VOV4.M’nông:  Ta nkuăl ƀon têh Hồ Chí Minh, Uỷ ban Rnâng kan Quốc hội ƀư rơh rƀŭn lôch nau kan Hội đồng nhân dân ăp n’gor, nkuăl ƀon têh mpeh ba dâng năm 2021 ndrel ntrŭnh nau kan năm 2022. Râng rơh rƀŭn geh rlau 160 nŭih lah rđau kan Hội đồng nhân dân, ăp rmôt kan ntoh măt Quốc hội tă bah 20 n’gor, nkuăl ƀon têh mpeh ba dâng. Lôch nar rƀŭn, Kruanh Quốc hội Vương Đình Huệ ndơ̆ luh 8 nau kan gay njrăng ƀư.

            Gay nau kan bah HĐND săk tam ngăn tâm rơh tât, ta nar rƀŭn, ăp ntoh măt hŏ ndơ̆ luh âk nau tă blau nau kan kŏ kơt lah nau đă Quốc hội. Tĭng Groi Kruanh HĐND n’gor Vĩnh Long Nguyễn Minh Dũng, Uỷ ban Rnâng kan Quốc hội ân ơm ntrŭ nh nau kan rpaih mpeh nau ƀư kan bah HĐND gay ăp nkuăl nchrăp, ƀư ndâk nau kan bah gưl kan nơm ân tâm di ma nau ngăn:

            ‘Uỷ ban Rnâng kan Quốc hội ân geh ƀư nau mêt uănh nau rklaih nau đă bah cử tri ngăn ndrel kloh lơn. Nau rklaih phong dôih ri luật geh tŏng hôm, yơn nau ƀư đah nau rklaih nau đă ri ê geh nau ntrŭnh gay ma rgâl. Nau ngăn rnôk aơ du đê̆ ntŭk kan rklaih mbrơi ngăn, nŭih mô tâm ban, âk nau kan geh rgum mbơh tâm rơh rƀŭn aơ, yơn geh rnôk tât rơh rƀŭn ba kơi mơ geh ntrŭnh ơh nau, mbrơi ngăn"”

            Ntoh nau tâm nar rƀŭn, Kruanh Quốc hội Vương Đình Huệ rnê prêh nau kan bah ăp ntŭk kan ƀon lan đă, tâm năm 2021, lah du năm geh nau khlay, bôk năp ƀư nau Ntrŭnh Đại hội Đảng lam dak tal XIII, năm ƀư ntoh măt Quốc hội, HĐND ăp gưl ndrel năm geh nau jêr yor nau khuch hô ngăn bah srê Covid-19:

            ‘Kơt lah geh du nau mhe lơn, blau lơn, geh mhe lơn, mât tâm dăch ma nau rêh lơn, tŏng dơi ăp nau đă ndal bah ntŭk kan ƀon lan đă ndrel rgop nau khlay ndrel lam ntrong kan chính trị, tâm dâng nau rđau bah Đảng, ƀư nau ntrŭnh Đại hội Đảng lam dak, Nau ntrŭnh Đại hội Đảng bộ ăp nkuăl, rgop nau ndrel lam dak ƀư ueh nau kan bar ntil nkre njrăng rdâng srê Covid-19, nkre hun hao văng sa ndrel ăp nau kan êng êng ndrel ndâk nau văng sa rêh jêng”.

            Êng nau ƀư 2 rơh rƀŭn, âk n’gor, nkuăl ƀon têh ƀư rƀŭn gay ntrŭnh âk nkô̆ khlay tâm nau njrăng, rdâng srê Covid-19 tĭng nuih n’hâm nau ntrŭnh 30 bah Quốc hội gưl XV ndrel nau kan ntrŭnh văng sa, rêh jêng bah nkuăl. HĐND ăp n’gor ntrŭnh nau njêng trong pháp lý khlay tâm nau ƀư nau kan hun hao văng sa rêh jêng, njrăng rdâng srê Covid-19. Ngăn lah, geh âk ntŭk ƀư tâm lôch năm kan.

