VOV4.M’nông: Geh Đảng, Ngih dak kơl an, ăp bôk duk rdeng ndoh ndơ, nklêm ndơ tết hăn tât nkuăl gôl dak Trường Sa tâm ăp rnôk dŭt năm, gay ma ƀon lan ndrel tahen ta aơ geh du tết rŏng răm, geh nau ueh, nau duh bah neh kơh. Tâm trong hăn nê, geh âk ngăn nau ntul rlong. Bah nau nchih “Trong hăn tât đah Trường Sa: Tâm bôk duk rdeng năm mhe”, phung he mra gĭt kloh mpeh nau ueh hăn tă bah neh kơh tât nkuăl gôl dak bah neh dak nơm.

Jêh geh nau nteh mbơh ntĭnh neh kơh, duk Trường Sa 571 tâm hải đội 411 lữ đoàn 955 tă bah mpông Cam Ranh hăn leo rmôt hăn kan bah phung hên tât rhơn tết tahen ndrel ƀon lan tâm ăp ntŭk bah gôl dak Trường Sa. Duk geh leo n’ăp ma bâr ngơi, bâr hơm ndrel n’ăp ma nau ŭch rŏng bah neh kơh leo tât gôl dak ueh khlay bah neh dak. Hăn lơn ma ngai neh kơh, nteh dak lêng dăng lơn, net gơm ngai lơn, ăp ntrong dak lơn ma ueh ngăn tâm nâm duk. Dŭt năm, dak lêng n’gănh, sial têh, âk nŭih tâm rmôt hăn bah phung hên saơ geh vay măt, ji bôk, mô geh âk âk ôh nŭih gĭt lah, nau nhul rnôk nơm nchoh klơ duk mô geh kơp ma nŭih dăng mô lah mô dăng, ntă nŭih tă hao klơ duk hăn tâm dak lêng lơn nar lơi đê̆. Tât n’ăp ma ăp nŭih tahen mom, dăng ndrel geh săch lor ân nâp bah năp rnôk hăn, kŏ kơt nê đŏng. Ndri ma nar hăn ăp rnôk kơt nê mro, tât mông sa 4 tơ̆, ma rhiăng nklâm piăng geh rmôt gâm sa kơl an ueh ngăn, tŏng ăp ntil ndơ sa kah ndrel sông kah đŏng. Nhà báo Đức Thu bah Báo Hải quân nkoch:

‘Rơh hăn rnôk ăp phung hên mâp dak lêng n’gănh dăng ngăn, ri ma ăp nŭih kŏ saơ lêt rgănh ngăn yor vay măt, mô ŭch lăp ngêt sa âk ôh, yơn saơ nau lêt rgănh bah ăp nŭih tâm rmôt hăn bah duk aơ ri hên kơt lah geh ntop tay n’hâm gay ma leo ntrong hăn tât đah Trường Sa”.

Gay đăp mpăn ăp mông sa kah, rmôt ƀư gâm sa tâm duk tâm rnôk duk n’gănh mô geh nau nơih ôh. Ăp glah gâm tâm năch tâm yan saơ ân geh kât ân nâp đah ăp tơm si gay ma der păng rlât, tup. Mô lah kơt rnôk ndjôt payh, goh, siăt trau gâm sa kŏ ân geh nau ƀư ân êng gay ma bah nau khuch rmanh tâm ngih năk. Tĭng nô Trần Nam Giang, nŭih tơm mât rmôt ƀư nau leo gâm sa tâm duk nkoch, tâm nau mât ndoh ndơ ngêt sa ndrel gâm ndơ sông sa kŏ ân geh nau blau êng đŏng:

‘Đah nau blau ƀư nau kan kơl an an tâm duk mpan gay ma hăn tât nkuăl gôl dak Trường Sa tâm âk năm bah nơm, gay đăp mpăn mông ngêt sa geh piăng kah ndrel ndơ sa kah ri rmôt hăn, ri ndơ ngêt sa phung hên dŏng tĭng nau kơt klôn bên, djăt ngăch ôm, hên gâm lor, gay ân đăp mpăn nau ndrih ueh, jêh ri mơ sa ăp ntil ndơ sa geh têm dơi jŏ lơn. Ndơ ngêt sa kŏ geh n’hao lơn. Tâm rnôk pah kan, phung hên tâm pă tĭng rmôt, gay geh mông kơl an rmôt hăn ân ueh lơn”.

