VOV4.M’nông: Mhe aơ, ta Ngih kan Quốc hội, Uỷ ban Rnâng kan Quốc hội ƀư ntrŭnh Bôk nau kan mêt uănh bah Quốc hội năm 2023, nthoi nau ngơi đah 49 Rmôt kan ntoh măt Quốc hội ăp n’gor, nkuăl ƀon têh. Kruanh Quốc hội Vương Đình Huệ, Groi Kruanh Quốc hội Trần Quang Phương ƀư tơm nar rƀŭn.

            Ntoh nau tâm nar rƀŭn, ăp ntoh măt rnê lah, tâm rơh rlau aơ, nau kan mêt uănh bah Quốc hội hŏ geh n’hao ndrel geh nau rgâl mhe, nar lơn ma n’hao nau tam, geh âk nau dơi khlay, geh cử tri ndrel ƀon lan rnê rêh. Gay dơi n’hao nau kan mêt uănh, tĭng Groi Kruanh HĐND nkuăl ƀon têh Hồ Chí Minh Nguyễn Văn Dũng  ân geh ntrŭt dăng nau kan mêt uănh lah nau khlay:

            ‘Ndâk njêng bôk nau kan mêt uănh dăch nau kan dôl geh, đăp mpăn ƀư ăp nau tâm ban đah nau kan mêt uănh. Tâm nau mbơh nau tă geh bah rơh mêt uănh, nau ntrŭnh mpeh nau mêt uănh ân geh ăp nkô̆ nau rƀŏng ân kloh, tĭng ông nar, geh nau ƀư nau kan n’hêl bah ăp ntŭk kan, rmôt kan, êng nŭih geh tât. Ân geh bôk nau kan mêt uănh tĭng nkô̆ mpeh nau ntuh kơl nsum, nau kan trok tâm gay ma ntrơn ntŭk gŭ”.

            Gay ma ntrŭnh geh nau tam bah Bôk nau kan mêt uănh bah Quốc hội, Uỷ ban Rnâng kan bah Quốc hội năm 2023, Kruanh Quốc hội Vương Đình Huệ đă, ăp ntŭk kan bah Quốc hội, ăp ntŭk kan geh uănh năl gay ma n’hao nau săk tam bah nau mêt uănh lah du nkô̆ nau khlay, ma nau tơm tâm rnôk rgâl mhe ƀư ndrel nau kan bah Quốc hội Việt Nam tĭng nau ntrŭnh, ntrong kan bah Đảng mpeh nau ndâk njêng Ngih dak pháp quyền XHCN bah ƀon lan, yor ƀon lan.

            N’hao nau kan mêt uănh bah Quốc hội tâm nau njrăng, rdâng sa khâm, nau khuch, mpŭng lir; uănh khlay tâm nkô̆ njrăng, rdâng sa khâm, ƀư tih, uănh kloh aơ lah nau kan ƀa ƀơ, nau khlay ndrel geh ƀư ăp ntil, mbơh, geh nkô̆ tơm, nau kan; rgum tâm ăp nau kan gay ma nơih ntoh ăp nau mô ueh, nau ntoh lư geh uănh njrăng mpeh nau sa khâm, mpŭng lir, mpeh nau mô hôm nâp tât nau mĭn chính trị, nau rêh.

            Kruanh Quốc hội Vương Đình Huệ đă, ƀư jêh nau kan tâm rgop nsum đah Quốc hội đah ntŭk kan Đảng, MTTQ Việt Nam, ăp ntŭk kan chính trị-rêh jêng tâm nau kan mêt uănh gay ma ƀư ueh nau kan mêt uănh bah ntŭk kan, ndrel njêng n’hâm ƀư kan, n’hao săk tam, uănh nâp tâm nau dơi, ơm kơp, rgum, nchră ndrel mĭn nau đă rgala nkra, ntop tay du đê̆ nau ntrŭnh bah pháp luật mpeh nau kan mêt uănh. Ƀư ueh nau sŏk phiếu rnơm đah ăp nŭih ƀư nau kan yor Quốc hội săch, ân ƀư.

            Kruanh Quốc hội lah rjăp, rgâl mhe, n’hao nau nâp nau kan mêt uănh lah nau kan hŏ ndrel dôl geh Quốc hội, Uỷ ban Rnâng kan Quốc hội ƀư ndrel ntoh nau bah ăp nau mĭn ndrel nau kan gay ma rgop nau n’hao nau nâp, săk tam, nau dơi bah ntrong kan Ngih dak:

            ‘Mêt uănh ân geh tâm nuih n’hâm dŭt n’hâm ndâk njêng, đah “ndâk” ndrel “njrăng” ri ndâk hôm lah nau tơm, jŏ jong, rdâng ân rjăp, ngăn, ndal, ân geh ƀư tĭng ăp nau kan ueh, ăp nŭih kan ueh, kan blau, nchră tât nau kan ân geh tâm ban, tâm di gay ma lŏ ntoh nau kan, ntrong kan pháp luật, lŏ n’hao nau săk tam ƀư nau kan, rgop tâm nau hun hao văng sa, rêh jêng ndrel ndâk neh dak. Ndâk njêng pháp luật gay ma njêng ndrel hun hao, nau kan mêt uănh kŏ ndri”.

            Kruanh Quốc hội lah rjăp, Quốc hội mro rgâl mhe, ndri ma, ăp ntŭk kan Quốc hội ân geh ƀư ueh nau kan mêt uănh, ăp ntoh măt gay ma mât nkân ueh nau kan bah nơm tâm rnôk ƀư nau kan ndrel nau dơi bah năp cử tri ndrel ngăn ngên “pơk luh du rơh mhe geh âk nau dơi ueh lơn tâm nau kan bah Quốc hội” kơt lah nau ŭch bah Tổng Bí thư Nguyễn Phú Trọng lah rjăp tâm rơh rƀŭn tal bôk năp, Quốc hội gưl XV.

            Jêh rơh rƀŭn, Kruanh Quốc hội Vương Đình Huệ ndrel rmôt kan bah Trung ương hŏ mêt uănh nau ƀư ăp nau ntrŭnh bah Quốc hội đah bôk nau kan ntuh kơl ndâk trong cao tốc Bến Lức-Long Thành ndrel tach ndeh mpăr Long Thành. Gay ƀư tâm di nar nchrăp luh, đah rđau kan n’gor Đồng nai, Kruanh Quốc hội Vương Đình Huệ đă, n’gor Đồng Nai rgum âk, rklaih năn nau kan ntrơn ntŭk, jao ân tơm ntuh kơl, pă săm ƀŭt kơp dơn nau dơi dŏng neh, lŏ uănh kơl an ntuh kơl ân jêh ăp ntŭk ntu gung trong ngih vâl kơl an ƀon lan, kơl ntĭm nti gay ma nŭih ƀon lan geh nau nơih lơn tâm nau joi ntrong, đăp mpăn geh rnoh nau dơi rêh tâm ban mô lah rlau ma ntŭk gŭ ơm./.

           VOV/ Nŭih rlang: H’Thi