VOV4.M’nông: Puăn nau ntrŭnh bah rơh rƀŭn tal 5, Rnâng kan Trung ương Đảng gưl 13 lah ăp nau ntrŭnh geh ăp kơn cán bộ, đảng viên ndrel ƀon lan kâp rnơm. Aơ lah ăp nau ntrŭnh têh, tâm di ngăn bah Đảng gay ma n’hong ăp nau kan hôm geh âk nau dơi gay ma nsôih ân hun hao văng sa, rêh jêng ndrel ƀư nâp ntŭk kan Đảng. Đảng viên, ƀon lan, ăp nŭih rđau kan ndrel ăp nŭih nchră nau kan ngăn ngên mpŏng tâm 3 nau ntrŭnh gay ma ntrŭt dăng hun hao văng sa.

            Nau ntrŭnh mrô 18 mpeh “Lŏ rgâl mhe, ƀư jêh nau kan, nau kơl, n’hao nau tam, săk tam tâm nau mât ndrel dŏng neh, njêng nau leo neh dak nơm jêng dak hun hao geh âk prăk” lah nau ntrŭnh ndơn geh nau kơl an bah ƀon lan. Ăp nau hôm kol tâm pháp luật mpeh neh ntu ndrel nau kan geh tât rnôk aơ, ƀư ê geh nau kan dơi rklaih ăp ntŭk ƀư nau kan mô nâp, nau rvăt têm neh, nau trok tâm, rnoh neh...kŏ ƀư ân âk nkuăl tâm nau trok tâm, ntrơn ntŭk, kơl an, ntrơn ntŭk gŭ mhe, sŏk lơi neh...Wa Lưu Ngọc Hà, Kruanh UBND Quận Bắc Từ Liêm, Hà Nội, mbơh:

            ‘Nau kan ntrơn ntŭk tâm rnôk ƀư nau mât, dŏng neh geh du đê̆ n’gor mâp nau jêr rnôk uănh năl rnoh neh ndrel nau geh dơi geh dŏng êng êng. Ndri ma, nau kan geh tât trok tâm gay ma doh rklaih kŏ kơt lah ntĭm nti ri nơm mơ dơi doh rklaih ntrong ntrơn ntŭk. Geh du đê̆ nau jêr đŏng lah rnôk aơ, uănh năl rnoh trok tâm ndrel kơl an ân neh gŭ lah dêh lơn rđil ntŭk bu dôl ma tăch, rvăt, ƀư jêng jêr ngăn tâm nau tâm rgop ma ƀon lan tâm nau mô ŭch ntrơn ntŭk gŭ ma neh, ma knŭng ntrơn đah rnăk vâl”.

            Nau ntrŭnh mrô 18 đah ăp nkô̆ nau têh mpeh neh ntu kơt ƀư jêh nau rgâl nkra Luật neh ntu năm 2012 ndrel ăp luật êng geh tât...geh mpŏng lah mô êng knŭng rklaih ăp nau kol rnôk aơ ma hôm đăp mpăn ân nau kan mât neh ntu geh nâp, săk tam, ƀư ueh nau dơi têh tă bah neh khlay ơm tâm nau mât dŏng bah ƀon lan aơ. Wa Bùi Thị An, Kruanh viện tài nguyên, mô trường ndrel hun hao nsum mpôl lah:

            “Tâm rnôk dŏng neh ntu ri nơm mâp geh aka nau tih, lơh jêng nau mpŭng lir, roh hoach mpeh tơm prăk, kŏ kơt lah ƀư ân nau rêh bah du đê̆ rnăk ƀon lan geh rnôk mô hôm ueh. Ndri ma, Nau ntrŭnh mrô 18 rnôk aơ lah tâm di, gay ma ƀư ueh mpeh neh ntu, geh tay tơm prăk, nchră âk nau kan mpeh soay, jeo neh, tăch neh vah ntŭk ƀư tăch ri geh tâm di lơn, tâm ban lơn. Gâp ân lah nơm ƀư ân rjăp nau ntrŭnh mrô 18 aơ, mra rklaih dơi âk nau kan neh ntu ndrel ăp nau kol mhe rlau”.

            Ăp nkuăl ndrel ƀon lan kŏ ngăn ngên uănh khlay tât nau ntrŭnh 19 mpeh “Ƀon lan, tuch tăm, nkuăl ƀon lan tât năm 2030, rƀŏng tât năm 2045 aơ mô êng lah nau hun hao mhe ntoch jong bah nau ntrŭnh 26 bah Trung ương 10 mpeh ƀon lan, tuch tăm, nkuăl ƀon lan ma hôm geh ăp nau hun hao mhe, ăp nkô̆ nau mhe, hun hao ueh lơn.

            Ndơn nau ntrŭnh mhe, wa Nguyễn Trí Ngọc, Groi Kruanh Tổng hội Tuch tăm ndrel Hun hao ƀon lan Việt Nam nkoch: Tâm nau mhe rhơn bah rnôk ndâk njêng ƀon lan mhe đah nau geh dơi bah ƀon lan nar lơn ma nâp, nau rêh ƀon lan nar lơn geh n’hao prêh, Nau ntrŭnh 19 mhe ntoh mra lŏ lah nau mhe njêng ân nau dăng lơn ân nkuăl ƀon lan, tuch tăm. Đăp mpăn hun hao tâm ban đah nkuăl ƀon lan ndrel nkuăl têh, đah ăp nkuăl, ăp ntŭk tĭng trong “tuch tăm sinh thái, ƀon lan ueh mhe, nŭih pah kan blau:

            ‘Nau ntrŭnh mhe ntoh dơi geh ƀư kơl an bah lam ntrong kan chính trị đah nau kan  tuch tăm, ƀon lan, nkuăl ƀon lan. Gay nau ntrŭnh geh nau dơi, phung hên mĭn lah ân geh ăp nau kan rgâl mhe. Êng mpeh nau kan tuch tăm lah nsum, nau kan tuch tăm tơm si lah êng ri nơm ân saơ nê geh nau rgala mhe ân ueh lơn Luật neh ntu yor nau dơi mpeh neh ntu geh nau ntrŭnh ntrŭnh đah ăp nau kan hun hao tuch tăm, ngăn lah hun hao tuch tăm njêng geh nau tăch rgâl rnôk nơm rgâl nau mĭn ntơm nau tuch tăm jêng nau mĭn văng sa tuch tăm”.

            Nau ntrŭnh mrô 20 mpeh “Lŏ rgâl mhe, hun hao ndrel n’hao nau săk geh văng sa rmôt tâm rnôk mhe” hŏ geh nau mpơl, nchŏng kloh ăp nau ê dơi ndrel nkô̆ nau bah ăp nau ê dơi tâm nkuăl ƀư văng sa rmôt. Nau ntrŭnh hŏ geh uănh kloh ăp nkô̆ nau ndrel ntrong kan ndrel nau ƀư ngăn lah gay hun hao văng sa rmôt tâm rnôk mhe tât. Ngăn lah ntop, ƀư jêh nau kan, nau ntrŭnh bonh đă, kơl an hun hao văng sa rmôt, ăp ntŭk kan văng sa tâm boh./.

Nŭih rblang: H’Thi