Ntoh nau tâm bôk nau kan, Kruanh Quốc hội Vương Đình Huệ ân lah, ndrel nsum ty, nsum n’hâm đah rmôt kan tâm nau njrăng rdâng ŭnh sa ndrel kơl an nŭih mâp rmanh lah nau râng bah âk mpưm kơn ƀon lan. Ntoh ngăn kơt: Rmôt mpuh n’hât ŭnh sa ndrel kơl an nau mâp rmanh bah nkuăl têh Lạc Dương, n’gor Lâm Đồng đah nuih n’hâm kan, kơl an lôch n’hâm bah nau kơl mpuh n’hât ŭnh sa, kơt nô Nguyễn Hữu Đốn hŏ janh, khŏt săk nơm rnôk kơl an nŭih ŭnh sa tâm nkual ƀon têh Phan Thiết, n’gor Bình Thuận mhe aơ; rmôt kơl an FAS Angle đah nau kan “kơl nŭih lah nau rêh” hŏ kơl an ma rbăn nŭih tâm rnôk ŭnh sa hô êp aơ ta Phường Khương Đình, Quận Thanh Xuân, Nkuăl ƀon têh Hà Nội...Aơ lah ăp nau kan ueh, rêng ngăn nuih n’hâm janh ơm “ŭch rŏng nŭih kơt ŭch rŏng săk nơm” bah rnoi nơm.

Tâm bôk nau kan aơ, rnê ăp nŭih ƀư kan ueh, nau kan janh, ăp nau ueh bah rmôt ndrel ƀon lan tâm nau njrăng, rdâng ŭnh sa ndrel kơl an ndrel nkah ăp nŭih geh khuch, nkah cán bộ, tahen ndrel ƀon lan janh, chuêl săk nơm kơl an mpuh ŭnh sa, kơl nŭih tâm rơh rlau aơ.

Tâm rơh tât nau kan ŭnh sa, rtoh, nau khuch mra hôm âk ơm, jêr rdâng, ngăn lah ăp chung cư, ngih gŭ âk rnăk, ngih ƀon lan nkre gŭ nkre ƀư kan ê nkra, tăch rgâl, chợ, ntŭk rgum âk nŭih. Tĭng Kruanh Quốc hội, nau aơ ŭch rmôt cảnh sát mpuh n’hât ŭnh sa ndrel kơl an nŭih ndrel ăp gưl, ăp ntŭk ân geh nchrăp, ƀư rjăp nâp, tâm ban dơi ndrel geh nau khoa học ngăn đah nau kan aơ. Kruanh Quốc hội Vương Đình Huệ lah:

‘Ân geh uănh khlay nau kan njrăng, sŏk nau njrăng rdâng lah nau kan tơm, ntơm bah nê n’huch rnoh ŭnh sa ndrel geh nau khuch yor nau ŭnh sa ƀư, ngăn lah mpeh kon nŭih, mât nau rêh bah nŭih ƀon lan lah nau mât đăp mpăn kon nŭih, lah nkô̆ nau prêh ngăn gay ma mât nau đăp mpăn, hun hao neh dak, mât ndrel mât ueh ăp nau dơi gay ma đăp mpăn nau geh njrăng rdâng ŭnh sa ân ăp ntŭk, ăp nkuăl ƀon lan, tă bah ăp rnăk vâl, ntrŭt dăng nau kan ntĭm mbơh, nkoch nau, nkoch mbơh jru, ngăn, vay ƀa ƀơ đah nau gĭt tât pháp luật, ntĭm mbơh mpeh nau blau njrăng rdâng ŭnh sa, ngăn lah nau rdâng đah nau tât bah ŭnh sa ân ƀon lan, săk tam nau kan “puăn ta ntŭk” (rđau ta ntŭk, rmôt kan ta ntŭk, ndeh dŏng ta ntŭk, ndơ dŏng ndrel nau geh dơi ta ntŭk), ndâk ndrel pơk rêng hvi nau kan, nau ƀư kơt: Rmôt nŭih ƀon lan râng đăp mpăn mpuh n’hât ŭnh sa, ntŭk ŭnh sa geh âk nŭih; bonh đă nŭih ƀon lan n’hao nau nkah njrăng, ƀư rjăp nau kan njrăng, rdâng năn ndrel ƀư ueh nau njrăng rdâng ŭnh sa, rtoh du trong ueh ngăn”.

 Êp nê, ƀư nau kan mêt uănh, njrăng ân ueh ăp nau đăp mpăn ŭnh sa tâm lam dak, ngăn lah đah ăp nkuăl ntŭk geh nau rtoh ŭnh sa hô, lŏ kơp uănh ăp nau ntrŭnh mpeh pháp luật tâm nau ndâk njêng, ê nkra, ntop ân năn, tâm ban, geh nau dơi đah ăp nkô̆ nau, nau ntrŭnh mpeh mpuh n’hât ŭnh sa.

Kruanh Quốc hội nkah, ân geh năn rnê nkhôm, bonh đă, pơk rêng hvi ăp nŭih geh nau jang, nau blau, nau ntoh lư, nkre n’hao nau kan mêt uănh, mêt njrăng, năn saơ, rgâl nkra, rklaih nâp ăp nau tuh tâm nau kan mpuh n’hât ŭnh sa ndrel nau kơl an nŭih mâp khuch, mâp rmanh.

Di rnôk aơ, Kruanh Quốc hội Vương Đình Huệ kuăl jă ăp gưl kan, ăp ntŭk kan, rmôt kan ndrel ƀon lan n’hao prêh lơn nau mĭn, nau gĭt nau kan mpeh mpuh n’hât ŭnh sa ndrle njrăng rdâng, kơl an nŭih mâp rmanh, khuch, uănh aơ lah nau kan khlay, ƀa ƀơ, mô dơi geh tha tha, uănh lhơ, ăp nŭih ƀon lan, rnăk vâl ân kơt tĭng rjăp ăp nau ntrŭnh bah pháp luật mpeh nau mpuh n’hât ŭnh sa ndrel njrăng rdâng ŭnh sa./.