Ntoh nau tâm nar rƀŭn, Kruanh Hội đồng Dân tộc bah Quốc hội Y Thanh Hà Niê Kđăm mbơh, Quốc hội mêt ntơm ƀư nau kan mêt uănh gưl prêh nkô̆ nau “Nau tă dơi geh ƀư bah ăp nau ntrŭnh bah Quốc hội mpeh nau nchrăp 5 năm lvang năm 2021-2025: Bôk nau kan bah neh dak ndâk njêng ƀon lan mhe; Bôk nau kan neh dak n’huch ach o nâp nâl’ Bôk nau kan neh dak hun hao văng sa, rêh jêng nkuăl rnoi mpôl đê̆ ndrel gôl yôk”. Aơ lah nkô̆ nau mêt uănh geh nau rgum ndrel geh ƀư tâm n’gul vah (lvang năm 2021-2025).

Tât rnôk aơ rmôt kan mêt uănh hŏ ƀư đăp mpăn tĭng di nau nchrăp luh. Rmôt kan mêt uănh hŏ mbơh nau tă geh đah Kruanh Quốc hội, ăp Groi Kruanh Quốc hội, mbơh nau Uỷ ban Rnâng kan Quốc hội tâm rơh rƀŭn tal 25 (khay 8 mhe rlau) ndrel rơh rƀŭn tal 26 (tâm khay 9). Rmôt kan mêt uănh rđau ƀư nau kơl nau kan rgum, rgum ăp nau đă bah bah Uỷ ban Rnâng kan Quốc hội gay ndâk nau mbơh rgum, mbơh gleh ndrel nau ntrŭnh mêt uănh nkô̆ nau gay Quốc hội uănh tâm rơh rƀŭn tal 6, khay 10 dăch tât.

Kruanh Hội đồng Dân tộc mbơh kloh, lơ 12/9/2023, Chính phủ geh nau mbơh “Mpeh nau geh tă dơi ƀư, nau jêr, nau nkol tâm nau ntrŭnh 3 Bôk nau kan bah neh dak lvang năm 2021-2023 ndrel đă ntrong kan, nau ƀư gay ma doh rklaih nau jêr, nkol, ntrŭt dăng nau ƀư ăp Bôk nau kan tâm rơh tât”, tâm nê mbơh du đê̆ nau jêr, nau nkol tâm nau ƀư 3 bôk nau kan bah neh dak ndrel đă du đê̆ nau kan hôm ntoh.

Chính phủ đă ân ntoch jong nar ƀư, pă tơm prăk tât lôch lơ 31/12/2024 đah tơm prăk ngih dak bah ăp bôk nau kan beh dak ê dơi geh pă tơm prăk tâm năm 2023; ntruch tay nar, ê mbơh ma Quốc hội uănh, ntrŭnh nau kan rlong ƀư nau pă gưl ân gưl nkuăl tâm nau mât, ƀư ăp Bôk nau kan bah neh dak tâm rơh rƀŭn tal 6 bah Quốc hội.

Kruanh Hội đồng Dân tộc bah Quốc hội Y Thanh Hà Niê Kđăm mbơh lah, ăp nkô̆ mhe nkoch lah nau khlay, geh dơi tât âk nau kan bah nau rêh jêng, ngăn lah đah nŭih ach o, nŭih rnoi mpôl đê̆, nkual jêr jŏt, ngăn ngên jêr jŏt bah neh dak. Đah nuih n’hâm ƀư ndrel, ndâk ndrel ma Chính phủ, ta rơh rƀŭn aơ, Kruanh Hội đồng Dân tộc bah Quốc hội Y Thanh Hà Niê Kđăm đă pă ntoh măt ndrel nchră, joi luh nau rklaih ăp nau đă, tă bah nau ngăn.

Lôch rơh rƀŭn, Kruanh Hội đồng Dân tộc bah Quốc hội Y Thanh Hà Niê Kđăm mbơh, jêh âk nar pah kan ndal, rjăp, đah âk nau rgop mbơh rgum, rơh rƀŭn hŏ ƀư jêh du đê̆ nkô̆ nau nchrăp luh.

Ntoh măt rmôt kan mêt uănh, Kruanh Hội đồng Dân tộc lah kloh, Rmôt kan mêt uănh kơp dơn ndrel rnê prêh nuih n’hâm ƀư kan bah ăp nŭih kan bah Rmôt kan mêt uănh tâm rơh rƀŭn. Ngăn lah ăp nau rgop mbơh hŏ hăn tâm di tơm, nkô̆, njêng nau tâm ban mpeh nau mĭn, nau kan, ntoh nau mĭn bah Quốc hội hăn nsum ma Chính phủ gay ntrŭt dăng ngăch nau rklaih, doh nau jêr, nau nkol tâm nau ntrŭnh ƀư ăp nau kan bah neh dak.

Gay năn doh rklaih nau jêr, nkol, ntrŭt dăng ngăch nau ƀư ăp nau kan bah neh dak tâm rơh tât, Kruanh Hội đồng Dân tộc Y Thanh Hà Niê Kđăm đă N’gâng kan nchrăp kan ndrel ntuh kơl (ntŭk kan Rnâng kan Rđau ƀư ăp Bôk nau kan bah neh dak) tâm rgop ngăn đah rmôt ƀư nau kan mêt uănh ndrel ăp ntŭk kan geh tât gay rgum nau mĭn bah rmôt kan mêt uănh, ƀư jêh nau mbơh mêt uănh, mbơh kloh, nchrăp nau ntrŭnh ndrel nau đă, săm ƀŭt geh tât, mbơh Quốc hội tâm rơh rƀŭn tal 6 tĭng nau ntrŭnh. Nkre đă rmôt ƀư kơl nau kan Rmôt kan mêt uănh nchrăp tâm ban đah N’gâng kan nchrăp kan ndrle ntuh kơl, ndrel ăp ntŭk kan, n’gâng kan geh tât mpeh ăp nkô̆ nau tâm nchră ta rơh rƀŭn aơ gay ƀư jêh nau nchrăp ntrŭnh, dăn nau rgop bah Uỷ ban Rnâng kan Quốc hội./.