VOV4.M’nông: Ndrel ma nau kan mât neh dak nâp nâl tâm nkuăl n’har bri bah neh dak, âk năm rlau aơ, ăp tahen grat ndrih gŭ kan tâm ăp nkuăl yôk prêh bah n’gor Quảng Nam hôm kơl an kônh wa ăp nroi mpôl đê̆ hun hao văng sa, jut n’huch ach o. Đah kônh wa ta aơ, cán bộ, tahen Biên phòng tă bah jŏ jêng kon nŭih bah ƀon lan, nau tâm rnglăp ma ƀon lan nar lơn jru nâp.

Âk khay ma aơ, cán bộ, tahen Rmôt bonh đă ƀon lan, Đồn Biên phòng La Êê, nkuăl Nam Giang tâm ndơn hăn kơl rnăk yuh Blúp Út, tâm thôn Đắc Ngol, xã La Êê ntĭm ân yuh ƀư ndrung gay ma rong sur ôch bah nkuăl nơm. Yuh Blúp Út mbơh, bah năp nơh rnăk yuh lah rnăk jêr ngăn bah xã, nau rêh nsing tâm mir. Mô ŭch ji ngot mro, ri yuh manh prăk bah NHCSXH rvăt 2 mlâm sur gay ma rong, nkre n’gon ndrănh gay ma sŏk mpa ân sur sa. Têm prăk, yuh pơk hvi rong sur ntơm 15 mlâm jêh ri 20 mlâm. Yơn lah, mô tŏng nau blau tâm nau mât chăm sur ri ma sur geh ji, mô ngăch têh. Gĭt trong nsôih ŭch rklaih ach o bah yuh Blúp Út ri ma Đồn Biên phòng La Êê hŏ đă cán bộ, tahen tât ta ngih gay ma ntĭm yuh ndkra ndrung sur. Ăp tahen hŏ ndrel kơl an yuh nkra ndrung ueh, kloh, nchrăp mpa sa ân sur. Yuh Blúp Út nkoch:

‘Bu nkah đă gâp âh ân rep kloh ntŭk ndrung sur, rnôk tor tơm prit ân sur sa ân geh trăm ma boh i ốt ndrel ma dak si ân sur sa gay ma bah ji ndul. Đồng BP La Êê kŏ tât tâm ngih gay ma kơl an ndrel ma nkah gâp âk ngăn”.

Đồn biên phòng La Êê ndơn nau mât njrăng rlau 35km trong n’har tâm 2 xã La Êê ndrel ma Chơ Chun, nkuăl Nam Giang, n’gor Quảng Nam, Aơ lah 2 xã ngai ngăn, jêr ngăn bah nkuăl Nma Giang, ngăn lah ta aơ lah rnoi Cơ tu, Ve-tà riềng, nau rêh nsing tâm mir. Ƀư nau rđau bah N’gâng kan tahen Biên phòng n’gor Quảng Nam, ăp năm, Đảng uỷ Đồn Biên phòng La Êê ndâk nau nchrăp, pă cán vộ, tahen ƀư nau kan bah nkuăl, kơl an ăp rnăk mâp nau jêr gay ma rklaih ach o. Tâm nê, ăp đảng viên tâm rmôt bonh đă ƀon lan ndơn kơl an ntơm 5-7 rnăk, cán bộ, rđau kan kơl an ntơm 3-5 rnăk. Ăp nau kan kơl an ƀon lan hun hao văng sa geh Đảng uỷ Đồn Biên phòng La Êê tâm rgop nsum đah n’gâng kan tâm nkuăl ndâk nau kan ân tâm di ma nau ngăn ndrel nau dơi bah kônh wa ta aơ kơt: tăm ba dak, rong sur, djăr, kik, tăm ăp ntil tơm sa play kơt cam vinh, play bŭng...Thiếu tá Tôn Ui, chính trị viên Groi Kruanh Đồn Biên phòng La Êê, nkuăl Nam Giang, n’gor Quảng nam mbơh, tâm ăp năm rlau aơ, tâm 2 xã La Êê ndrel Chơ Chun hŏ geh 16 rnăk rklaih ach o ntơm nau tuch tăm, mât rong yor Đồn dê ntĭm nti:

‘Phung hên uănh năl lah ƀư ân nâp tĭng ăp nhoat, mô ƀư âk. Phung hên hăn tât ăp rnăk vâl, ntĭm mbơh ăp nhoat gay ma hun hao văng sa, rgum ƀư rnôk aơ lah nau mât rong sur ôch, kik, djăr, tăm ăp ntil tơm sa play, tơm jŏ năm”.

Ntơm bah nau kơl an ban cán bộ, tahen biên phongg, năm rlau aơ, 2 xã La Êê ndrel ma Chơ Chun geh 22 rnăk rklaih ach o, rnăk ach o tâm xã La Êê n’huch hôm rlau 315, xã Chơ Chun hôm bơi tât 38%. Wa Zơ Râm Huấn, bí thư Đảng uỷ xã La Êê lah rjăp, mô knŭng ƀư ueh nau mât nau ƀư tơm đăp mpăn nkuăl n’har bri bah neh dak, cán bộ, tahen Đồn Biên phòng La Êê hôm lah ntŭk nsing rnơm ân kônh wa ăp rnoi mpôl tâm nkuăl yôk prêh, nkuăl n’har bri Nam Giang:

‘Đảng uỷ Đồn Biên phòng La Êê ntrŭnh ƀư bôk nau kan leo đảng viên tât rgum rƀŭn tâm ăp chi bộ thôn ndrel pă kơl an ăp rnăk vâl, ngăn lah kơl an lor tâm nau jur n’huch ach o ân nâp nâl. Ntĭm mbơh kônh wa ƀon lan kơt tĭng nau kan mhe tâm nau kan tuch tăm mât rong. Ngăn lah tâm nau mât rong, n’hao nau geh tuch tăm, tăm ba dak”.

Ƀư ueh nau kan “Đồn lah ngih, nkuăl n’har bri lah ƀon tơm, kônh wa ăp rnoi mpôl lah oh nô dul deh”, cán bộ, tahen Biên phòng n’gor Quảng Nam mro tâm dăch ma ƀon lan, tâm dăch ma nkuăl, tâm dăch gay ma jkơl an ƀon lan hun hao văng sa jut n’huch ach o nâp nâl. Tahen Biên phòng n’gor Quảng Nam kŏ bonh đă rgop prăk ndâk 300 ngih gŭ tâm kơl, ngih gŭ ân nŭih ach o nkuăl n’har bri, gôl dak ndrel ma rhiăng ntŭk ƀư kan kơl an ân ƀon lan, kơl ma rbăn mlâm mpa rong, kik djăr đah rnoh prăk âk jêt rmen prăk./.

Nŭih rblang: H’Thi