VOV4.M’nông: Bol ma rdâng đah âk nau jêr, yơn lah mom ndăm tahen biên phòng hôm nsôih ngăn ma nau kan, njêng nau mhe, nuih n’hâm jang dăng tâm ăp nau kan...Khân păng geh ntit kơt lah ăp mănh ang tâm rnôk phŭt sial, mih nar gay ma ndâk nkuăl n’har bri nar lơn ma sam geh. Phung he nsum tâm mơng đah du hê bu ndăm mhe geh rnê lah Nŭih mom ntoh lư geh nau blau lam tahen năm 2021, nê lah Thiếu tá Trần Minh Cường, Chính trị viên tahen biên phòng mpông Cửa Việt, tahen biên phòng Quảng Trị.

            Tâm 10 nŭih mom ntoh lư tahen biên phòng năm 2021, Thiếu tá Trần Minh Cường, Chính trị viên tahen Đồn Biên phòng mpông đah dak ba dih Cửa Việt, tahen biên phòng Quảng Trị lah nŭih êng du hê mât nau rđau kan, rđau rmôt, ri ma nau blau kŏ geh nau êng.

            Lôch nti Học viện Biên phòng dơi jêng nŭih blau bôk năp, geh ngih săm ƀŭt nkân ƀư giảng viên yơn đah nau ŭch kơl an mom ndăm tâm nkuăl n’har bri bah neh dak, Cường dăn sĭt tahen biên phòng Quảng Trị pah kan. Tâm đồn biên phòng Hướng Lập, Cường ƀư rjăp nơm lơn bah ăp nau kan, nau geh jao. Nau ntoh ngăn bah tahen mom aơ lah nau kan ngăch ngâr, ndrel nau blau ngơi ueh ngăn. Păng lŏ blau mprơ, thể dục thể thao ri ma tâm rgop đah nkuăl, ƀư âk nau kan ueh, rgum âk mpưm bu mom râng, tâm di ma nau ngơi “Moh cán bộ, ri nau kan nê”. Păng nsôih râng kơl an ân gưl uỷ, rđau kan rmôt kan ƀư ân geh săk tam ăp nau kan, nau ƀư, nau rgoư jă kot: “Tahen biên phòng nsum n’hâm ndâk njêng ƀon lan mhe” “n’hao nhoat jâng oh hăn nti, kon rong tahen biên phòng” “Nŭih blau bah biên phòng” “mông nti n’har bri” “Nai nti grat ndrih”...đah ăp nau blau, nau dơi ngăn tâm nau kan, păng geh rđau kan tahen Biên phòng đă ƀư Bí thư Đảng uỷ-Chính trị viên Đồn biên phòng mpông đah dak ab dih cửa Việt knŭng 29 năm.

            Năm 2021 lah năm geh âk nau blau bah Thiếu tá Trần Minh Cường rnôk Đồn Biên phòng mpông đah dak ba dih Cửa Việt geh nau dơi lah rmôt kan neh nau nâp ndrle geh N’gâng kan neh dak pă săm ƀŭt rnê tâm nau njrăng, rdâng srê Covid-19, UBND n’gor pă nau nkhôm yor nau blau ngăn tâm 5 năm ƀư nau rđau kan mrô 05 bah Bộ chính trị mpeh nau ntrŭt dăng nau ntĭm nti ndrel pah kan tĭng nau mĭn, nau blau, nau kan bah Hồ Chí Minh, lvang năm 2016-2021 ndrel ƀư Bôk nau kan “N’hao nau mbơh, ntĭm pháp luật ân cán bộ, ƀon lan nkuăl n’har bri, gôl dak lvang năm 2017-2021”. Êng nê rmôt kan geh UBND n’gor Quảng trị pă nkhôm ndal tâm nau kan hăn kơl an duk Viet-ship 01...

            Mô klach nau jêr, mra kơl an nŭih ƀon lan mâp rmanh, thiếu tá Cường hŏ râng ndrel rđau rmôt kan kuăl 1.845 tơ̆ duk du der phŭt; kơl an ân 8 duk, đah 61 nŭih. Nkre, râng nau ndâk 13 rmôt mât duk đăp mpăn, 18 rmôt mât đăp mpăn, bah nê, mbơh pă ma rhiăng nau geh rnoh khlay tât nau kan ƀư tơm, mât đăp mpăn, rnă njrăng tâm nkuăl, tâm rgop nsum ma rmôt kan rklaih tĭng nau ntrŭnh.

            Srê Covid-19 ntoh luh, Đồn biên phòng mpông đah dak ba dih Cửa Việt mât “Ntŭk nkoch mbơh nau njrăng, rdâng srê Covid-19” tâm ntŭk ntoh ngơi bah nkuăl. Thiếu tá Trần Minh Cường nchrăp nau ntoh kŏ kŏ kơt lah nau mbơh pă, nkoch nau tât ƀon kan. Đah nau rđau kan bah nô, ntơm bah nau rgŏ jă nau kan “Lam ƀon lan râng nau njrăng, rdâng srê ndrel luh lăp dak tih dôih” tâm nkuăl n’har bri, cán bộ rmôt kan hŏ ƀư ân 3.040 rnăk vâl, tâm 3 xã, nkuăl têh tâm 18 thôn, khu phố tâm nkuăl nơm mât hŏ kí ton nau njrăng, rdâng srê Covid-19. Đah nau tâm boh, nô hŏ kuăl jă, bonh đă ăp rmôt, ăp nŭih kơl an ndơ dŏng dak si, ndơ sa ân rmôt njrăng rdâng rdâng srê, ăp oh kon se ndrel rnăk vâl geh nau rêh jêr jŏt.

            Mra dơi lah, rup gui nŭih đoàn viên tahen biên phòng rợh mhe ntoh lư hŏ ƀư rêng lam nau rêh ueh, nuih n’hâm mra ƀư nau kan yor ƀon lan ndrel nuih n’hâm nsôih rlet nau jêr, ntul rlong, ƀư jêh ăp nau kan geh jao./.

Nŭih rblang: H’Thi