VOV4.M’nông:   Nău kơl trok nkhôm ntŭk ntô bri ndrel ăp nău ƀư săk rnglăy bah Tơm prăk nkrem mât njrăng n’hanh hun hao bri n’gor Kon Tum dôl rgop ƀư rgâl nău wât bah nuĭh ƀon lan, ntŭk kan tơm bri tâm trong kan mât uănh, njrăng n’hanh hun hao bri ta ntŭk.

          Njŭn mpôl hên hăn khâl 15ha bri tăm bah 25 rnăk ƀon Đăk Rô Gia, xă Đăk Trăm, nô A Ngực, Bí thư Chi bộ, kruanh thôn an gĭt, êng rnăk wâl nô geh 7 sào neh, yor tăm bum dŭt âk năm neh sât blak hô săk geh ăp năm tăch bum knŭng geh nklăp 13 rkeh prăk. Đah nău wât hăn lor, ntrong lor năm e nô an rgâl tăm si bạch đàn n’hanh rgŏ jă ƀon lan ndrel ƀư. Nô A Ngực mĭn lah, nuĭh ƀon lan ƀon Đăk Rô Gia dŭt rhơn đah nău geh bah nău tăm bri yor ƀon lan lĕ saơ săk rnglăy bah nău râng mât uănh njrăng n’gang bri geh prăk khay trok nkhôm ntŭk ntô bri bah rnoh neh bri yor Công ty TNHH Du ntŭk kan mât tăm bri Đăk Tô jao:

“Thôn geh mât uănh bri hon êng Tiru khu 289 dĭng lĕ rnoh neh lah 288ha. Công ty lâm nghiệp trok nkhôm ăp rơh du tơ̆ geh 45 rkeh prăk. Geh rơh hao yor dơi mât ntŭk ntô uĕh. Ban nău kan thôn rƀŭn đah Công ty ăp nuĭh râng ta thôn ăp nar hăn mât uănh bri, jêh nĕ kâp njrăng thôn nchih săk na nê̆ trok an khân pơng”.

Nô A Ngực (tal 2 bah đah ma) tâm nchră kỹ thuật njrăng n’gang bu tuh an mir bạch đàn cự vỹ bah rnăk wâl.

Xă Đăk Trăm, nkuăl Đăk Tô, n’gor Kon Tum geh rnoh nuĭh rlău 5.000nuĭh, tâm nĕ kônh wa rnoi mpôl đêt Xơ đăng geh tât rlău 95%. Năm aơ xă Đăk Trăm dơi nkuăl Đăk Tô jao tăm mhe bah 120-140ha bri. Đah jŏ jŏng rnoh neh bri tăm mbra an ăp rnăk ta xă Đăk Trăm geh tay ndơ geh. Nău geh lĕ saơ bah năp măt lah dơi dêr nău mpŭng lĭr neh ntu. Đah rnoh neh tơm tăm ƀa ƀă, nuĭh ƀon lan mbra nsrôih lơn tâm nău ntuh kơl n’hao săk geh, uĕh kah gay geh săk rnglăy wăng sa ta du ntŭk rnoh neh. Wa Trương Đình Tuệ, Kruanh UBND xă Đăk Trăm, an gĭt săk rnglăy ngăn bah nău ƀư tĭng nău kơl trok nkhôm ntŭk ntô bri lĕ rgop ƀư rgâl nău wât bah nuĭh ƀon lan n’hanh ăp nsum mpôl ta xă tâm nău mât uănh, hun hao bri:

“Nsum mpôl ăp thôn: Đăk Đrinh, Đăk Rô Gia, Tê Pheo, Tê Peng, Đăk Trăm lĕ ƀư tĭng nău dơn jao mât uănh bri bah Công ty lâm nghiệp Đăk Tô. Tâm rnôk râng mât njrăng ri lĕ ngăch saơ, nking n’gang ăp nău tih rŭn in neh bri, phah bri, nkre râng nău njrăng n’gang ŭnh sa bri. Bah geh prăk ntŭk ntô bri rgop n’hao nău rêh an nuĭh ƀon lan, n’hao nău geh. Lơn lah tâm ăp rơh nchrăp năm nti mhe, rơh lễ, Tết Công ty tâm rgop trok nkhôm an nuĭh ƀon lan geh ndơ rwăt kho ao, ndrôm sam ƀŭt an ăp mon hăn nti”.

Cán bộ lâm nghiệp rgŏ jă nuĭh ƀon lan nsrôih râng hun hao bri.

Bah rnoh n’gor Kon Tum jao tăm 570ha bri tâm năm aơ, tât dŭt khay 8 UBND nkuăl Đăk Tô lĕ ntĭm, kơl ăp xă tăm bri 450ha bri, rnoh neh ƀa ƀă jao an Công ty TNHH du ntŭk kan lâm nghiệp Đăk Tô. Wa Nguyễn Công Tường, Groi Hạt trưởng Hạt kiểm lâm nkuăl Đăk Tô an gĭt, tât aƀaơ nkuăl lĕ tăm geh 539ha, geh rlău 94% nkôp đah trong nchrăp jao. N’hêl na nê̆ tâm rnôk tăm bri ta ntŭk an saơ nău geh bôk năp:

“Lơn lah nău lăp bah lĕ trong chính trị, ăp gưl n’gâng kan ƀon lan lĕ nsôih nkoch trêng, rgŏ jă nuĭh ƀon lan tăm bri tĭng trong nchrăp. Âk rnăk lĕ wât nău dơi geh bah nău kơl ntop kơl tăm bri bah ngih dak jêng lĕ dăn râng tăm bri gay mât njrăng ntŭk ntô bri dak, n’hao nău geh an hun hao wăng sa”.

Tĭng nău mbơh bah Tơm prăk nkrem mât njrăng n’hanh hun hao bri n’gỏ Kon Tum, kơp tât nar 14/6/2022, ntŭk kan lĕ jêh nău pă prăk ntŭk ntô bri năm 2021 an ăp nuĭh tơm bri đah dĭng lĕ rnoh prăk bơi 307 rmen 600 rkeh prăk. Ndrel đah nĕ pă trok prăk ntŭk ntô bri năm 2022 lah rlău 99 rmen prăk. Tơm prăk geh bah nău ƀư tĭng nău kơl trôk nkhôm ntŭk ntô bri dôl rgop ƀư rgâl nău wât bah nuĭh ƀon lan kơt ăp ntŭk kan tơm bri ta Kon Tum tâm trong kan mât uănh, njrăng n’gang n’hanh hun hao bri.

 Nuĭh rlang: Y Sưng Phê Ja