Ăp ntoh măt hŏ tâm nchră ta rmôt mpeh nau nchrăp nau ntrŭnh rlong ƀư nau đê̆ nau kan, nau kơl an hun hao nkuăl ƀon têh Buôn Ma Thuột, n’gor Dak Lak. Ăp ntoh măt tâm ban mpeh nau ntrŭnh rlong ƀư du đê̆ nau kan, nau kơl ân hun hao nkual ƀon têh Buôn Ma Thuột, yor aơ lah nkuăl ƀon têh tâm nklang nkuăl Tây Nguyên, tâm nthoi đah ntŭk hun hao bah Nam Trung Bộ, Đông Nam Bộ ndrel pe dak hun hao bah Lào, Việt Nam, Campuchia, geh n’hâm rêng mpeh văng sa, văn hoá, ndrel geh ntŭk kan khlay mpeh văng sa rêh jêng, rnă njrăng nkuăl Tây Nguyên ndrel lam dak. Wa Trần Văn Tiến, rmôt kan ntoh măt Quốc hội n’gor Vĩnh Phúc lah kloh:

            ‘Nau ntrŭnh nau kan bah Quốc hội rlong du đê̆ nau kơl an ân hun hao nkuăl ƀon têh Buôn Ma Thuột lah nau khlay, gay ntrŭt dăng nau ndâk Buôn Ma Thuột lah nkuăl tơm bah nkuăl Tây Nguyên ndrel lah nau nsôih gay ma hun hao văng sa, rêh jêng bah nkuăl Tây Nguyên, aơ lah nkual geh ntŭk ƀư nau kan khlay, tâm nau mât neh dak đăp mpăn ndrel lah nkuăl geh âk nŭih rnoi mpôl đê̆ gŭ rêh, yơn nau văng sa rêh jêng hôm mbrơi hun hao ri ma ân geh du ntrong kan ân êng gay ma ntrŭt dăng hun hao văng sa rêh jêng bah nkuăl aơ hun hao”.

            Wa Lê Ngọc Hải, rmôt kan ntoh măt n’gor Dak Lak lah rjăp, rnôk aơ Buôn Ma Thuột hôm mô tŏng âk ntŭk ntu gung trong kan, ndri ma nau ntrŭnh kơl ân pơk luh nau kơl êng, rgâl mhe gay rgum tơm prăk ntuh kơl ân nkuăl aơ:

            ‘Nau kơl an ân ăp ntŭk kan tăch rgâl, yor nau tâm nthoi gung trong lah nau jêr, ri ma nau kan ăp ntŭk kan tăch rgâl pah kan tâm ăp nkuăl Tây Nguyên kŏ kơt lah nkuăl ƀon têh Buôn Ma Thuột lah nau mô dăng, ndri ma gâp mĭn ân geh kơl prăk soay ân ăp ntŭk kan ƀư kan tăch rgâl tât kơl ăp nŭih rnoi mpôl đê̆ bah  Tây Nguyên gay ma hun hao văng sa rêh jêng ân ueh. Kŏ kơt lah ân geh nau mât nau rgum ndrel ma kơl an ăp nŭih kan khoa học gay geh nau dơi ngăn ân nau rgum ndâk njêng nkuăl ƀon têh ân ueh”.

            Ăp nau rgop ân lah, ăp nkô̆ nau geh tât ăp nau kan mpeh tơm prăk, nau ƀư, ntuh kơl geh nkah kloh, yor geh du đê̆ nkô̆ ê tâm di đah nau nsum. Kơt mpeh kơl an soay, rnôk aơ dôl geh nau kơl mpeh rnoh soay đah ăp ntŭk ƀư nau kan ndrel nŭih pah kan tâm nkuăl jêr jŏt, jêr jŏt ngăn, yơn rnôk tĭng dŏng nau kơl an tâm nau ntrŭnh aơ ri uănh tâm n'gor Dak Lak lŏ kơl an ntŭk hun hao ngăn, ăp nkuăl mô geh kơl. Ndri ma ân geh nau nkah ân đăp mpăn nau dơi, tâm ban tâm nau ntrŭnh bộ luật yor Quốc hội ntrŭnh. Lah rjăp ân geh nau rgum đah nŭih ƀư nau kan prêh ân Buôn Ma Thuột. Wa Đỗ Tiến Sỹ, Rmôt kan ntoh măt Quốc hội n'gor Hưng Yên, ân lah:

            ‘Nau ntrŭnh ƀư tâm 5 năm tĭng gâp mra dơi geh nau ông nklăp 7 tât 10 năm, yor nê lah nkuăl geh nau khlay ngăn kơt nau ntrŭnh mrô 67 bah Bộ Chính trị. Nau êng đŏng lah nau kơl an đah ăp nŭih kan khoa học nau dơi ueh khlay pah kan tâm ăp ntŭk kan du ding, tâm rơh ƀư nau ntrŭnh aơ geh mô kâp soay săk nơm tâm 5 năm. Tĭng gâp gay ân geh nau dơi ngăn ri kŏ ân kâp nklăp 10 năm gay ma njêng nau ueh lơn”.

            Lah rjăp, đah 4 rmôt kơl an geh ndŏ luh tâm nau ntrŭnh mpeh nau kan kơl an an nkuăl ƀon têh Buôn Ma Thuột, wa Nguyễn Tuấn Anh (rmôt Long An) ân lah, lah nau ntrŭnh aơ geh Quốc hội nchră, aơ mra lah rơh bôk năp Quốc hội ntrŭnh nau kơl an ân du nkual ƀon têh lah rmôt kan hành chính gưl nkual, ri ma ăp ntoh măt ŭch đă, ntoh măt Quốc hội kŏ kơt lah cử tri mra mĭn, uănh, ntop gay ma ndâk du nau kan ân hun hao ân nkuăl êng. Êng 4 rmôt ƀư kan hŏ geh ndŏ tâm nau ntrŭnh, wa Nguyễn Tuấn Anh đă Rnâng kan gay nkah tay du đê̆ nau đă bah cử tri nkuăl ƀon têh. Ngăn lah, jao ân HĐND nkuăl ƀon têh geh nau pă tơm prăk gay ma dŏng n’hao ntop ân công chức, viên chức tâm ntŭk mât Ngih dak, ƀư kan chính trị rêh jêng ndrel rmôt ndâk njêng nau kan yor nkuăl ƀon têy mât tĭng nau săk tam bah nau kan, geh trok prăk ntop tĭng nau ntrŭnh bah pháp luật rnôk aơ mpeh nau geh dŏng tơm prăk đah ntŭk kan hành chính, ntŭk kan ngih dak. Nau kan aơ tâm ban kơt Quốc hội ân ƀư tâm nau ntrŭnh mrô 54 năm 2014 mpeh nau rlong ƀư nau kan kơl an hun hao nkuăl ƀon têh Hồ Chí Minh.

            Tâm ban đah 4 nau kơl an ân nkuăl ƀon têh Buôn Ma Thuột, wa Lê Tấn Tới (rmôt kan bah n’gor Long An), kruanh Uỷ ban neh dak đăp mpăn, kŏ đă ntop nau kơl gay n’hao nŭih kan mpeh neh dak đăp mpăn ân nkuăl ƀon têh yor Buôn Ma Thuột tâm nkuăl Tây Nguyên, tâm rnôk Tây Nguyên geh nau kan neh dak mô êng mpeh ba dâng ma hôm mpeh ba lơ bah neh dak, ndri ma nau kơl an hun hao văng sa rêh jêng bah Buôn Ma Thuột lah nau khlay, yơn ân geh tam rgop hun hao văng sa ndrel neh dak đăp mpăn, yor geh nau mât dơi đăp mpăn mơ dơi hun hao văng sa. Ndri ma, wa Tới đă ân geh n’ăp nau kơl an đah rmôt công an, tahen, biên phòng tâm nkuăl nê./.