Tâm bah ri aơ nău ntrôl dăng tăch ndơ tuch tăm an kônh wa ƀon lan rnoi mpôl đê̆ mpeh yôk yang dơi ăp n’gor êng uănh khlay. Tâm nê pah kan ntrŭt nsôr tăch rgâl ngăch  geh nău khlay njêng mâng ntrôl, pơk hvi ntŭk tăch rgâl ntuh kơl an njêng luh ndơ geh tăch bah ăp n’gor, lơn lah kônh wa rnoi mpôl đê̆, lơn lah tâm rnôk lăp rgum nar lơn ma jru hvi.

 Lah n’gor mpeh yôk yang n’har bri, rnoh ƀon lan rnoi mpôl đê̆ âk rlău 80%, ăp năm rlău aơ, Lai Châu way ntrŏng nău tĭng ƀư jăp ăp trong kơl ƀon lan rnoi mpôl đê̆, kơl ƀon lan hun hao wăng sa, đăp mpăn nău rêh, jut jăng ji ngot n’hŭch ach o. Đah 20 rnoi nuĭh  gŭ rêh, tâm nê geh 4 rnoi dŭt đêt nuĭh lah Cống, Mảng, La hủ n’hanh Si la, nău gĭt blău nău way ơm âk mpưm. Bol ma dơh uĕh yơn ntul rlong têh đah n’gâng kan ăp gưl tâm nău ntik n’hao rnoh khlay săk tơm văn hóa đah ăp ƀon lan rnoi mpôl đê̆ ta ntŭk gay ndrel hun hao đŏng. Lai Châu hŏ n’gluh an dŏng nghị quyết mpeh trong kơl hun hao tuch tăm rgum lvang năm 2021-2025. Aơ lah ndơ gay ăp nkuâl, nkual ƀon têh ntrŭt nsôr njêng, wăch rgum ăp hợp tác xã ntuh kơl, tâm rgop kan nsum, ndrel hăn n’gâng kan ta ntŭk rdâk njêng  geh nău dơi bôk nău kan ăp xã du ntil ndơ geh ƀư, năl saơ lah ngoăy tâm âk trong kơl geh nău tam bah Lai Châu gay kơl kônh wa ƀon lan rnoi mpôl đê̆ joi luh trong tăch an ndơ tuch tăm kơl jut jăng ji ngot n’hŭch ach o jŏ jong nâp dăng. Wa Lê Xuân Tiến- Groi giám đốc Sở Công Thương Lai Châu an gĭt:

“Tâm lvang năm 2021- 2025 ri nău ntrŏng hun hao 7 ntŭk tăch ndơ nkual ƀon lan rnoi mpôl đê̆. Đah nău buăt nthoi ăp ndơ geh ƀư tuch tăm bah ƀon lan rnoi mpôl đê̆, Sở Công thương hŏ nsŏng kơl an Ủy ban n’gor rdâk njêng 16 bôk nău kan gay an tĭng ƀư, gay buăt nthoi lĕ rngôch ăp ndơ geh ƀư tuch tăm bah kônh wa lăp tâm ăp siêu thị, ntŭk rgum tăch rgâl n’gor tâm ban du đêt ntŭk ăp n’gor”

