VOV4.M’nông: Pơh rlau aơ, di nar pah kan bôk năp bah năm mhe Nhâm Dần, Kruanh Quốc hội Vương Đình Huệ ndrel ăp rđau kan Quốc hội hŏ mâp măt, jao nau kan ân ăp ntoh măt Quốc hội ƀư nau kan, cán bộ, công chức, viên chức ndrel nŭih pah kan bah Ntŭk kan Quốc hội. Ntoh nau tâm nar mâp măt, Kruanh Quốc hội Vương Đình Huệ lah rjăp, nau ŭch nâp dăng, ŭch hun hao, nau mĭn nsôih bah rnoi mpôl, kâp rnơm tâm ăp nau rgâl mhe bah nau kan, tâm nê geh nau rgâl mhe mpeh nau ƀư.

            Tâm nar mâp măt, Kruanh Quốc hội Vương Đình Huệ hŏ mbơh mpeh nau hăn khâl Tết năm mhe bah Kruanh Quốc hội ndrel rmôt kan tâm 6 n’gor mpeh ba dâng ndrel ăp nau kan bah ăp Groi Kruanh Quốc hội. Ân lah, năm rlau aơ, đah âk nau kan, nau rvê tơn bah nau mbơh ngăch bah ăp Uỷ viên Uỷ ban Rnâng kan Quốc hội, ƀon lan, cử tri kơp dơn, rnê prêh nau kan bah Quốc hội. Ăp ntoh măt Quốc hội, cán bộ, công nhân viên chức ntŭk kan Quốc hội geh nau ntô̆ n’hao mpeh nau tă geh aơ, yơn mô dơi thơ tha, mô dơi ŭch đah ăp nau nơm tă dơi geh.

            Kruanh Quốc hội mbơh, năm 2022 lŏ lah năm geh nau khlay, năm tơm ƀư nau ntrŭnh bah Trung ương, ăp nau ntrŭnh bah Quốc hội. Rđau kan Đảng, Ngih dak, cử tri, ƀon lan dŭt ŭch ngăn ndrel lŏ mpŏng tâm ăp nau kan bah Quốc hội, ri ân geh nchrăp nau mĭn, nau kan, ăp nau tât ndal, jêng ăp nau ueh mhe gay ma tŏng dơi nau ŭch bah nau rêh:

            ‘Wa Hồ lah, Quốc hội nơm lah ntoh ân nuih n’hâm tâm rnglăp lam rnoi mpôl ndrel nau ŭch snôih ngăn bah rnoi mpôl Việt Nam. Nau mpŏng nâp nâl, nau mpŏng mpeh hun hao, nau ŭch nâp dăng bah rnoi mpôl, ân geh kâp rnơm tâm ăp nau mhe bah nau kan, tâm nê geh nau rgâl mhe nau ƀư. Ri ma, nau kan, nau dơi bah Quốc hội hôm âk ngăn. Mhâm ƀư ân geh du ntrong kan pháp luật mpeh nau tâm ban, tŏng, tâm di, mbơh kloh rah vah, nơih dŏng. Mpeh nkô̆ nau ân geh tŏng dơi nau ŭch ndâk njêng neh dak hun hao ngăch, nâp nâl lơn ndrel tâm rnglăp lam ntur neh jru nâp lơn tay. Nê lah nau ma nơm dôl ma rvê. Ăp ntoh măt Quốc hôi, cán bộ, công chức, viên chức, tâm âk nau kan êng êng ân geh mĭn nau aơ. Phung he ân geh ndâk pháp luật, ndâk ntrong kan gay ma njêng ân nau hun hao”.

            Kruanh Quốc hội Vương Đình Huệ đă, mpeh nau kan mêt uănh, jêh ba kơi tết năm mhe, ăp Kruanh rmôt kan ân geh mêt uănh gay ma ƀư 4 nkô̆ nau bah Quốc hội nchrăp luh, nkre ƀư kơp 107 nau kan tâm Bôk nau kan bah Đảng đoàn Quốc hội ƀư nau ntrŭnh Đại hội XIII bah Đảng ndrel 137 nau kan ndâk njêng pháp luật tĭng nau ntrŭnh 19 bah Bộ chính trị ndrel Bôk nau rƀŏng nau kan ndâk njêng pháp luật năm kan Quốc hội gưl XV. Lah rjăp du tơ̆ tay nau săk tam bah nau kan mêt uănh bah Quốc hội gay đăp mpăn ngih dak pháp quyền xã hội chủ nghĩa bah ƀon lan, yor ƀon lan, tĭng Kruanh Quốc hội Vương Đình Huệ, nŭih ƀon lan ân geh dơi ăp nau geh bah hun hao văng sa, rêh jêng, bah rgâl mhe. Êp nê, ăp nau ntrŭnh bah Quốc hội mpeh ăp nau kan khlay bah neh dak ân geh ndơ̆ nau dơi bah neh dak, nau dơi bah rnoi mpôl hao klơ ndrel ƀư lor.

            Đah nau kan nsôih ƀư nau khlay bah neh dak, Kruanh Quốc hội Vương Đình Huệ nkah, ăp nau ntrŭnh bah Quốc hội, nau kan khlay bah neh dak ân geh ndơ̆ nau dơi bah neh dak, rnoi mpôl hao lor, ba lơ. Tâm nau geh jêng bah neh dak, rnoi mpôl gay nơm ƀư nau kan, uănh, leo nau ntrŭnh, nau geh jêng bah neh dak, rnoi mpôl geh nau dơi bah ƀon lan ndrel ntŭk kan.

            Kruanh Quốc hội Vương Đình Huệ rnơm lah, đah nau ơm ueh ang 76 năm rlau aơ bah Quốc hội Việt Nam, ăp nau tă geh dơi bah Quốc hội gưl XV hŏ dơi geh tâm năm bôk năm bah nau kan, ăp ntoh măt Quốc hội, cán bộ, công nhân viên chức ntŭk kan Quốc hội mra lŏ tâm rnglăp du nuih n’hâm, ƀư ueh nau blau bah rmôt kan, gay ƀư jêh nau kan geh Đảng, Ngih dak, ƀon lan jao, rgop nau ndâk njêng neh dak Việt Nam nar lơn nâp nâl, ƀon lan lơn hơm răm, đăp mpăn, tâm di đah nau ŭch rnơm bah Đảng, Ngih dak, cử tri ndrel ƀon lan./.

Nŭih rblang: H’ Thi