Đại úy Lê Hữu Nhân - Groi kruanh Đội Cảnh sát giao thông - mât đăp mpăn công an nkuăl Bắc Yên an gĭt, tâm khay 9/2023, lah khay kon hoc ntơm hăn tât ngih nti bôk năm mhe. Gay ma n’hao nău gĭt vât, nău dơn kan mât kan ƀư tĭng luật hăn trong an nuĭh tât râng hăn trong lah ăp oh kon hoc, kon hoc, ngăn lah kon hoc lah oh kon ƀon lan rnoi đê̆ tât gŭ rêh ta ăp ƀon lan ngai đah ngih nti, ndeh klư hăn ndong kanŭng lah ndeh máy, mpôl kan cảnh sát mât uănh ntung trong công an nkuăl Bắc yên lĕ pă dăp nuĭh kan ăp rmôt pah kan uănh nđôi ta ăp ntuk 24/24 mông. Đại úy Lê Hữu Nhân an gĭt tay.

 “Mpôl kan cảnh sát mât uănh ntung trong rgum pă nuĭh kan ăp rmôt pah kan uănh nđôi ta ntŭk 24/24 mông. Ngăn lah mpôl hên geh rgum ta ăp kon hoc geh ăp nău ƀư tih kơt lah: rgum hăn ngăch, hăn mô tâm di, mô ndu môp n’gang bôk rnôk tât râng hăn trong, nkre lah tâm rgop đah ban giám hiệu ăp ngih nti ƀư mbơh tơih, ntĭm nti pháp luật n’hao nău gĭt vât tâm ban kơt tâm rgop đah mê̆ bơ̆ ntĭm nti nkah mbơh đah ăp oh geh ƀư tih, nkre lah mbơh tơih tât ngih nti gay ma geh trong kan rmal tĭng nău ntrŭnh”.

Năm nti 2023-2024, lam nkuăl Bắc yên geh 45 ntŭk ngih nti đah rlău 20 rbăn kon hoc ăp gâl bâh mầm non, tiểu học, THCS tât THPT. Gay ma ăp oh gĭt na nê̆ ăp nău gĭt vât, cảnh sát mât uănh ntung trong Công an nkuăl Bắc yên geh săch nkô̆ nău mbơh tơih an tâm di đah kon hoc. Oh Lèo Thị Nga Diệu nti jrô 11A, ntŭk kan ntĭm nti Giáo dục thường xuyêhn nkuăl Bắc Yên nkoch.

“Bâh nar mbơh tơih nar aơ rĭ kơl an oh n’hanh ăp nuĭh gĭt vât lơn mpeh Luật mât đăp mpăn hăn trong, kơl an ăp nuĭh tât râng hăn trong rĭ an geh ndu môp n’gang bôk, mô hăn ngăch, hăn nchah trong”

Oh Lèo Thị Nga Diệu nkoch tay: “Nău ngăn ta nkuăl Bắc Yên hên rĭ âk băl kon hoc ê hŏ tât năm di hăn ndeh máy ma hôm nha geh ăp mê̆, bơ̆ ndơ̆ ndeh an hăn nti. Ta rnôk sĭt nti, ăp băl nĕ tâm rdeng hăn ngăch ngăn, nđâp ma ta trong geh dŭt âk ndeh, ăp băl kon hoc êng dôl hăn jâng sĭt ta jay. Oh saơ dŭt klach ngăn. Lĕ geh tơ̆ oh geh ăp băl nĕ hăn ngăch ir geh tom. Klach ngăn”.

Tâm 9 khay bôk năm 2023 mpôl cảnh sát hăn trong, mât đăp mpăn rnă njrăng, Công an nkuăl Bắc Yên lĕ tâm rgop đah ngih nti THPT Bắc Yên, ngih nti Phổ thông dân tộc nội trú THCS n’hanh THPT Bắc yên, ntŭk kan Giáo dục thường xuyên-ntĭm nti nău kan leo ƀư mbơh tơih mpeh Luật hăn đăp mpăn ntung trong geh 3 rơh an 1.130 kon hoc, pă an rbăn n’ha đaih, sƀ mbơh tơih mpeh mât đăp mpăn hăn trong. Ntŭk kan ntĭm n’hanh nti tâm rgop leo ƀư mbơh tơih geh 42 rơh an bơi tât 9.700 nuĭh cán bộ mât uănh n’hanh kon hoc. Nai nti Bạc Văn Ân- groi Hiệu trưởng ngih nti Phổ thông dân tộc nội trú trung học cở sở n’hanh trung học phổ thông Bắc Yên an gĭt.

“Ngih nti Phổ thông dân tộc nội trú THCS n’hanh THPT Bắc Yên lĕ mbơh tơih tât kon hoc ăp nău ntrŭnh bâh pháp luật đah âk trong kan êng êng kơt lah tâm mâp chào cờ bôk pơh, leo ƀư ăp rơh tâm nchră bah dih mông nti tâm nĕ geh jă ăp đồng chí cảnh sát mât uănh ntung trong mât đăp mpăn công an nkuăl Bắc yên tâm rgop ndrel đah ngih nti gay ma mbơh tơih ntĭm nti an ăp oh mpeh luật mât đăp mpăn hăn trong, bâh nĕ kơl an pháp luật hăn tâm nău rêh n’hanh ăp oh geh nău gĭt vât lơn tâm nău ƀư tĭng ăp nău ntrŭnh bâh pháp luật”.

Đah âk trong kan tâm ban, na nê̆ geh ƀư đah ăp trong nchrăp kan na nê̆, nău gĭt vât bâh kon hoc ta nkuăl yôk prêh Bắc Yên bâh n’gor Sơn La ăp nar lơ ma geh n’hao, yơn lah nău mât đăp mpăn hăn trong way lah nău dŭt ndăn, ta meng nău lăp kan ndrel bâh ăp mpôl kan têh an geh nău nsum ti bâh lĕ ntŭk rêh jêng, gay ma nău ueh êng mpeh hăn trong ngăn ngên geh trĕ lam têh hvi.

VOV4