VOV4.M’nông: Pơh rlau aơ, ta Ngih kan Quốc hội, Kruanh Quốc hội Vương Đình Huệ hŏ ƀư tơm nar tâm nchră đah rđau kan Quốc hội đah ăp ntŭk kan, rmôt kan bah Quốc hội, Uỷ ban Rnâng kan Quốc hội, ntrŭnh ƀư nau kan tơm tâm 6 khay dŭt năm. Tâm rơh rƀŭn, Kruanh Quốc hội Vương Đình Huệ đă ăp ntŭk kan, rmôt kan kơt tĭng nau pah kan, ƀư ueh săk tam prêh lơn tay tâm nau kan, mât tâm di nau ntrŭnh, nau kan, nkre ƀư ăp ntil nau kan tơm khlay.

            Mbơh nau bah Tổng thư ký Quốc hội, Kruanh Văn phòng Quốc hội Bùi Văn Cường mbơh, 6 khay nbôk năp ăp ntŭk kan kơl nchră, ƀư dơi 2 rơh rƀŭn Quốc hội, 6 rơh rƀŭn bah Uỷ ban Rnâng kan Quốc hội, du rơh rƀŭn ntoh măt Quốc hội pah kan du ntil ndrel ăp rơh pah kan bah Đảng đoàn Quốc hội, Uỷ ban Rnâng kan Quốc hội, Rđau kan Quốc hội đah ăp ntŭk kan, rmôt kan, nkuăl. Tâm nchră kơl ƀư jêh 50/137 nau kan ndâk njêng pháp luật tâm trong rƀŏng Bôk nau kan ndâk njêng Pháp luật năm Quốc hội gưl 15 tĭng Nau ntrŭnh mrô 19 bah Bộ chính trị. Kơl nchră jêh 2 nkô̆ nau kan tâm Bôk nau kan “Trong rƀŏng ndâk njêng ndrel ƀư jêh Ngih dak pháp quyền xã hội chủ nghĩa Việt Nam tât năm 2030, rƀŏng tât năm 2045”. Nau kan kơl nchră pah kan đah dak ba dih geh ueh, tâm di ndrel ngăch.

            Jêh geh nau djăt nau rgop, Kruanh Quốc hội Vương Đình Huệ rnê prêh tâm 6 khay bôk năm, ăp rmôt kan tâm Quốc hội hŏ nsôih têh, ndơn kơt tĭng nau dơi, nau tă geh bah năm kan bah năp nê, Quốc hội gưl XV lŏ rgâl mhe, nsôih n’hao nau kan, ntoh bah ăp rơh rƀŭn bah Quốc hội, ăp rơh rƀŭn bah Uỷ ban Rnâng kan Quốc hội, ăp rơh rƀŭn Hội đồng Dân tộc, ăp uỷ ban, ăp rmôt kan ntoh măt Quốc hội, ăp nŭih kan ntoh măt Quốc hội, nau tâm rgop kan đah Quốc hội, Kruanh dak, Chính phủ, MTTQ Việt Nam, Ngih phat dôih ƀon lan gưl prêh, Viện kiểm sát ƀon lan gưl prêh, Kiểm toán Ngih dak, ăp ntŭk kan, rmôt ƀư nau kan tâm ntrong kan chính trị.

            Ngăn lah, êng nau ƀư jêh nau kan tĭng nau nchrăp, Quốc hội nkre tŏng ƀư ăp nau kan mhe, ntoh luh geh âk nau ntoh lư, rmôt kan têh, nâp, blau, săk tam geh n’hao âk tâm ntrong kan ndâk njêng pháp luật, uănh, ntrŭnh ăp nau kan bah neh dak, nau kan tâm nchră đah dak ba dih, ƀư ueh tâm trôm ndrel bah dih. Nau rđau đă, ntĭm mbơh Hội đồng nhân dân geh nau dơi ueh. Nau kan ƀon lan tât kơl an kŏ geh rgâl mhe, n’hao nau kan bah ăp rmôt kan geh tât:

            ‘Đảng đoàn Quốc hội, Uỷ ban Rnâng kan Quốc hội, ăp ntŭk kan hŏ ƀư ân rjăp nau rđau đă bah Bộ chính trị, Ban bí thư, năn ƀư n’hêl, rjăp ngăn ăp nau ntrŭnh bah Trung ương, ăp nau ntĭm mbơh bah ăp ntŭk kan Trung ương, tŏng dơi nau ndâk njêng ndrel hun hao bah neh dak, tâm nau kan tăch rgâl, rêh jêng, neh dak, đăp mpăn tâm nchră ma dak ba dih, ngăn lah nau kan bar ntil kan nơm lah lŏ njrăng rdâng srê ân đăp mpăn ueh, geh nâp srê Covid-19 ndrel ndâk nau kan hun hao văng sa, rêh jêng. Nau aơ geh nau dơi rgop âk ngăn geh nau dơi bah Quốc hội dak nơm”.

            Kruanh Quốc hội mbơh, nau ntrŭnh ƀư ăp nau kan bah Trung ương, Bộ chính trị, Ban bí thư ndrel nchrăp, ndâk ăp nau mbơh bah Đảng đoàn Quốc hội đah ăp nau ntrŭnh, bôk nau kan bah Trung ương geh ăp Trung ương, N’gâng kan Chính trị, Ban bí thư rnê prêh n’ăp ma nau nâp ndrel nau ngăch, mbâl, geh nau kơl nchră, geh nau nâp ueh.

            Mpeh nau ƀư nau kan tâm rơh tât, Kruanh Quốc hội Vương Đình huệ đă ăp ntŭk kan, rmôt kan kơt tĭng nau kan, ƀư ueh nau tă geh dơi ân prêh lơn tâm nau kan, mât đăp mpăn nau dơi, nau kan, nkre ƀư rjăp nkre tơm khlay, kan nâp, der ntoch jong du đê̆ nkô̆ nau kan.

            Ngăn lah, ân n’hao nau tâm rgop tâm trôm, ăp nau kan geh dơi, tiểu ban tĭng nau blau, săk tam, ƀư ân ueh nau kan n’hêl gay ma mât ân tâm dăch nau kan bah Đảng đoàn Quốc hội, bah Uỷ ban Rnâng kan Quốc hội.

            Tâm ban nau nchrăp ƀư ơm rơh rƀŭn n’gul năm, Kruanh Quốc hội ntoh nay đă ăp ntŭk kan ân geh ndal ƀư ăp nkô̆ tĭng Bôk nau kan ndâk njêng luật, pháp lệnh năm 2022, mât tâm dăch nau rƀŏng lôch gưl kan tĭng Nau ntrŭnh mrô 19- KL/TW bah Bộ chính trị, ntrŭnh ƀư ăp nkô̆ nau kan mêt uănh bah Quốc hội ndrel Uỷ ban Rnâng kan Quốc hội năm 2022 ndrel lăp tâm bôk năm 2023, tĭng uănh nau ntrŭnh ƀư ăp nau ntrŭnh bah Quốc hội, Uỷ ban Rnâng kan Quốc hội...

            Êp nê, ƀư ueh ăp nkô̆ nau ân rơh ôp nau, ơh nau ôp tâm bôk khay 8, ƀư ân ueh rơh rƀŭn đah rmôt ƀư blau du nau kan gay ma kơl mbơh nchră nau kan tâm ntŭk tâm nchră văng sa 2022./.

Nŭih rblang: H’Thi