VOV4.Mnông- Kêng măng nar 22/2, ta Hà Nội, cục cảnh sát mât uănh hành chính mpeh mât đăp mpăn nău rêh jêng, n’gâng kan công an leo ƀư rƀŭn nchră mbơh pă tài khoản mbơh săk điện tử an ƀon lan bâh nău kan pă căn cước công dân. Nchrăp, dŭt khay 2 aơ n’gâng kan công an mbra geh pă mbơh săk điện tử an ƀon lan gay ma ƀư tĭng ăp nău kan hành chính bâh mạng. Tài khoản mbơh săk điện tử lah rgum geh ntơ săk lăp, mật khẩu mô lah ăp nău mbơh năl lăp êng geh njêng bâh trong mbơh ntơ săk n’hanh uănh năl điện tử bâh n’gâng kan công an. Tài khoản aơ geh mât uănh n’hanh uănh năl ta ứng dụng ntơ săk điện tử ngih dak yor n’gâng kan công an ƀư jêng. Rnôk ƀon lan tât ta ntŭk kan công an quận nkuăl mô lah n’gor nkuăl bon têh pă an, pă tay căn cước công dân ntrŭp chíp rĭ mbra geh mbơh dăn pă tay tài khoản ntơ săk điện tử. ăp nuĭh ƀon lan mbra dơi geh mbơh dăn tài khoản ntơ săk điện tử lah geh nău ŭch dŏng. Ngăn lah, nău mpôn ntơ săk ƀon lan, mô dơi ndra ƀư rlăm, n’hanh kanŭng yor geh mbơh bâh ntŭk kan mbơh mât uănh rnoh mbrô ngih dak mpeh ƀon lan gŭ lah ntŭk mât prăp tơm geh chính phủ đă an n’gâng kan công an mât uănh.

Nuĭh rblang: Thị Đoắt