Nau kan tơm bah duk 715 lah leo rmôt hăn kan tât rhơn tết tâm Trường Sa. Êp ăp ntil ndơ sa vay geh, rmôt hôm leo n’ging mai, tơm quất, n’ha nklâm bánh, phe m’êt, sur, bánh mứt kẹo...leo ndơ ngêt sa tết bah neh kơh tât ma dak lêng. Tâm dik hăn tât Trường Sa rơh aơ hôm geh âk tơm ndrih gay ma pă ân ăp gôl dak mô chăt si jêh rnôk phŭt mrô 9 mhe nơh. Ăp nklâm ndơ aơ geh rmôt kan mât ueh ngăn. Thiếu tá Trần Hữu Hào-Groi kruanh ƀư nau kan kơl an bah rmôt 146, nkuăl 4 Hải quân mbơh:

“Yor geh nau khuch tă bah bri ji kăt, bri n’ik hô ir, sial dăng, dak n’ganh hô, rmôt hăn kan hên hŏ nchrăp ăp rmôt ntâl ân tâm dŭng, dăp rgum, nking rdâng ndoh ndơ, ndăn dak dŭng geh tâm duk gay ma tŏ ân tơm si rih mô geh djơh kro. Tâm rnôk hăn leo ndơ tă bah duk jur tâm dâng, ntơm bah tâm dâng leo tât gôl dak, rmôt hên rđau ƀư ân ueh nau nklâm leo, nkŭm ƀư, mô ân dak lêng lăp tâm ndoh ndơ, đăp mpăn ăp ntil ndơ ueh kah ngăn rnôk tât tâm ty bah tahen ndrel ƀon lan tâm dak lêng”.

Yan dak lêng n’ganh kŏ ƀư nau kan nchuăn leo ndoh ndơ tă bah dak lêng lăp gôl dak lơn ma jêr đŏng. Duk Trường Sa 571 knŭng drâm tâm ăp gôl dak, hôm nau leo nŭih ndrel nchuăn ndoh ndơ jêh nê geh ƀư leo ma duk kon jê̆. Dak n’găng têh, ăp nŭih jur tâm duk jê̆ nsoh ao mih, moh ndơ dŏng geh ân tâm dŭng ni lông gay ma der bĕ ma dak lêng. Let rlau âk nau jêr, rmôt hăn kan phung hên dăch dŭt kŏ dơi tât ăp ntŭk gôl dak bôk năp tâm Trường Sa, ndrel pă ân ăp tahen dak lêng ta aơ ăp ntil ndơ geh đăp mpăn hôm ueh ngăn. Ndơn ăp nklâm ndơ tă bah neh kơh, chính trị viên gôl dak Đá Nam Hoàng Kim Lâm mô mpôn nau rhơn:

‘Đah cán bộ tahen tâm dak lêng, rnôk ndơ geh ăp nklâm ndơ tă bah neh kơh njoăl tât, săk hên nơm ri rhơn ngăn, hên saơ phung hên kơt lah tâm dăch lơn ma rnăk vâl, ma ƀon lan nơm, tâm rnôk ƀư nau kan tâm gôl dak aơ”.

Nau rhơn bah cán bộ tahen ndrel ƀon lan tâm ăp gôl dak tâm Trường Sa rnôk geh ndơn ăp nklâm ndơ năm mhe bah neh kơh nê kŏ lah nau rhơn bah rmôt hăn kan phung hên, bah ăp rmôt nŭih ƀư nau kan tâm duk 571 dôl rdneg leo năm mhe tât ăp gôl dak, dak lêng ueh khlay bah neh dak./.

Nŭih rblang: H’Thi