VOV4.M'nông: Ăp nar dja, âk nău kan mât chăm Tết an nuĭh ach o, ƀon lan nkual rnoi mpôl đê̆ nău rêh jêr jŏt dôl ƀư lam ntŭk ta n'gor Thiên Huế. Ăp nklâm ndơ răm nău tâm rŏng kơl kônh wa wơt năm mhe.

        Ntrơn sĭt tât ntŭk gŭ mhe tâm ăp nar dăch Tết Nhâm Dần, ur sai yuh Lê Thị Tốt ta thôn 4, xã Hương Hữu, Nkuâl Nam Đông, n'gor Thừa Thiên Huế ntôn lah dôl ma mbơi. Bar pe nar aơ, ur sai yuh rvah rvăch mpôih kuaih uĕh nhih jay mpông mpêr hôm plơ̆ năp plơ̆ kơi nchrâng uănh jay mhe ma nuih n'hâm bêng ăp nău rhơn. Đah âk rnăk, nklăp mô ir jêr ơm rnôk ƀư 1 mblâm jay gưl 4 nâp uĕh, yơn đah rnăk yuh Tốt gay geh ntŭk gŭ nde dja lah du nău mpŏng wơl ngăn. Yuh Tốt nkoch, ur sai yuh tâm gŭ nsum năm 2008, tât năm 2010 ri luh gŭ êng. Dơi geh kônh wa thôn ƀon an blah đar, nuĭh an blah tôn, 2 hê ur sai manh rdâk jay gay geh ntŭk nde mih nde nar. Rlău jât năm aơ, prăk hăn kan bah sai ntop đah nău geh bah bar pe sào mir ba bah yuh rvê an 2 mblâm kon hăn nti hŏ sa mô ăp nđăp mô tŏng moh nkoch tât nău ƀư jay. Yor kơt nê̆ dơi UBMTTQ nkuâl Nam Đông ntop kơl 40 rkeh prăk, ur sai  yuh manh tay 50 rkeh prăk gay ƀư jay gưl 4 têh hvi. Yuh Tốt nkoch: “Ntơm nơh rnăk gâp geh du mblâm jay dêh jê̆, tât khay mih ri way truh, mô dơi gŭ. Dơi Ngih dak ntop kơl jay gŭ kơt aơ rnăk gâp rhơn ngăn. Năm aơ wơt Tết rhơn lơn rđĭl đah ăp năm bah năp nơh”

        Mô êng rnăk yuh Tốt dơi sa Tết tâm jay mhe, ăp nar dăch aơ, rlău 10 mblâm jay bah UBMTTQ nkuâl Nam Đông n'hanh ăp đơn vị, ăp mpôl ăp nuĭh ntop kơl dôl ndăn ƀư lôch jêh gay ngăch jao an kônh wa bah năp năm mhe đŏng. Rĭng ăp mblâm jay dơi ntop kơl ntơm bah 30 rkeh prăk tât 60 rkeh prăk; n'gâng kan n'hanh kônh wa ƀon lan ntop kơl nar luh ƀư. Rlău ma pă an jay tâm rŏng an rnăk dơi kơl, nuĭh ach o jêr jŏt mpeh jay gŭ; n'gâng kan ta ntŭk hôm hăn ôp uănh, rƀah gĭt nô nău bah ăp nuĭh dơi kơl, nuĭh geh nău rêh jêr jŏt, geh tât khuch bah nuh srê COVID-19, rnăk ach o, ƀon lan geh tât khuch tă bah trôk nar lơh, nuh srê geh ma nău ji ngot dŭt ntŭr...gay ngăch ntop kơl phe, ndơ ngêt sa n'hanh pă nklâm ndơ, đăp mpăn ăp rnăk geh Tết răm mƀak da dê. Wa Ta Rương Lương, Groi kruanh UBND xã Hương Hữu, ngoăy tâm ăp ntŭk jêr jŏt đah 95% lah ƀon lan rnoi Cơ Tu bah nkuâl Nam Đông, n'gor Thừa Thiên Huế an gĭt, ăp nar dăch Tết dŭt âk mpôl, nuĭh lŏng nuih n'hâm tât khâl, pă nklâm ndơ Tết nuĭh ƀon lan ta ntŭk:

