính phủ, Trung ương Mặt trận Tổ quốc Việt Nam n'hanh ăp n'gâng kan, rđău đă ăp n'gor, nkual ƀon têh uănh khlay tĭng ƀư jăp ăp trong kơl đăp mpăn lam rêh jêng kon nuĭh n'hanh ndơ dŏng nsum an nău rêh, mât chăm nău rêh ƀon lan, lơn lah ăp rnăk dơi kơl, nuĭh geh nău rêh jêr jŏt, geh tât khuch nuh srê Covid-19. Lôch nê, rgop kơl kônh wa ƀon lan nuĭh rnoi mpôl đê̆ lah êng n'hanh ƀon lan lam dak lah nsum wơt Tết Nguyên đán Nhâm Dần 2022 răm mƀak, đăp mpăn; gay ăp nuĭh, ăp rnăk geh Tết da dê./.

          VOV4- Nuĭh rblang: Điểu Thân