VOV4.M’nông: Pơh rlau aơ, hŏ geh rơh rƀŭn nchră nkô̆ nau Pháp luật khay 8 bah Uỷ ban Rnâng kan Quốc hội. Tâm rơh rƀŭn aơ, Uỷ ban Rnâng kan Quốc hội rgop nau mpeh nau nchrăp hŏ mbơh Quốc hội tâm rơh rƀŭn tal Pe ndrel 3 nau nchrăp kuật mbơh Quốc hội ân nkô̆ nau bah rơh rƀŭn bôk năp ta Rơh rƀŭn tal 4. Rgop nau mpeh nau nchrăp nau ntrŭnh Nkô̆ nau bah rơh rƀŭn Quốc hội (rgâl nkra), Kruanh Quốc hội Vương Đình Huệ đă ân geh đăp mpăn nau ƀư tơm, nau dơi kan bah ntoh măt Quốc hội ndrel tâm ban kơt nau mhe dôl geh.

            Nau nchrăp nau ntrŭnh Nkô̆ nau rơh rƀŭn Quốc hội (rgâl nkra) gay rgop nau ƀư ntrŭt dăng nau kan bah Quốc hội nar lơn ma nâp ueh, tâm ban ndrel n’hao lơn tay nau nâp, nau săk tam bah rơh rƀŭn Quốc hội. Nau mhe bah nau nchrăp nkô̆ nau bah rơh rƀŭn Quốc hội (rgâl nkra) nê lah nau ntrŭnh n’hêl lơn mpeh nau kan bah ntoh măt Quốc hội tâm nau râng rơh rƀŭn ndrel mô geh râng rƀŭn ta rơh rƀŭn. Jăng lơi nau ntrŭnh mpeh nau nchâp đă njoăl săm ƀŭt rƀŭn tât ăp ntoh măt Quốc hội ma rgâl đah bản điện tử, ntop tay nau ntrŭnh mbơh rnoh moh săk tât ăp ntŭk kan, êng nŭih mbrơi njoăl săm ƀŭt.

            Tât rnôk aơ, nau kan hôm êng êng, nê lah nau ntrŭnh mpeh nar ntoh nau bah ntoh măt ta rơh rƀŭn dĭng lĕ. Âk nau rgop đă mât nâm ơm nau ntoh nau ngơi jong 07 mnĭt kơt nkô̆ nau ntrŭnh rnôk aơ gay ăp ntoh măt Quốc hội dơi geh mbơh kloh ăp nau mĭn bah nơm. Mpeh nau dơi bah nŭih rđau rơh rƀŭn, ăp ntoh măt đă ƀư rjăp lơn ăp nau kan khlay gay nŭih rđau kan tâm rơh rƀŭn đă Quốc hội ntrŭnh nau jong mô lah gleh mông dơi ntoh ngơi mô lah mbơh nau. Kruanh Uỷ ban văng sa bah Quốc hội Vũ Hồng Thanh đă:

            ‘Gay tâm nchră nau dơi bah ntoh măt tâm nau ntoh nau rgop bah nơm, ngăn lah ăp rơh rƀŭn nchră tâm ngih rƀŭn, ntoh măt ŭch ntoh nau dơi nau kan bah nơm đah nkuăl ma nơm ân geh bu săch. Ri ma kŏ ân geh đăp mpăn mông, nar. Yơn rnôk ƀư mhe ri ân geh nkô̆ nau kơt tĭng ri nŭih tơm nơm ân geh rđau nau kan gay ma rhuăt gleh lơn mông mbơh nchră”.

            Nau nchrăp nau ntrŭnh ntop tay du đê̆ nau dơi nchră tâm ngih rƀŭn gay ma pơk hvi lơn tay nau dơi ƀon lan ƀư tơm tâm nau kan bah Quốc hội, pơk trong nơih gay ăp ntoh măt Quốc hội ƀư kloh ăp nau kan geh ntoh măt Quốc hội uănh khlay. Đah nau tâm nchră, ôp nau, Uỷ ban Rnâng kan Quốc hội đă ƀư kloh ăp nkô̆ nau bah ăp ntoh măt mô lah knŭng ntoh măt rƀŭn geh ôp nau mơ geh nau dơi tâm nchră đah nŭih ơh nau ôp. Groi Kruanh Quốc hội Trần Quang Phương lah rjăp:

            ‘Tâm nau kan ma nơm gay tâm nchră, đah nau tâm nchră đah ơh nau ôp lŏ mô geh nau ƀư kloh. Nau tâm nchră lah ăp nau kan ê kloh ri ân geh tâm nchră. Ôp nau lŏ kŏ lah ê geh kloh. Ndri ma, ri nau ntrŭnh mông rnôk aơ tâm nau tâm nchrăp kan geh rnoh êng êng. Tâm nau tâm nchră ri nchră geh 3 mnĭt, yơn ôp nau, lŏ tâm nchră tay 2 mnĭt. Tĭng gâp ri nơm ân lơi lơi nau tâm nchră tâm du nau ôp nau ri geh moh lah ôp nau lŏ lah mông ôp nau ndrel ôp nau tay knŭng geh du mnĭt”.

            Tâm rơh rƀŭn, Kruanh Quốc hội Vương Đình huệ lah rjăp: Quốc hội lah ntŭk ƀon lan săch đă, ndri ma nau nchrăp nau ntrŭnh Nkô̆ nau bah rơh rƀŭn Quốc hội (rgâl nkra) ân geh đăp mpăn nau dơi ƀon lan ƀư tơm, n’hao nau dơi pháp quyền, blau nau kan, ueh mhe; kloh rah vah, khoa học ndrel săk tam, kơt tâm ban đah nau mhe dôl geh:

            ‘Mât ân tâm dăch ma nau rgâl mhe gay ƀư nau kan ndrel nau pah kan bah Quốc hội, ngăn lah đăp mpăn nau dơi ndrel n’hao nau kan bah ăp ntoh măt Quốc hội. Ăp nau ma nau dơi bah ntoh măt Quốc hội jêh ri mô geh nau đă n’huch. Ân geh đăp mpăn ân rơh rƀŭn mhâm ƀư nau ntrŭnh nau kan ân geh ăp ntoh măt Quốc hội bu ƀư tĭng kơt dơi nau kan aơ. Mô êng mô geh n’huch ma ân geh đăp mpăn kơt tĭng dơi ăp nau dơi ndrel n’hao nau kan geh nau dơi bah ntoh măt bah Quốc hội. Lŏ rgâl mhe ăp nau rđau nau kan gay ma ntrơn nkô̆ nau tă bah Quốc hội râng tâm nchră ndrel tâm nchră nau tay”.

            Ăp nau rgop kŏ đă ntrŭnh nau kan ƀư geh yor ty ngăch lơn tâm rnôk lah geh nau tât ƀư ndal kơt rnôk srê ji geh tât nau jêr. Yơn lah, Kruanh Quốc hội ân lah, mô kâp ƀư ân n’hêl lơn ăp nau geh 2 rơh ƀư yor ty tâm ban săch nau. Yor lah hŏ săch đah ntrong kan điện tử ƀư ân nâp ta rơh rƀŭn ri mô kâp yor ri đah ăp ntrong săch nau kan điện tử tâm ndơ dŏng điện thoại di động./.

            Nŭih rblang: H’Thi