VOV4.M’nông: Ủy ban Văn hoá ntĭm nti bah Quốc hội, tâm rgop nsum đah Uỷ ban Tư pháp ndrel Uỷ ban Xã hội bah Quốc hội mhe nau ƀư rƀŭn nchră tât nkô̆ “N’hao nau ƀư nau kan, pháp luật mpeh nau njrăng, rdâng lơh kon se”. Tâm nar rƀŭn aơ, ăp ntoh măt nchŏng kloh ăp nkô̆ nau leo tât nau tâm lơh tâm rnăk vâl ndrel nau ƀư bah nŭih têh jêh rnôk tâm lơi, ngăn lah nau rêh kon nŭih mô hôm ueh ƀư n’hao lơn nau lơh khuch kon se. Nkre lah nau kan njrăng, rdâng tâm lơh tâm kon se geh mbơh tâm nar rƀŭn.

            “Nau tih me yông lơh kon êng sai păng mhe 8 năm”, “nau tih i băl me păng păng 9 mlâm đĭn tâm bôk kon bu ur 4 năm jêh âk tŏ lơh, ŭch nkhĭt mô jêng”, “nau tih bơ̆ klŭp kon tâm dak”...ndrel ăp nau lơh khuch kon se êng êng dôl ma geh tâm rơh rlau aơ. Groi Kruanh  Rnâng kan Quốc hội Trần Thanh Mẫn lah kloh: ăp nau ƀư tih lơh khuch kon se tâm rnoh prêh ndrel ân saơ ăp nau kan hŏ ndrel ma dôl ƀư nau mât chăm, ntĭm nti kon se ê tŏng. Groi Kruanh Uỷ ban xã hội bah Quốc hội Nguyễn Thị Kim Thuý đă:

            ‘Ăp nau tâm lơh tâm âk năm ma aơ mô êng geh nau mô n’huch ma hôm lơn ma âk đŏng, rnoh nau khuch ndrel nau tih. Moh nkô̆ ƀư tât nau tuh aơ? Bộ Lao động thương binh ndrle Xã hội; N’gâng kan công an ndrel ăp ntŭk kan geh tât geh moh nau kan gay ma rklaih nau aơ”

            Kruanh n’gâng kan Bộ Lao động Thương binh ndrel Xã hội Đào Ngọc Dung kơp dơn ăp nau ê dơi tă bah nau ngăn lah yor Luật kon se ê geh ntĭm, mbơh ntrŭnh năn. Nau ngăn lah mô đê̆ n’gor mô geh uănh khlay tât nau kan kơl an kon se:

            ‘Âk nau tih mhe rlau lah nau rêh kon nŭih mô hôm geh nau ueh. Gâp ân lah nau tâm lơh tâm rnăk vâl ndrel ăp nau ƀư bah nŭih têh jêh lôch tâm lơi. Ăp nau tih mhe rlau kŏ lah nau geh tă bah nau tâm lơh tâm rnăk vâl ma ê saơ joi rklaih dơi nau kan ƀư tât nau ƀư tih khuch hô”.

            Tâm rnôk srê Covid-19 lơh khuch khat hô, khuch ngăn tât nau hăn ro, geh nsum đah nau khuch bah jâng văng sa hao, ƀư jêng “ nau mô ueh tâm rnăk vâl”. Âk rnăk vâl lŏ lah ăp nŭih me, mbơ̆, băl mpôn nơm tâm rnăk val lơh jêng. Nkoch tay mpeh nau kan rklaih nau khuch lơh kon se tâm rnăk vâl, Kruanh n’gâng kan Văn hoá, Thể thao ndrel pâl n’sih Tạ Quang Đông mbơh:

            ‘Mhe rlau aơ, phung hên nkoch tât Luật njrăng, rdâng nau tâm lơh tâm rnăk vâl (rgâl nkra) ndrel tĭng nau nchrăp mra mbơh tât Quốc hội rơh rƀŭn tal 3, nchră tâm rơh rƀŭn tal 4. Luật aơ jêh rnôk geh nchră mra lah ăp nau ueh ngăn tâm nau n’hao nau njrăng, rdâng nau tâm lơh tâm rnăk vâl, tâm nê geh nau njrăng rdâng nau tâm lơh ta kon se lah êng tâm luật aơ”.

            Mpeh nau rgum mât chăm kon se, tâm nê geh nau tâm lơh tâm rnăk vâl, Kruanh n’gâng kan Đào Ngọc Dung, lah kloh:

            ‘Phung hên mra rgum ƀư du trong rjăp ngăn n’hêl ngăn ueh ngăn nau ntrŭnh mrô 121, ntrŭnh kloh nau kan bah ăp ntŭk, ăp gưl ndrel bah Uỷ ban mât chăm kon se. Ntơm bah bôk năm phung hên đă UBND ăp n’gor, nkuăl ƀon têh mbơh lĕ nau ntuh kơl, tơm prăk mât ngih dak, tơm prăk ân nau kan kơl an kon se năm 2022. Tâm nê ăp nau kan geh pă mô đăp mpăn, mra ntơm mêt uănh ndrel geh nau kan ân tâm di ngăn”.

            Đah nau kan bah nŭih dâk bôk, ndơn nau mât ngih dak mpeh kon se, ƀư nau kan mât Ngih dak mpeh kon se, ƀư nau kơt tĭng ndrel uănh nau kơt tĭng pháp luật geh tât kon se, Kruanh Đào Ngọc Dung lah rjăp:

            ‘Lah nŭih ndơn nau kan bah năp Chính phủ, mô knŭng ăp luật tâm nau kan bah nơm ndrel Chính phủ đă, ma ăp luật, ăp nau ntrŭnh bah pháp luật geh tât nau kan mât chăm kon se, mât kơl an kon se. Njêng luh nau kan pháp lý, tâm nau mât đăp mpăn nau dơi ân kon se, kŏ kơt lah ăp nau ton bah lam ntur neh. Nau kan tal 2, ntĭm mbơh ăp nkuăl mbơh nau blau, nau ƀư, nau mât chăm kon se. Nau kan tal pe đŏng lah ntrŭt dăng nau rêh jêng, mât chăm kơl an kon se ntơm bah ăp nau geh jêng bah kon nŭih”.

            Kruanh Uỷ ban Văn hoá ntĭm nti bah Quốc hội Nguyễn Đắc Vinh đă rơh tât uănh khlay nau ƀư jêh ăp nau ntrŭnh mpeh nau njrăng, rdâng nau tâm lơh tât kon se tâm nau rgâl nkra Luật njrăng, rdâng tâm lơh rnăk vâl. Ngăn lah đă Hội đồng thẩm phán Ngih phat dôih ƀon lan gưl prêh ntrŭnh nau ntĭm rklaih ăp nau tât tâm lơi ur sai rnôk ntrŭnh nau dơi rong kon ân geh uănh nau dơi ăp ding bah kon, tâm nê geh nau uănh khlay nau dơi gay ma mât kon se bah nau bu lơh, ndjơh khuch. Nkre n’hao nau kan n’hao nau njrăng rdâng nau tâm lơh kon se tâm ngih săm ƀŭt jêh bah srê Covid-19./.

            Nŭih rblang: H’Thi