VOV4.M'nông: Nău ntoch jong nti pơk sŏng dăng bah ngai mô dơn khuch tât săk blău ntĭm nti ma hôm têk nkre ăp nău tât khuch mpeh n'hâm suan, nău mĭn, hao têh jêng săk jăn bah kon se nti. Âk n'gor an gĭt, mbra an kon se plơ̆ nti tay dĭl lôch bah kơi Tết Nguyên đán kơt nău rđău đă bah Thủ tướng Chính phủ.

          Lah ngoăy tâm ăp n'gor geh tât khuch dŭt jru hô bah nuh srê Covid-19 đah rnoh ntưp hao âk mbro, Tây Ninh hŏ mbrơi plơ̆ tay kơt ơm ma nău tĭng kơn rdêl bah nuh srê n'hanh chuh vaccine an kon se nti tâm rnoh năm deh hăn nti. Aƀaơ rnoh chuh vaccine n'glai 1 n'hanh n'glai 2 an kon se nti jrô 7 tât jrô 12 geh rlău 90% da dê. Wa  Võ Đức Trong, Groi Kruanh Ủy ban nhân dân n'gor Tây Ninh an gĭt, nchrăp, n'gor mbra pơk mpông nhih nti gay lĕ  rngôch kon se nti hăn tât nti na nê̆ ta nhih nti:

Lôch rnôk sŏk nău rgop bah ăp me bơ̆ kon se nti ri Tây Ninh hŏ rlong an ƀư 2 jrô nti, lah jrô 9 n'hanh jrô 12. Tâm bar pe nar aơ ri rnoh âk kon se hăn nti lah 76% nti ta jay lah nklăp 24%. Nô nău lôch bar pe nar hăn nti lah dŭt uĕh, jêng lah mô hŏ geh du hê nuĭh ntưp. Nuih n'hâm nsum lah Tây Ninh mbra lôch Tết âm lịch lah mpôl hên mbra an hăn nti na nê̆ lĕ rngôch ăp gưl nti. Ăp pah kan nchrăp ri tât aƀaơ lah Tây Ninh hŏ nchrăp di nuih n'hâm ntĭm nti bah Bộ Giáo dục tâm ban kơt bah Bộ Y tế đŏng.

        Aƀaơ du đêt n'gor gŭ tâm trôm tơm nuh srê bah rơh ntoh nuh srê COVID-19 tâl puăn kơt nkual ƀon têh Hồ Chí Minh dôl ƀư tĭng kơn pơk nhih nti. Wa Nguyễn Văn Hiếu, Giám đốc Sở Giáo dục n'hanh Đào tạo nkual ƀon têh Hồ Chí Minh an gĭt, aƀaơ rnoh âk kon se nti bah jrô 7 tât jrô 12 hăn nti na nê̆ âk rlău 98%, rnoh âk kon se nti ntưp COVID-19 dŭt đêt, jêng nkual ƀon têh dôl mĭn uănh gay njŭn kon se nti jê̆ lơn tât nhih nti:

Lôch an hăn nti na nê̆ ri bar n'gâng kan: N'gâng kan dak si n'hanh n'gâng kan ntĭm nti mbra geh trong nchrăp hao mbơh rblang đah Ủy ban nhân dân nkual ƀon têh mbra dăn đă tay, kơp ntơm bah nar 7/2, jêng lah lôch bah kơi Tết Nguyên đán mbra an kon se nti ntơm bah jrô 6, kon se nti tiểu học n'hanh kon se nti mầm non dơi hăn tât nhih nti tĭng nău way ŭch an êng bah me bơ̆ kon se nti.

          Âk n'gor êng ƀa ƀă hŏ geh trong nchrăp an lