Jêh rơh rƀŭn tal 5, Đảng đoàn Quốc hội ndrel Rnâng kan đảng Chính phủ rđau kan rjăp, tâm dăch ăp ntŭk kan bah Quốc hội, Chính phủ tâm rgop rjăp đah ăp ntŭk kan gay ma ndal nchrăp ăp nkô̆ nau đăp mpăn prêh ngăn gay ma mbơh Quốc hội uănh, ntrŭnh.

  Hôm nkô̆ nau Uỷ ban Rnâng kan Quốc hội ndơn saơ ê tŏng nau dơi mbơh Quốc hội uănh, nchră ta rơh rƀŭn tal 6, Tổng thư ký, Kruanh jrâu kan Quốc hội Bùi Văn Cường đă, Đảng Đoàn Quốc hội ndrel Rnâng kan đảng Chính phủ uănh, rđau ăp ntŭk kan ndơn lŏ mĭn, nchrăp gay mbơh Quốc hội uănh, ntrŭnh ta rơh rƀŭn tal 7.

Ntoh nau tâm nar rƀŭn, Thủ tướng Chính phủ Phạm Minh Chính mbơh, jêh lôch rơh rƀŭn tal 5 bah Quốc hội du nar, Chính phủ mơ rƀŭn pă nau kan nchrăp ăp nkô̆ tâm nau dơi gay mbơh Quốc hội uănh, ntrŭnh tâm rơh rƀŭn tal 6. Thủ tướng lah rjăp, rơh rlau aơ, ăp ntŭk kan bah Quốc hội hŏ tâm rgop ngăn đah ăp ntŭk kan bah Chính phủ:

 ‘Tâm rgop aơ mô di lah knŭng geh ăp nau nchrăp luật ma hôm âk nau kan tâm nau dơi bah Quốc hội, ntŭk kan prêh ngăn, ntrŭnh ăp nau kan khlay bah neh dak, uănh prêh ngăn, ndâk njêng pháp luật ma ăp nkô̆ nau rêh Quốc hội kŏ geh tâm rgop rjăp đah Chính phủ săk tam, Gâp ndơn saơ geh nau tâm pă, nau tâm kơl ndrel tâm rgop bah Quốc hội, Rnơm ndri ma nau kan bah Chính phủ geh ƀư ueh lơn, n’ăp ma nau kan geh tât hành pháp, geh tât ăp nau kan văng sa, rêh jêng, rnă njrăng, neh dak. Mhe rlau, rƀŭn Trung ương kŏ kơp dơn, rnê prêh nau tâm rgop ngăn đah Quốc hội ndrel Chính phủ”.

Mpeh nkô̆ nau kan hôm mbrơi, ê năn nchrăp gay mbơh Quốc hội uănh lor, ntrŭnh ta rơh rƀŭn tal 6 tĭng nau nchrăp, Thủ tướng Chính phủ ŭch ăp ntŭk kan bah Quốc hội, Uỷ ban Rnâng kan Quốc hội mbơh đah ăp ntŭk kan tâm Chính phủ ndrel Chính phủ yor aơ lah nkô̆ jêr. Tâm rơh tât, Thủ tướng đă ăp ding mra tâm rgop rjăp gay ma nchrăp ăp nkô̆ nau aơ gay mbơh Quốc hội uănh, ntrŭnh tâm rơh rƀŭn êp ngăn.

Ntoh nau tâm nar rƀŭn, Kruanh Quốc hội Vương Đình Huệ mbơh, gay nchrăp ân rơh rƀŭn tal 6, Đảng đoàn Quốc hội ndrel Rnâng kan Đảng chính phủ hŏ năn tâm nchră, rjăp, ƀư tâm di nau kan, tŏng dơi nau nchrăp luh.

Tâm ban ma nau đă bah ăp ntoh măt râng rƀŭn ndrel Thủ tướng Chính phủ Phạm Minh Chính, Kruanh Quốc hội Vương Đình Huệ rnê nau nchrăp ueh bah 2 ntŭk kan hŏ geh nau tâm rgop rjăp, ăp nau đă geh tâm ban đah ăp nau nchrăp luh, nkre lah rjăp, ân geh lŏ nchrăp ueh tĭng nkô̆ nau bôk khay 1/2024 rklaih dơi ăp nau hôm kol:

  "Rơh rƀŭn tal 6, Quốc hội gưl 15 geh rnoh nau kan âk mpeh nau kan ndâk pháp luật, uănh, ntrŭnh ăp nau kan khlay bah neh dak, lah rơh rƀŭn n’gul gưl geh tât nau sŏk phiếu rnơm kan bah ăp ntŭk kan geh Quốc hội săch, ân ƀư. Âk nkô̆ nau khlay geh nau tât hun hao văng sa, rêh jêng ndrel nau rêh bah ƀon lan. Rđau kan Đảng, Ngih dak, ăp nŭih rđau kan cách mạng ơm, cử tri ƀon lan lam dak kŏ mpŏng ŭch ndrel rnơm tâm nau geh dơi bah rơh rƀŭn rơh aơ kơt ma ăp rơh rƀŭn bah năp nơh”.

Kruanh Quốc hội đă Chính phủ ndrel ăp ntŭk kan bah Quốc hội tâm rgop ngăn gay ma ƀư ueh ăp nau nchrăp luật nchrăp geh mbơh Quốc hội ta rơh rƀŭn rơh aơ, ngăn lah ăp nau nchrăp luật jêr. Đah ăp nau kan têh ma hôm geh nau êng êng, ân geh ƀư kloh nau dơi, nau ê dơi bah ăp nau kan gay ntoh măt Quốc hội tâm nchră, rhop nau, đăp mpăn nâp ueh ân nau kan ndâk pháp luật tâm rơh rƀŭn.

Kruanh Quốc hội kŏ nkah ân geh ƀa ƀơ mbơh nau mpeh ăp nau tât bah rơh rƀŭn, ngăn lah đah ăp nau tâm nchră, rgop nau mpeh ăp nau kan geh âk ƀon lan uănh kơl kơt ăp nau ƀư sŏk phiếu rnơm, mbơh nau ndrel ơh nau tâm rơh rƀŭn, mô ân geh nau tâm ƀah mpeh nau mbơh mhe, nau rƀŏng nkoch trêng geh nau tơm, nau khlay, tâm di nkô̆, nau mĭn bah Đảng, pháp luật bah Ngih dak, đăp mpăn nau dơi, ăp ntil, năn, geh nau rgop nkoch mbơh tâm di, tŏng ăp nau geh bah rơh rƀŭn tât đah cử tri ndrel ƀon lan lam dak./.