VOV4.M'nông: Tĭng trong kơl prăk manh dơh tâm bôk nău kan dâk hao n'hanh hun hao wăng sa- rêh jêng kon nuĭh tĭng Nghị quyết mbrô 11 nar 30/1/2022 bah Chính phủ, mhe aơ, Ngân hàng Chính sách Xã hội ăp n'gor tâm nkual Tây Nguyên hŏ ƀư ăp rơh n'gluh ngăch tơm prăk manh tât ti nuĭh ƀon lan.  

Mhe dơi Ngân hàng Chính sách Xã hội an manh rnoh prăk 50 rkeh prăk, yuh Săn ta ƀon Piơm, thị trấn Đak Đoa, nkuâl Đăk Đoa an gĭt, yuh mbra dŏng gay sreh tăm tay cà phê ntơm bah bôk khay mih dja dĭl. Gay manh dơi tơm prăk dơh, bôk năm aơ, yuh hŏ tâm ôp đah rmôt tơm manh prăk n'hanh mpêt nkrem bah ƀon lan gay nđơn nkoch đah ngân hàng. Lôch nê, cán bộ ngân hàng hŏ tât uănh mir, djăt yuh Săn nkoch mpeh trong sreh tăm tay mir tơm:

“Gâp dŭt rhơn rnôk manh geh 50 rkeh prăk gay geh tơm prăk ntuh kơl tâm neh mir cà phê dja. Du gâl prăk gâp rvăt phân poh gay mât chăm an cà phê hao jêng uĕh. Aơ lah tơm geh wăng sa bah rnăk wâl jêng gâp mbra nsrôih ƀư an săk geh dŭt âk”.

Hôm đah nô Nguyễn Hoàng Linh (ta Thôn 1, Thị trấn Đăk Đoa, nkuâl Đăk Đoa), tơm prăk manh 400 rkeh prăk, đah deh prăk kon dŭt đêt tâm 20 năm hŏ kơl nô ƀư geh du mblâm jay nâp uĕh. Ur sai nô mbra mpêt nkrem dŏng sa n'hanh joi tay nău kan gay trok rnon bah năp nar ton:

“10 năm aơ hăn gŭ trọ, geh jay mhe rhơn ngăn. Rnoh deh prăk kon ăp năm đêt, mông nar trok rnon ntoch jong, jêng prăk khay 2 hê ur sai rmeh đê̆ đă, tŏng an trok deh prăk kon n'hanh prăk tơm ăp khay, tŏng trok rnon bah năp nar ton”.

Tĭng ƀư bôk nău kan dâk hao n'hanh hun hao wăng sa- rêh jêng kon nuĭh tĭng Nghị quyết mbrô 11 nar 30/1/2022 bah Chính phủ, rơh dja, Ngân hàng Chính sách xã hội n'gor Gia Lai dơi tâm pă rlău 100 rmen prăk gay tĭng ƀư 3 bôk nău kan: an manh ntop kơl nău kan; an manh đah kon se nti, sinh viên n'hanh an manh đah jay gŭ thuk prăk. Aƀaơ ăp n'gor dôl ndăn ngăch an n'gluh tơm prăk manh thuk tât đah nuĭh ƀon lan. Wa Nguyễn Văn Ngọc- Giám đốc Phòng Giao dịch Ngân hàng Chính sách Xã hội nkuâl Đak Đoa, Gia Lai an gĭt:

“Nău ŭch lah kơl kônh wa he geh tơm prăk hun hao wăng sa, đăp mpăn nău rêh, rdâk hao tay nău kan. Lôch rnôk n'gluh tơm prăk, he hăn ôp uănh nău dŏng tơm prăk manh bah kônh wa dŏng di nău kan đŏng lah mô; kan nsum đah ăp n'gâng kan n'hanh ăp nsum mpôl, way hăn ôp uănh, treng nđôi nău dŏng tơm prăk manh, gay ban saơ ăp nkô̆ nău ntoh luh, der bah roh huach tơm prăk manh".

Ndrel đah Gia Lai, kêng dŭt khay puăn mhe aơ, Ngân hàng Chính sách Xã hội ăp n'gor tâm nkual Tây Nguyên hŏ ƀư n'gluh tơm prăk an manh thuk tĭng Nghị quyết 11/NQ-CP bah Chính phủ mpeh bôk nău kan dâk hao n'hanh hun hao wăng sa- rêh jêng kon nuĭh. Na nê̆, ta n'gor Dak Lak hŏ n'gluh geh 5 rmen prăk an ăp năch manh lor bôk năp. Tâm nê geh 83 năch manh tơm prăk bôk nău kan ntop kơl nta joi nău kan, mât kơt ơm n'hanh pơk hvi nău kan đah lĕ rngôch rnoh prăk rlău 4,2 rmen prăk. Tĭng trong nchrăp, n'gor Dak Lak dơi Trung ương tâm pă rlău 71 rmen prăk gay an ƀư 3 tâm rnoh 5 bôk nău kan an manh thuk tĭng Nghị quyết 11/NQ-CP, tâm nê: an manh nta joi nău kan, mât kơt ơm n'hanh pơk hvi nău kan lah 50 rmen prăk; an manh rvăt jay gŭ kơl thuk lah 20 rmen prăk… Ta Lâm Đồng, Ngân hàng Chính sách Xã hội n'gor hŏ ƀư n'gluh tơm prăk lor bôk năp ăp bôk nău kan an manh thuk tĭng Nghị quyết 11/NQ-CP bah Chính phủ. Nê lah bôk nău kan an manh nta joi nău kan, mât kơt ơm n'hanh pơk hvi nău kan an 50 nuĭh kan, đah lĕ rngôch rnoh prăk bơi 3 rmen prăk ta 2 ntŭk rhŏ an manh Ngân hàng Chính sách Xã hội nkuâl Di Linh n'hanh Đam Rông. Nuĭh dơi an manh lơn âk lah ăp nuĭh pah kan plơ̆ sĭt bah ăp nkual ƀon têh têh lôch geh tât khuch nuh srê Covid-19, manh tơm prăk gay joi geh đăp mpăn nău rêh. Nkre tâm bah ri aơ nơh, Ngân hàng Chính sách Xã hội n'gor Lâm Đồng hŏ n'gluh an 15 doanh nghiệp manh tơm prăk trok prăk khay rlu kan an rlău 4.600 nuĭh kan, đah lĕ rngôch tơm prăk manh 18 rmen prăk.

Nău an ƀư bôk nău kan kơl nta joi nău kan, mât kơt ơm n'hanh pơk hvi nău kan tĭng Nghị quyết mbrô 11/NQ-CP bah Chính phủ hŏ tŏng đah nău ŭch geh bah dŭt âk nuĭh ƀon lan mâp jêr jŏt tă bah Covid-19 n'hanh ân rdâk tay, hun hao wăng sa- rêh jêng kon nuĭh./.  

Nuĭh rblang: Điểu Thân