VOV4.M’Nông- Pơh ba năp nơh, kruanh Quốc hội Vương Đình Huệ lĕ leo rơh pah kan đah n’gâng kan Tài nguyên n’hanh môi trường mpeh nău rgâl mhe, ntop tay Luật neh ntu. Kruanh Quốc hội pă an Ủy ban wăng sa bâh Quốc hội mbơh ôp nău ƀư tĭng ăp trong kan đah rdaka njêng nău nchrăp kan Luật neh ntu rgâl mhe, tâm nĕ geh nău sŏk tâm rgop bâh ƀon lan tĭng nău ntrŭnh bâh pháp luật.

Mbơh tơih ta rơh pah kan, kruanh n’gâng kan Tài nguyên n’hanh môi trường Trần Hồng Hà an gĭt, nău nchrăp dôl geh sŏk nău tâm rgop ăp nuĭh geh nău tât geh rdâk njêng bâh nău uănh tĭng Nghị quyết 18, ăp Nghị quyết, nglôch lôch êng gay ma ƀư lôch ueh tŏng ăp, ngăch ndăn ăp nău mĭn, nău ntrŭnh bâh Đảng mpeh nău mât uănh n’hanh dŏng neh ntu, mât đăp mpăn ndơn kan, nău đăp mpăn ueh lăng bâh lĕ trong kan pháp luật, rgâl mhe, ntop tay ăp nău ntrŭnh gay ma n’hao rnoh kan neh ntu n’hanh ndâk nkra ăp nău kŏ khan, mô dơi kan tâm nău kơl, pháp luật lĕ geh ngluh nchŏng tâm ntrong kan nglôch lôch Nghị quyết mbrô 19-NQ/TW n’hanh ƀư tĭng Luật neh ntu.

Tâm rnôk rdâk njêng nău nchrăp Luật, n’gâng kan lĕ leo kan uănh nđôi rlău 100  luật, kôp luật geh tât trong kan neh ntu gay ma dăn đă rgâl mhe dâl tâm Luật aơ mô lah dăn đă rgâl mhe ăp luật geh tât gay ma mât đăp mpăn nău dơn ngoăy, tâm ban bâh lĕ trong kan pháp luật tĭng di nău mĭn kan bâh Nghị quyết mbrô 18-NQ/TW. Ê lor sŏk nău tâm rgop dăn tâm rgop nău bâh 63 n’gor, nkuăl ƀon têh, ăp n’gâng kan, ntŭk kan, lĕ pah kan đah ăp n’gâng kan tơm prăk, rdâk njêng, tuch tăm n’hanh hun hao ƀon lan, mât uănh trong hăn, Nội vụ.

Lôch geh djăt ăp nău tâm nchră, kruanh Quốc hội Vương Đình Huệ mbơh na nê̆, nău nchrăp kan Luật neh ntu (mhe rgâl) lah nău nchrăp kan luật dŭt têh, dŭt khlăy, têh hvi trĕ lam ntŭk, geh gŏ tât âk nuĭh kan, ntŭk kan, n’gâng kan leo kan. Đah ntŭk kan, nău kan nĕ, tâm ba năp nơh, nău nchrăp an nău uănh n’hêl an tâm rgop nău đah nău nchrăp Luật aơ lĕ geh ƀư ngăch ndăn, dơn kan na nê̆.

Kruanh Quốc hội Vương Đình Huệ dăn đă, nău nchrăp Luật neh ntu dŭt khlăy an geh rdâk njêng di đah nău ŭch kan bâh luật, ƀư tĭng nău nchrăp nchrăp kan luật, chính phủ ndơ̆ săm ƀŭt pah kan nchrăp Luật tât ăp ntŭk kan Quốc hội ta năp nar 1/9 gay ma mĭn uănh, an tâm rgop nău ta rơh rƀŭn nchră Ủy ban rnâng kan Quốc hội.

