Nar rnăk vâl nô K'Long Ha Juil, ta thôn 6, xã Lạc Dương, n'gor Lâm Đồng ntrơn lăp tâm ngih mhe, lam ƀon ndrel rhơn. Aơ lah rnăk dăch dŭt tâm rnoh 9 rnăk geh jut ngih truh sat, ntoh nau kan lĕ thôn mô hôm ngih truh sat. Nau rêh jêh aơ âk năm mô tŏng prăk, nô jêr ma dơi rgum tŏng prăk ndâk ngih. Rnơm nau kơl an jut ngih truh sat bah Ngih dak, rnăk vâl ntop tay bơi tât 250 rkeh prăk, nŭih tâm rnoi mpôl rgop prăk, ƀon lan rgop n'hâm, ngih jay têh hvi, nâp nâl dăch dŭt kŏ jêh ueh đŏng. "Oh nô, me bơ̆, kônh wa tâm ƀon ntop kơl, kơl tŏng prăk rdâk njêng du mblâm jay mhe, geh jay dŭt rhơn, đăp mpăn nău rêh n'hanh mât chăm ƀư sa".

Ta thôn 6, xã Lạc Dương, ntŭk bơi tât 100% ƀon lan geh chroh, nuih n'hâm tâm rnglăp, tâm kơl lĕ jêng nău ueh tâm nău rêh nsum mpôl. Mô dơn tâm kơl jut jăng ngih rông mpông sat, nŭh geh nău dơi hôm nha kơl prăk, rnăk mô tŏng nŭh kan geh ƀon lan tâm rgop soan, rgâl soan tâm nău pah kan jan sa. Bu ranh ƀon Lơ Mu Ha Djô, nŭh geh nău knơm ta thôn 6, lah ngoăy tâm âk nŭh tâm rgop njêng nău tâm rnglăp kơt nĕ. bâh ăp rơh rƀŭn nchră thôn n'hanh ăp rơh tâm mâp ăp rnăk vâl, wa rgŏ jă ƀon lan mât uănh pah kan jan sa, rgâl mhe tơm tăm, tâm kơl rlet rlău nău jêr jŏt, jut jăng nău way ơm rluk mâl n'hanh mât đăp mpăn ƀon lan. Đah wa, rêh "uĕh nău rêh, uĕh nău tĭng" ân ntơm bah ăp nău kan ngăn ngăn.   "Kŏ nkoch mbơh ân bu gay ƀư mhâm ƀư ân tâm pă ndơ sa, kơl an ăp rnăk mô tŏng sa, mô tŏng ngêt, gay ndrel geh nau rêh đăp mpăn nsum".

Mô dơn ta Lạc Dương, ta xã Sơn Điền, âk bu ranh ƀon, Bí thư Chi bộ thôn, nsrôih rgŏ jă kônh wa gŭ rêh "rêh uĕh, chroh di". Kơt ta thôn Ka Sá, đah nău leo kan bâh bu ranh ƀon, chi bộ n'hanh rnâng kan mât uănh thôn, kônh wa lĕ nsrôih rgâl tơm tăm, mpa rong, ngăn lah hun hao cà phê, nău rêh ăp nar lơ ma ueh. Đah êng bu ranh ƀon K'Lãng, păng leo kônh wa thôn Ka Sá mô dơn bâh nău mbơh tơih, rƀŭn nchră, ma hôm nha leo lor bôk năp, bâh rnăk vâl nơm.   "Ta aơ, êng kônh wa dăch dŭt ri he geh hăn tĭng jay, đah nău nsum ri hôm nkoch trêng rgŏ jă ma ăp rơh hop lah tơm... He ân ntrong leo lor. Bôk năp lah rnăk he, mât nău way ơm, nău uĕh rnoi nuĭh... ntĭm nti tay an kon său bah kơi tay gay ma mô ntlơi nău uĕh văn hóa".

Xã Sơn Điền geh rlău 2.000 nuĭh tĭng chroh Công giáo n'hanh Tin lành. Gay ntik n'hao nău khlay kan bah bu ranh ƀon, nuĭh geh nsing nơm n'hanh chức sắc tôn giáo, n'gâng kan ta ntŭk way kan nsum nkoch trêng, rgŏ jă kônh wa hun hao wăng sa, rdâk njêng ƀon lan mhe. Mhe aơ, ăp mpôl chroh ta ntŭk tâm ban ŭch đah trong nchrăp tĭng ƀư nău rêh uĕh lăng tâm nău tâm nđăp, khĭt yot, lễ hội. Nkual ƀon lan hôm dăn đă ăp nuĭh leo chroh nkre nkoch trêng, rgŏ jă tĭng chroh tâm ăp rơh rgum rƀŭn chroh ăp pơh. Wa Vũ Đức Nhuần, Kruanh UBND xã Sơn Điền lah rjăp:  "Mpôl hên saơ lah, gay dơi geh kơt nê ri nău khlay bah ăp kruanh chroh rƀŭn, bu ranh ƀon lah dŭt khlay. Mpôl hên uănh lah tâm bah ri aơ, nău khlay bah kruanh chroh rƀŭn, bu ranh ƀon lah dŭt n'hâm nsrôih… Tâm let năp tay, xã mbra ntik n'hao tay nău khlay dja bah ăp kruanh chroh rƀŭn n'hanh bu ranh ƀon, gay mhâm ƀư ndơ̆ ăp kruanh chroh rƀŭn n'hanh bu ranh ƀon jêng ăp nuĭh, ăp nuĭh nkoch trêng ta nklang ƀon lan, kơl an kônh wa nar lơn ma tĭng ƀư jăp nău khlay kan bah he đah nău ƀư du hê nuĭh ƀon lan nsrôih uĕh bah xã Sơn Điền".

Lam n'gor Lâm Đồng aƀaơ geh nklăp 900 nuĭh geh nsing nơm tâm nkual ƀon lan rnoi mpôl đê̆. Dăch ƀon lan, gĭt wât nău way ơm n'hanh dơi ƀon lan nsing nơm, khân păng lah ntung njŏ đah gưl ủy, n'gâng kan đah ƀon lan, rgop rgŏ jă kônh wa hun hao wăng sa, mât ndray săk tơm văn hóa, rdâk tay nău tâm rnglăp.