Ntơm bah du n’gor mô geh săk tâm bản đồ tơm sa play, aƀaơ Sơn La jêng ntŭk tăm tơm sa play dŭt têh miền Bắc n’hanh dâk tâl 2 lam dak. Play dơi tăch n’gluh tât âk ntŭk khăch khoch lam ntŭr neh n’hanh rnoh khlay nsĭt tay ăp năm ntơm  bah 150 tât 170 rkeh đôlar, hang rmưn rnăk ƀon lan rnoi mpôl đê̆ jêng geh ndrŏng. Ndrel hăn đah nău ntrôl dăng hun hao n’gor jêng ntŭk tăm tơm sa play têh hvi miền Bắc lah pah kan ntrŭt ntrôl rêng tăch ndơ tuch tăm ma ăp nău  kan ntrŭt nsôr ngăch tăch rgâl. Aƀaơ, geh 16 ntil ndơ tuch tăm bah n’gor Sơn La râng tăch n’gluh tâm 12 dak. Ndơ tuch tăm hŏ lăp dơi tâm rêng pă  tăch bah ăp  siêu thị têh kơt: Lotte, Hapro,WinMart. Ndơ tuch tăm kloh uĕh bah Sơn La tĭng kơn njêng dơi nău nsing nơm, săk ntơ lư ta ntŭk tăch rgâl tâm dak n’hanh dak bah dih, dŏng nuĭh dŏng sa ŭch rvăt n’hanh rnê âk mpeh săk kah. Wa Quàng Văn Dương- Nuĭh rgop kan HTX Nông nghiệp Xuân Tiến, Sơn La ŭch rŏng:

“Ŭch rŏng bah kônh wa tâm ban kơt bah hợp tác xã lah ŭch trong tăch ndơ tuch tăm dja, ŭch play rba dja nar lơn ma geh âk trong, gay tăch geh âk play, âk nuĭh gĭt tât, ŭch tâm dak n’hanh ŭch hăn tăch lĕ ma dak bah dih đŏng”

Bình Phước lah ntŭk geh neh ntu tâm dih, geh trôk nar n’hâm sial gay tăm rơ̆ jêng âk tơm điều n’hanh dơi uănh lah me tơm điều rnôk âk bơi  tât 50% rnoh hvi neh n’hanh rlău 54% rnoh âk điều bah lam dak. Găr điều Bình Phước geh nău kah rlău găr điều rvăt n’glăp, rgop ndơ̆ tơm điều jêng tơm công nghiệp săk geh âk nsĭt rnoh khlay tăch n’gluh âk, jêng ndơ tăch n’gluh tơm bah n’gor tâm ăp năm mhe aơ. Wa Thân Thị Xiêm- Giám đốc Công ty TNHH MTV An Thuận Phát ton ndrel hăn đah nuĭh ƀon lan kan lŏ mir Bình Phước tâm trong tăch:

“Mpôl hên hŏ ndrel hăn đah kônh wa ƀon lan bah Bình Phước, bah ƀon lan rnoi mpôl đê̆ tât ƀon lan S’tiêng, ri mpôl hên hŏ tă krêp dêh âk năm lah tâm ton đah kônh wa rnôk khay mih tât, ăp jêr jŏt bah kônh wa ri mpôl hên tâm kơl n’hanh rnôk dơi klêh donh play ri mpôl hên ndrel kônh wa mbăk anh nău dơn kan dja, gay ndơ̆ điều sĭt nhih máy rnă ntêm lor ndơ nkret njêng, di tơm bah Bình Phước gay nta joi geh nău kan an kônh wa lôch ăp nar mih n’hanh lôch ăp nar klêh donh, yor kônh wa bah  neh Bình Phước dơn geh điều lah tơm ndơ klêh tơm dơm”

Tâm bah ri aơ, n’gâng kan công thương way rgum ntrôl dăng ăp nău kan ntrŭt nsôr  ngăch tăch rgâl gay buăt nthoi tơm ndơ tăch rvăt an nuĭh ƀon lan, tâm nê geh ƀon lan rnoi mpôl đê̆ mpeh yôk yang nkual jru, nkual ngai. Bộ Công thương hŏ ndrel ăp n’gor way nsrôih gay ndơ geh ƀư nkoch n’hơ lam ăp ntŭk tăch rgâl n’hanh dơi âk nuĭh joi tât. Ăp nău kan ntop kơl ngăn ngăn dja hŏ njêng geh nău tam uĕh đah rnoh âk ndơ tăch bah kônh wa hao rlău ăp năm n’hanh geh măt ta lĕ rngôch ăp ntŭk tâm pă tăch têh tâm ban kơt tăch n’gluh lam ntŭr neh./.