VOV4.M’nông: Tâm nar rƀŭn tal 8. Uỷ ban Rnâng kan Quốc hội hŏ rgum tâm nchră ndrel tâm ban nau đah nau kan ân geh ntrŭnh ƀư nau kan, nau dơi bah Rnâng kan nŭih ntoh măt gay tŏng dơi nau ŭch rgâl mhe bah ntŭk kan, nau săk tam bah nau kan Quốc hội, ăp ntŭk kan bah Quốc hội.

            Tâm ban nau đah ăp nau ntop tay nau dơi bah Rnâng kan ntoh măt mpeh nau kan Hội đồng nhân dân, nau săch ntop nau kan geh tât nau dơi bah  Uỷ ban Rnâng kan Quốc hội gay ƀư ân rjăp lơn tay nau dơi bah Rnâng kan ntoh măt, du đê̆ nau đă ân geh mbơh pă kloh nau kan, nau dơi bah Rnâng kan nŭih ntoh măt đah nau dơi bah ăp ntŭk kan, rmôt kan geh tât gay ma der nau tâm nkăng, tâm kơt.

            Tâm nchră mpeh nau kan Rnâng kan nŭih mntoh măt tâm rgop nsum đah Uỷ ban kơl tâm nchră, kơl nau kan bah Uỷ ban Rnâng kan Quốc hội tâm nau rgop nau đah nau nhŭp, kân, leo mhal nŭih ntoh măt Quốc hội, uănh ntŭk gŭ, ntŭk pah kan bah ntoh măt Quốc hội đah ăp nŭih kan Quốc hội geh nau tih tĭng Kruanh Uỷ ban ăp nau rêh jêng bah Quốc hội Nguyễn Thuý Anh ri aơ lah nau dơi bah Uỷ ban Tư pháp:

            ‘Nau khám uănh, nhŭp kân nŭih ntoh măt, Uỷ ban Tư pháp ân geh mêt uănh tâm di nau ntrŭnh, nau kan nê đŏng lah mô. Nau nhŭp kân ân geh tâm di đah nau ntrŭnh bah pháp luật đŏng lah mô. Nê lah nau kan bah Uỷ ban Tư pháp yơn mô di bah Rnâng kan ntoh măt”.

            Uỷ ban Rnâng kan Quốc hội ân lah, nau ntop tay nau kan, nau dơi mbơh ba lơ nê tâm nau nchrăp nau ntrŭnh lah tâm di đah nau ngăn ndrel ŭch geh nau đă đah nau kan cán bộ. Nkre tâm ban gay ma đă Rnâng kan ƀư nau kan nŭih ntoh măt ân geh ƀư tơm tâm nau kan aơ gay tâm di đah nau đă mpeh nau kan cán bộ ndrel nau ndal bah nau kan aơ geh tĭng nau ntrŭnh bah pháp luật mpeh tố tụng. Ăp nŭih kan bah Uỷ ban Rnâng kan Quốc hội kŏ đă, ntop tay du đê̆ nkô̆ nau kơl tâm nchră mbơh, ƀư nau kan geh tât nau mât đah cán bộ ndrel ntoh măt Quốc hội ƀư du nau kan, ntrŭnh, ntĭm ndrel ƀư nau kan rnê nkhôm, ƀư nau kơl an ndrel ăp nau dơi êng gay đăp mpăn đah nŭih kan Quốc hội ân tâm di.

            Kruanh Quốc hội Vương Đình Huệ đă, ân geh ntrŭnh ân kloh nau kan, nau dơi ndrel ƀư kloh nau dơi bah Rnâng kan ntoh măt tâm ăp nau kan, ngăn lah nau kan ntoh măt ntơm rnôk geh săch kan Quốc hội ân tât rnôk ntoh măt geh rlu ranh:

            ‘Nau săch kan ta aơ ntrŭnh kloh Rnâng kan nŭih ntoh măt kơl kan ân Hội đồng săch kan neh dak ndrel Rnâng kan Quốc hội moh nau? Kơp uănh tay moh Rnâng kan ƀư tơm, moh nau gay tâm rgop? Đah nau kơl, nau ntrŭnh bah ntoh măt Quốc hội ndrel cán bộ ƀư nau mât nau kan bah Uỷ ban Rnâng kan Quốc hội? Nau kan cán bộ gâp ŭch lah kơp n’ăp ma rnôk mhe ndâk, rơh rƀŭn bôk năp ndrel jêh aơ ân geh jao du ntrong ân Rnâng kan ntoh măt. Ăp Uỷ ban bah Quốc hội, Hội đồng dân tộc, ăp uỷ ban ƀư nau kan tĭng ăp nau ntrŭnh cán bộ mât uănh, ntrŭnh moh nau kan”.

            Kŏ tâm rơh rƀŭn tal 8, Uỷ ban Rnâng kan Quốc hội, ăp ntoh măt hŏ rgop nau mpeh nau nchrăp nau ntrŭnh rgâl Nau pah kan bah Uỷ ban Rnâng kan Quốc hội. Ăp ntoh măt tâm ban đah 3 rmôt nau rđau nau kan rgâl nkra nau ƀư gay tŏng dơi nau ŭch rgâl mhe mpeh nau kan, n’hao nau nâp, săk tam nau kan bah Quốc hội, ăp ntŭk kan bah Quốc hội. Ăp ntoh măt đă nau kan rgâl mhe nau pah kan bah Uỷ ban Rnâng kan Quốc hội tâm di đah nau kan mhe nsum bah lam ntrong kan chính trị, ntrŭt dăng nau ntrơn rgâl mhe, ndâk Quốc hội điện tử, tŏng dơi nau ngăch, nau săk tam tâm rnôk tât ndal, bah năp ăp nau tât ê geh nau tă geh kơt lah srê Covid-19...Êp nê, ân geh kơp uănh ân kloh nau mĭn lah mô geh kâp ntrŭnh nau dơi mhe bah Uỷ ban Rnâng kan Quốc hội ma knŭng ntrŭnh nau ân ƀư kan lor, nau kan ân n’hêl ƀư ăp nau dơi hŏ tă dơi geh tă ntrŭnh ƀư tâm ăp luật pháp lệnh, nau ntrŭnh đă bah Quốc hội, Uỷ ban Rnâng kan Quốc hội./.

Nŭih rblang: H’Thi