Rmôt kan rđau nau kan nkuăl Tây Nguyên lah ntŭk kan tâm rgop bah rmôt kan yor Thủ tướng Chính phủ ntrŭnh ndâk, ƀư ăp nau kan mĭn, rđau, rklaih ăp nau kan khlay bah nkuăl, rmôt kan mpeh nau tâm rgop, hun hao nâp nâl nkuăl Tây Nguyên.

Rơh rƀŭn hŏ dŏng âk mông gay nchră, mbơh ăp nau kan, nau hun hao văng sa, rêh jêng nkuăl Tây Nguyên ndrel đă nau kan êng ân nkuăl.

Mbơh bah N’gâng kan nchrăp kan ndrel ntuh kơl, lah rjăp: Tây Nguyên lah nkuăl geh nau kan khlay mpeh chính trị, văng sa, văn hoá, rêh jêng, neh dak, đăp mpăn bah lam dak, ntŭk geh rklaih nŭih bah dĭng lĕ 54/54 oh nô lam dak rêh. Tây Nguyên geh âk nau khlay, kơt: GRDP bôk nŭih năm 2022 rlau 11 tŏ rđil năm 2022, nau hun hao ntil ndơ tâm lam nkuăl năm 2002-2022 geh bơi tât 8%/năm ndrel âk ngăn rđil đah ăp nkuăl...yơn lah, nau kan văng sa nkuăl Tây Nguyên hôm âk nau ê dơi, mô geh hun hao ê tâm ban ma nau geh, nau dơi, kơt: GRDP du hê bôk nŭih hôm dêh lơn tâm 6 nkuăl văng sa, rêh jêng, ê geh du nkualư geh dơi ƀư mpeh tơm prăk, rgum ntuh kơl tă bah dak ba dih ê lăng âk, n’huch ach o ê nâp nâl, rnoh rnăk ach o, êp ach o têh, nau plŏ ach o hôm prêh, nau tâm ƀah ndrŏng-ach o đah ăp rmôt rnoi mpôl mbrơi rgum.

Nau kan ntrơn gŭ du lăp tâm Tây Nguyên lơn ma âk, neh gŭ, neh tuch tăm bah kônh wa ê năn rklaih. Rnoh nkŭm n’hâm bri huch hô ndrel mô geh dơi nkô̆ nau nchrăp luh, bri chăt êng huch âk. Tơm dak suăt, nau kro phang prăng bri geh mro. Âk ndơ ơm bah ăp rnoi dôl roh rui, ê dơi rklaih nau tâm boh đah nau mât ndrel hun hao. Nau tâm rgop ê nâp, nau kan ê tŏng dơi nau ŭch hun hao.

Du nau kan dôl ƀư Lâm Đồng lah êng, ăp n’gor Tây Nguyên lah nsum geh âk nau gay nkah, nê lah nau mât, dŏng neh geh tơm bah nau mât njrăng bri hôm mât nau jêr ndrel geh nau ntoh luh, ƀư nau mpŭng lir bri. Nau aơ ŭch geh nau rgum nsum, tâm ban gay ma rklaih. Wa Trần Văn Hiệp, Kruanh UBND n’gor Lâm Đồng mbơh:

"Neh geh tơm tă bah nông lâm trường mbơh lah dôl geh mâp âk nau khuch tâm rnôk rklaih. Rnôk aơ nŭih ƀon in, ndâk ngih gŭ, ân manh neh mô tâm di ma nau ntrŭnh ndrtel nchlơi neh dơm, mpŭng lir. Nau kan aơ ân geh nau nsôih, nau rklaih ân tâm di ueh ndrel leo nau tâm ban đah ăp nkuăl ri ŭch ơm geh nau ntĭm, tă bah N’gâng kan Tài Nguyên ndrel Môi trường ân nau kan ân Chính phủ, jêh ri N’gâng kan tuch tăm ndrel hun hao ƀon lan mĭn, râng ƀư tay gay hên rklaih ân kloh nau kan aơ, ngăn lah đah ăp rnăk vâl hŏ ndơn geh mât njrăng tă bah năp tât rnôk aơ”.

Hội đồng rđau kan nkuăl Tây Nguyên geh ndâk gay rgâl mhe nau kan gay rđau pă ân nkuăl, ntrŭt dăng nau kan văng sa, rêh jêng bah nkual hun hao ngăch, nâp nâl, mât ntŭk ntu gŭ âm ndrel đăp mpăn neh dak, lah ntŭk kan tâm rgop ƀư ăp nau kan kơl an Thủ tướng Chính phủ mĭn, rđau, đă, rklaih ăp nau kan khlay, rmôt ăp nau kan tâm rgop nkual, hun hao nâp nâl nkuăl Tây Nguyên. Nau ntrŭnh mrô 23/NQ-TW lơ 6/10/2022 bah Bộ chính trị hŏ năl nau hun hao nkuăl Tây Nguyên tâm di ma nau kan tâm rgop nkuăl, ndri ma êng nau ndâk nau tâm rgop ngih vâl gung trong hăn, tuch tăm, pâl n’aih, văn hoá, rêh jêng...ăp n’gor tâm nkuăl kŏ ân geh rgum nau nâp nau rgum, đăp mpăn săk tam, ƀư ueh nau geh dơi, nau dăng bah n’gor nơm.

Ntoh nau tâm rơh rƀŭn, Groi Thủ tướng Chính phủ Trần Lưu Quang, Kruanh Hội đồng rđau nau kan nkuăl Tây Nguyên ân lah, rơh rƀŭn aơ geh ân lah nau ndâk nau ƀư gay nchră nau ndơn mhe, ndâk nau nchrăp, nau kan geh nau dơi, mra geh nau mbrơi yơn nâp. Tâm nê, ngăn lah ân ơm njêng dơi ăp nau kan bah lam nkuăl gay tă bah nê doh rklaih nau jer, njêng nau ntrŭt dăng bah nkuăl Tây Nguyên hun hao.

‘Ndrel ăp đồng chí ndâk du nau kan êng, nau geh ơm bah nkuăl aơ gay geh nau đăp mpăn ndrel hun hao. Rgum bah năp măt tâm 3 nau kan, nê lah nau nkoch tâm nthoi đah 5 n’gor ndrel nkuăl tâm êp nê. Tal bar lah tâm rgop nsum nau ntuh kơl đah nuih n’hâm geh dơi nau nsum bah nkuăl lah nau têh. Nau kan tal 3 lah nkah tât bôk nau kan bah neh dak, mra ntrŭt dăng, nchuăt ngăch tâm 2 năm hôm e gay ma năn ân nau nchrăp luh”.

Groi Thủ tướng Trần Lưu Quang kŏ nkah ăp nkuăl ân ơm ƀư jêh nau nchrăp kan bah n’gor ndrel rgum nkual, uănh nâp nau kan geh tât ntŭk ntu ndrel ntrơn rgâl trôk nar. Nkre lah, ntrŭt dăng nau kan mât njrăng bri, n’hao nau kan ndơn prăk mât njrăng bri gay ƀon lan n’hao nau geh jêng. Uănh khlay nau n’hao ntrơn rgâl mrô, ntrŭt dăng nau tăch rgâl ndoh ndơ, tăch rgâl ndơ tuch tăm bah trong kan mạng./.