       “Nău mât chăm an rnăk dơi kơl, rnăk ach o, lơn lah rnăk ƀon lan rnoi mpôl đê̆ mâp jêr jŏt tâm rnôk Tết dja, UBND xã hŏ nchih săk, leo ƀư pă nklâm ndơ Tết an ăp nuĭh dơi kơl, nuĭh rnăk ach o, ăp rnăk jêr jŏt mô pap mô lap ta ntŭk”

        Nkuâl Nam Đông, n'gor Thừa Thiên Huế geh rlău 27 rbăn nuĭh, tâm nê 45% nuĭh lah ƀon lan rnoi mpôl đê̆. Gay đăp mpăn an kônh wa lĕ dĭng nuĭh geh sa Tết rhơn mƀak da dê, ndrel đah nklâm ndơ bah Kruanh dak n'hanh bah n'gor Thừa Thiên Huế, UBND nkuâl Nam Đông nchrăp rlău 4,5 tấn phe n'hanh 200 nklâm ndơ, ăp nklâm ndơ 500 rbăn prăk pă an rnăk jêr jŏt.

         Rlău ma nê, âk mpôl kan, âk nuĭh lŏng nuih n'hâm hŏ hăn khâl, pă nklâm ndơ an nuĭh quet nte, nuĭh ach o, nuĭh geh nău rêh jêr jŏt tă khuch bah nuh srê Covid-19 ta ntŭk. Wa Trần Quốc Phụng, Kruanh UBND nkuâl mpeh yôk yang Nam Đông, n'gor Thừa Thiên Huế an gĭt:

      “Aƀaơ geh dŭt âk ăp mpôl, ăp nuĭh lŏng nuih n'hâm tât khâl pă nklâm ndơ an ăp nuĭh dơi kơl. Nsing kalơ nê mpôl hên ôp uănh tay ăp tŏng kơi ntop ăp nklâm ndơ tât ăp rnăk ach o".

        Ăp nar dja, âk bôk ndeh rdeng nklâm ndơ Tết ndrel dah âk nău rŏng hao rlơ̆ đah ƀon lan ăp nkuâl mpeh yôk yang Nam Đông, A Lưới, n'gor Thừa Thiên Huế. Nău mât nkrum, tâm pă nău tâm rŏng bah ƀon lan hŏ n'hanh dôl ndjôt khay năm mhe răm mƀak tât đah ăp rnăk. Wa Nguyễn Thanh Bình, Groi kruanh UBND n'gor Thừa Thiên Huế an gĭt: N'gor dŭt uănh khlay ntop kơl ăp nuĭh dơi kơl, nuĭh ach o n'hanh ƀon lan nuĭh rnoi mpôl đê̆ gay kônh wa lĕ dĭng nuĭh geh du năm Tết răm mƀak, rhơn răm:

     “Tâm rnôk nô nău nuh srê tât krit nji, ăp rnăk dơi kơl, rnăk ach o n'hanh ăp ƀon lan rnoi mpôl đê̆ mâp dŭt âk jêr jŏt mpeh ndơ dŏng sa khlay. Mpôl hên hŏ mât uănh gay ntop kơl ngăch an kônh wa tâm rơh Tết dja. Bah meng nê hŏ ôp uănh ăp tŏng lĕ rngôch ăp rnăk ach o, rnăk dơi kơl, rnăk nuĭh rnoi mpôl đê̆ ta A Lưới n'hanh Nam Đông n'hanh jao nău dơn kan an UBND nkuâl A Lưới n'hanh Nam Đông ngăch ntop kơl gay kônh wa geh du tết răm mƀak, ăp tŏng ngăn./.”

Nuĭh rblang: Điểu Thân