VOV4.M’nông: Ăp nar êp tết Nhâm Dần 2022, rnôk ma ăp nŭih nchrăp sĭt ma rnăk vâl gay ma tâm mâp ndrel sa tết nê lah rnôk ma ăp cán bộ, tahen Biên phòng n’gor Gia Lai lah nsum, tahen Biên phòng Ia O lah êng lŏ nsôih n’hâm tâm nkuăl n’har bri gay ƀư ueh nkô̆ nau bar ntil kan, mât njrăng bri ndrel njrăng rdâng srê Covid-19. Ndrel ma nê, rmôt kan kŏ tâm rgop nsum đah ăp gưl ủy, n’gâng kan, ăp rnâng kan, rmôt kan bah nkuăl mât chăm ân kônh wa tâm nkuăl n’har bri du năm mhe ueh lăng, đăp mpăn.

            Trong hăn nkuăl n’har bri Ia O, xã Ia O, nkuăl Ia Grai, n’gor Gia Lai ăp nar êp tết Năm mhe geh tăng ƀô kah bah kao điều tâm yan luh kao. Ndrel ăp tahen biên phòng hăn uănh njrăng trong bri tâm ăp ntŭk nduh ndăp tă bah neh chăng Bazan, hên tât tâm n’gâng mrô 25 yor Đồn Biên phòng Ia O mât. N’gâng nâp dăng tâm nkuăl neh geh n’gân tâm êp dak krong Pô Kô. Đại uý Nguyễn Đức Võ, cán bộ ƀư nau kan tă bah Rnâng kan tahen nkuăl Ia Grai tât Đồn biên phòng Ia O mbơh, aơ lah tết bôk năp păng ngai ma rnăk vâl gay ma sa tết tâm nkuăl n’har bri đah tahen:

‘Bah ăp nar gâp rêh ta aơ, nau tâm boh tâm rgop nau kan đah bar ding ri ueh ngăn ndrle tâm ban ngăn. Mpeh nau kan mât nkuăl n’har bri kŏ kơt lah njrăng rdâng srê Covid-19 tâm nkuăl aơ. Phung hên ndrel đah ăp đồng chí biên phòng pah kan tâm ban ngăn, n’ăp ma tâm nau rêh kŏ ueh đŏng. Lor ma geh hăn kan ta aơ, gâp kŏ mĭn năl nau mĭn kan ân nâp, tết ăp mra gŭ tâm nkuăl n’har bri aơ gay njrăng rdâng nau rlet n’har rih dôih, kŏ kơt lah hăn uănh njrăng gay ma mât neh ntu. Ƀư ueh nau kan gay ma tâm rnăk vâl ƀon lan nơm gŭ tâm ngih geh đăp mpăn”.

Ƀư nau mât nkuăl n’har bri ndrel njrăng rdâng srê Covid-19, tết năm aơ, mô êng rmôt biên phòng, ma rmôt mêt uănh nkuăl n’har bri hôm geh n’ăp ma cán bôk n’hao nau kan tă bah rmôt tahen ndrel dân quân tự vệ. Trung tá Vũ Văn An, Groi Kruanh Trung đội Vũ trang, ƀư nau kan tâm mrô 1, Mât njrăng nkuăl n’har bri ndrel njrăng rdâng srê Covid-19 (Đồn biên phòng Ia O) mbơh: Yor nau khuch bah srê Covid-19 tât jêr ri ma tâm âk khay ma aơ, Đồn biên phòng Ia O mro mât ân geh ăp ntŭk kan njok n’har bri. Cán bộ, tahen tâm ndơn ƀư kan măng nar, nkre njrăng rdâng srê Covid-19 nkre mât nâp neh ntu bah nkuăl n’har bri tâm nkuăl:

‘Nau kan tâm rơh dŭt năm lah phung hên rđau rmôt kan hŏ ntrŭnh ƀư ân tât ăp nŭih cán bộ tahen gay mât rnă njrăng đăp mpăn tâm nkuăl n’har bri lah nsum ndrel nkuăl njrăng rdâng ma hên ƀư nau kan. Oh nô phung hên uănh năl lah 100% cán bộ, tahen đăp mpăn nau mĭn, ƀư jêh nau kan, đăp mpăn ăp nau mât rnă njrăng tâm nkuăl n’har bri. Nkoch mbơh bonh đă ƀon lan ƀư ân rjăp nau ntrŭnh, ntrong kan bah Đảng, pháp luật bah Ngih dak, ƀư ueh nau kan njrăng rdâng srê tâm nkuăl n’har bri”.