            Mpeh nau rƀŏng, nau kan năm 2022 bah HĐND n’gor, nkuăl ƀon têh, Kruanh Quốc hội Vương Đình Huệ hŏ leo 8 nau kan, tâm nê geh đă, lŏ ntrŭnh, ƀư ueh nau kan bah HĐND geh ntrŭnh tâm Luật ƀư n’gâng kan n’gor. Lŏ kơp, ndâk ndrel ƀư jêh ndrle ƀư Bôk nau kan rgâl mhe, n’hao nau nâp bah HĐND ăp gưl ngăn lah gưl n’gor. Ndâk nau kan ân 5 năm, ăp nau kan ngăn. Ƀư ân ueh ngăn nau kan ndâk n’gâng kan mpeh nau kan nŭih pah kan kơt sŏk phiếu rnơm, nklăch phiếu rnơm, ntrŭnh nau khlay tâm nau mêt uănh, kơt tĭng Hiến pháp ndrel pháp luật tâm nkuăl, uănh nau ntrŭnh pháp luật bah UBND ndrel gưk ndrel nau ntrŭnh bah HĐND ăp gưl. Kruanh Quốc hội Vương Đình Huệ lah rjăp:

            ‘HĐND ăp n’gor, nkuăl ƀon têh ân geh ntrŭnh ăp nau gay ma ƀư ndrel mêt uănh nau ƀư nau kan bah ăp nau ntrŭnh bah Quốc hội, Chính phủ mpeh nau hun hao văng sa, rêh jêng, tơm prăk, ntuh kơl nsum năm 2022, ăp bôk nau kan nkô̆ nau bah neh dak, ngăn lah Bôk nau njrăng, rdâng srê Covid-19 lvang năm 2022-2023 tĭng nau kan ƀư ân ueh, đăp mpăn, nkân njrăng srê ân tam bah njrăng srê Covid-19 ndrel Bôk nau kan ndâk tay nau hun hao văng sa, rêh jêng. Ƀư nâp, geh nau ntop kơl an ân geh ƀư uănh 2 nau kan aơ ndrel nau ntrŭnh mpeh văng sa, rêh jêng bah Quốc hội, Chính phủ mpeh nau rƀŭn bah Trung ương”.

            Kruanh Quốc hội Vương Đình Huệ đă HĐND ăp n’gor, nkuăl ƀon têh n’hao nau nkoch mbơh ndrel dŏng nau kan mhe kơl an nau kan bah Hội đồng nhân dân kơt lah ăp rơh rƀŭn mô kâp săm ƀŭt, knŭng yơr ty điện tử tă bah ngai yor ntrơn rgâl mrô, uănh đah rup gui, lŏ kơp, ƀư jêh ndrel ƀư nau ntrŭnh tâm rgop nau kan đah Rnôt kan ntoh măt Quốc hội đah HĐND, Rnâng kan HĐND, đah UBND ndrel MTTQ Việt Nam n’gor, nkuăl ƀon têh gay ma ƀư ueh săk tam bah ntŭk kan. Nkre ƀư ân ueh lơn tay nau ntrŭnh mpeh nau pah kan bah HĐN D n’gor, nau kan vơt ƀon lan bah Rnâng kan HĐND n’gor, ntoh măt HĐND n’gor, nau ntrŭnh kan bah rơh rƀŭn HĐND gay ma mât đăp mpăn nau kan rgum ƀon lan ƀư tơm ndrel ƀư nau kan, nuih n’hâm bah rmôt kan.

            Kruanh Quốc hội Vương Đình Huệ mbơh, Uỷ ban Rnâng kan Quốc hội lŏ ƀư kloh nkô̆ nau, ƀư jêh ăp nau ntĭm nti ndrel mêt uănh bah nau kan bah Hội đồng nhân dân./.

            Nŭih rblang: H’Thi