Mpeh sƀ hồ sơ nchrăp kan luật, kruanh Quốc hội dăn đă, n’gâng kan Tài Nguyên môi trường an geh rgum tay lơn tâm nău rdâk njêng mbơh tơih uănh năl nău tât mpeh wăng sa, rêh jêng, ntŭk gŭ rêh, rnă njrăng, mât ngih dak, ntŭk pah kan tăch rgâl, uănh nđôi trong kan pháp luật geh tât n’hanh nău nchrăp ăp Nghị định ntĭm mbơh luật neh ntu. Ăp nău mbơh tơih aơ dŭt khlăy, lah ntŭk kan uănh năl an nău pah kan lập pháp. Yor nĕ, đah nău min ŭch kơt, kan di, mât đăp mpăn nău nchrăp na nê̆, ntĭm na nê̆ ăp nkô̆ nău aơ hôm nha geh nău tâm rgop na nê̆, ngăn lah đah ăp ntŭk kan bâh QH đah Chính phủ n’hanh đah trung ương đah ta ntŭk kan ba dâng. Ta meng nĕ, kruanh Quốc hội nkah đă tĭng nău mĭn Nghị quyết 18 bâh Trung ương, năm 2023 mô dơn ƀư lôch luật neh ntu rgâl mhe ma hôm nha ƀư lôch nău rgâl luật pháp geh tât đŏng.

Mpeh nău leo kan tâm nchră, tâm rgop nău, sŏk nău tâm rgop mpeh nău nchrăp Luật neh ntuh rgâl mhe, kruanh Quốc hội nkah đă, tâm rnôk mông nar mô geh âk, an geh nău nchrăp kan tâm di, dŏng săk rnglăy mông  nar rnôk tâm nchră an tâm rgop nău mpeh ăp nkô̆ nău bâh nău nchrăp Luật. Ta meng Ủy ban wăng sa lah ntŭk kan leo kan mât uănh, rĭ Hội đồng dân tộc n’hanh ăp ủy ban êng bâh Quốc hội mô lah Kiểm toán ngih dak, Hội đồng nhân dân ăp gâl, ăp mpôl đại biểu Qh an geh n’hao nău leo kan tât râng rdâk njêng Luật. Yor nĕ, kruanh QH an lah, hôm nha geh âk nău jêr, ntul rlong tâm nău ƀư lôch nău nchrăp Luật, jêng ăp ntŭk kan mô dơi ƀư ơm lor nău ntrŭnh, an geh n’hao nău dơn kan ta năp Đảng n’hanh ƀon lan tâm nău ƀư lôch Luật.

Kruanh Quốc hội pă an Ủy ban wăng sa bâh Quốc hội mbơh ôp nău an năunchrăp kan bâh Quốc hội ƀư tĭng ăp trong kan đah rdâk njêng nău nchrăp kan Luật neh ntu rgâl mhe, tâm nĕ geh nău sŏk tâm rgop nău bâh ƀon lan tĭng nău ntrŭnh bâh Pháp luật, mbơh rblang nău kan an Ủy ban rnâng kan Quốc hội, Hội đồng dân tộc, ăp ntŭk kan bâh Quốc hội, ăp rnâng kan bâh Ủy ban rnâng kan Quốc hội, Hội đồng nhân dân gâl n’gor, nkuăl ƀon têh, ăp mpôl đại biểu Quốc hội n’hanh geh nău nchrăp mbơh nău ơm mpeh: Hồ sơ nău nchrăp kan Luật, ăp nău geh mĭn uănh, nău mbơh tơih nglôch lôch ƀư tĭng luật pah kan aƀaơ, mbơh tơih uănh năl ăp pháp luật geh tât neh ntu. Đah nău sŏk tâm rgop nău bâh ƀon lan, kruanh Quốc hội đă an geh ngluh mbơh ăp nău kan na nê̆, geh mbơh rblang na nê̆, ndrel đah nău dơn kan bâh ăp ntŭk kan, n’gâng kan geh gĭt nău tâm rgop bâh ƀon lan.

Ê lor sŏk nău tâm rgop ăp nuĭh geh nău tât mhe aơ, n’gâng kan Tài Nguyên n’hanh môi trường lĕ geh gĭt dơn nău tâm rgop bâh 63 n’gor, nkuăl ƀon têh, ăp n’gâng kan, ntŭk kan, pah kan đah ăp n’gâng kan tơm prăk, rdâk njêng, tuch tăm n’hanh hun hao nkual ƀon lan gŭ, mât uănh ntung trong, Nội vụ.

Nuĭh rblang: Thị Đoắt