Tâm năm 2021, Đồn biên phòng Ia O hŏ kơl rlau 100 nar hăn kan kơl an ƀon lan tuch tăm, rep kloh trong ƀon...Rơh tết tât, đah âk nŭih kan, cán bộ đồn bonh đă kơl an ma rhiăng nklâm ndơ pă ân ăp nŭih mâp nau jêr lah nŭih rnoi mpôl đê̆ tâm ăp ƀon, nŭih geh n’hâm đah cách mạng. Nkoch tât nau ŭch rŏng bah ăp tahen Đồn biên ơhòng Ia O ân an kônh wa, wa Nay Pháp, Kruanh thôn Tăng, nkoch: “Tâm xã kuăl n’har bri, oh nô biên phòng kơl an kônh wa âk ngăn, ndơn rong ăp kon se, ăp nŭih mô lăng dăng, ƀư ngih kơl an ân nŭih ach o, nŭih geh n’hâm ma cách mạng, ăp nô tahen biên phòng kơl prăk, kônh wa kơl n’hâm hăn kan.

Ăp ntŭk tahen ƀư njrăng rdâng srê, ngăn lah tâm âk khay bah năp rnôk xã geh srê, ăp nŭih pă rmôt kơl an âk ngăn, ân tât rnôk srê geh ntrŭt jăng. Lah ueh ngăn ăp đồng chí kơl an xã hên jăng bah srê. Tât năm mhe ŭch tahen biên phòng ƀư ueh lơn nau kan, kơl an kônh wa ân lơn đŏng”.

Thiếu tá Nguyễn Thanh Hà, Groi kruanh đồn Biên phòng Ia O mbơh: Tết aơ, 100% rnoh nŭih tâm ăp rmôt, ntŭk kan mô geh sĭt sa tết ma rnăk vâl. Ndơn nau kan gŭ kan njrăng tết, ăp nŭih kŏ n’hao nuih n’hâm nau kan prêh ngăn, mât njrăng ân nkuăl n’har bri tâm măng nar:

‘Tâm rơh bah năp, tâm ndrel jêh tết năm mhe, đah cán bộ Đồn biên phòng Ia O, phung hên vay ntrŭnh ƀư ăp nau rđau kan bah Rnâng kan rđau nau kan tâm nau kan lơh rdâng đah ăp phung tih dôih, ngăn lah râm rnôk bah năp tết. Phung hên vay rđau đă ăp rmôt ƀư nau kan mât rjăp nau kan tâm trôm ndrel bah dih gay geh nau kan ân năn gay ma lơh rdâng đah ăp phung tih dôih geh tât tâm nkuăl n’har bri. Rnâng kan rđau kan đồn phung hên vay rđau đă nau kan tâm nkuăl tâm rgop nsum ma n’gâng kan tâm nkuăl tâm nau kan njrăng rdâng srê. Êng nê, hên kơp ăp rnăk ach o ndrel ăp rnăk êp ach o gay geh ăp nklâm ndơ kơl an tâm rơh tết năm mhe Nhâm Dần 2022”.

Lŏ du năm tay đŏng sa tết tâm nkuăl n’har bri, yơn lah ăp nŭih tahen Đồn biên phòng Ia O hŏ nsrŭng tay nau ŭch bah săk nơm, mro mât ân nâp n’gâr phao gay ma ƀon lan nơm geh sa tết ân răm m’ak./.

            Nŭih rblang: H’Thi