VOV4.M’nông: Pơh rlau aơ, Kruanh Quốc hội Vương Đình Huệ hŏ ƀư tơm nar rƀŭn trực tuyến ntrŭnh nau ƀư nau kan HĐND ăp n’gor, nkuăl ƀon têh nkuăl mpeh ba lơ năm 2022. Ntoh măt rđau kan ăp nkuăl, ntŭk kan ndrel rlau 200 ntoh măt bah 25 n’gor, nkuăl ƀon têh râng rƀŭn. Nau đă ndơ̆ luh tâm năm 2022 lah lŏ n’hao nau nâp nau kan bah HĐND ăp gưl.

            Tâm nar rƀŭn, ăp nau rgop bah ăp ntoh măt nchră nau tă blau kan, nau dơi geh bah nau kan khlay bah Hội đồng nhân dân kơt nau kan mêt uănh, mâp ma cử tri, ntrŭnh ăp nau kan khlay bah nkuăl, nkre ndơ̆ luh ăp nau đă gay ma n’hao lơn tay nau kan bah Hội đồng nhân dân. Wa Phùng Thị Hồng Hà, Groi Kruanh Rnâng kan HĐND nkuăl ƀon têh Hà Nội, đă:

            ‘Đă Uỷ ban Rnâng kan Quốc hội rđau ntrŭnh ăp nau ntrŭnh mpeh nau kan jêh rnôk mêt uănh, ntrŭnh mpeh nau kan bah nŭih dâk bôk ntŭk kan geh mêt uănh tâm nau ƀư ăp nau ntrŭnh leo mêt uănh bah HĐND nkuăl ƀon têh, Quận, nkuăl, nkuăl têh, ngăn lah tâm nau kan mêt uănh bah UBND, Kruanh UBND ăp phường, nkuăl, nkuăl têh, gay đăp mpăn ân Kruanh UBND Phường ƀư tĭng tâm di nau ntrŭnh, nau kan geh jao, der nau ƀư thơ tha, mô njrăng tâm nau kan rnôk mô geh HĐND Phường mêt uănh”.

            Wa Sùng A Hồ, Rnâng kan HĐND n’gor Lai Châu Âu lah, tâm nau ƀư nau kan bah HĐND, geh âk nau kan khlay mô lah ndal, ntoh bah n’gul gưl kan geh tât nau ƀư nau kan hun hao văng sa, rêh jêng, neh dak, rnă njrăng tâm nkuăl ân geh ntrŭnh ƀư nkre. Tâm rnôk nê, tĭng nau ntrŭnh bah HĐND, ri ân geh kâp tât rơh rƀŭn bah HĐND n’gor mơ uănh, ntrŭnh. Wa Sùng A Hồ, ntoh nau rgop:

            ‘Quốc hội, Chính phủ ân geh mĭn ntrŭnh ƀư nau ntrŭnh kloh mpeh nau dơi bah Rnâng kan HĐND n’gor geh tât nau uănh, ntrŭnh ăp nau kan ntoh luh đah bar rơh rƀŭn HĐND. Uănh, ntrŭnh n’hêl lơn ăp nkô̆ nau na geh khlay ngăn, ân geh pă nau dơi mô lah jao nau kan ân Rnâng kan HĐND uănh, ntrŭnh đah bar rơh rƀŭn, ngăn lah ăp nkô̆ nau geh tât nau ntrŭnh ntoh kơl, mât neh ntu tơm prăk, ăp nau kan ndal tâm nau ntoh luh, ntrŭnh n’hêl ăp nau kan, nau ƀư nau kan geh HĐND ƀư jao nau kan gay ma rklaih đah 2 rơh rƀŭn ndrel nau kan bah Rnâng kan HĐND rnôk geh ntrŭnh ăp nau kan nê”.

            Ntoh nau lôch nar rƀŭn, Kruanh Quốc hội Vương Đình Huệ nkah, lŏ ntrŭnh ăp nau ntrŭnh, ƀư jêh nau kan, nau dơi, nau ƀư bah HĐND, Rnâng kan HĐND, ăp Rnâng kan bah HĐND ndrel ntoh măt HĐND tĭng nau ntrŭnh bah Luật rgâl nkra, ntop tay du đê̆ điều bah Luật ƀư kan Chính phủ ndrel Luật ƀư nau kan n’gâng kan bah nkuăl, ngăn lah đah ăp ntoh măt mhe râng rơh bôk năp lah ntoh măt HĐND:

            ‘Lŏ uănh, ndâk ƀư mô lah ƀư jêh ndrel ƀư bôk nau kan lŏ rgâl mhe, n’hao nau nâp dơi bah rơh rƀŭn HĐND, nau kan mâp cử tri, ôp nau ndrel ơh nau ôp gay ma ƀư ân ueh ngăn nau kan, nau dơi bah HĐND n’gor, nkuăl ƀon têh kơp n’ăp ma nau kan ndrel đăp mpăn ƀư tĭng Hiến pháp ndrel pháp luật, ndâk njêng n’gâng kan ƀư nau kan mpeh rnoh nŭih, sŏk phiếu rnơm, nklăch phiếu rnơm, ntrŭnh ăp nau kan khlay tâm nau kan ndrel mêt uănh nau ƀư kơt tĭng Hiến pháp ndrel pháp luật tâm nkuăl. Nau kan rgâl mhe, n’hao nau dơi, nau tam, nau săk geh nau kan bah HĐND ân geh tâm dăch ma bôk nau ƀư nau kan ƀư nau ntrŭnh Đại hội Đảng lam dak ndrel Đại hội Đảng bộ n’gor, nkuăl ƀon têh. Ân geh ndơ̆ leo ndrel uănh ntoh măt HĐND lah n’gâng tơm, lah nau nâp ndrle nau kan bah ntoh măt HĐND ntrŭnh tât nau săk tam, nau ueh bah nau kan bah HĐND lah nsum. Ăp nau ntrŭnh geh tât n’gor tĭng nau dơi ân sŏk nŭih ƀon lan, rmôt kan ƀư n’gâng tơm, leo geh jêng bah neh dak, rnoi mpôl hao ba lơ ndrel ê lor”.

            Kruanh Quốc hội Vương Đình Huệ đă, ntơm bah nau tă blau nau dơi bah nau kan Quốc hội ndrel HĐND du đê̆ n’gor, nkuăl ƀon têh, HĐND ăp n’gor, nkuăl ƀon têh ntơm kơp, ndâk, mbơh gưl uỷ ndrel gưl nchră luh nau ntrŭnh mô lah HĐND ntrŭnh nau ntrŭnh mpeh bôk nau kan ndâk ăp nau ntrŭnh quy phạm pháp luật ân lôch năm kan gay ma ơm nchrăp, tă bah ngai tâm nau ndâk njêng, ƀư jêh nau kan, ndâk dơi nau kan hun hao văng sa, rêh jêng bah nkuăl, uănh khlay nau ƀư nau kan ngăn, n’hêl ngăn ăp nau ntrŭnh geh tât nau dơi bah Quốc hội đah nau kan ƀư n’gâng kan ndrel nau dơi kan ngăn ân du đê̆ n’gor, nkuăl ƀon têh”./.

Nŭih rblang: H’Thi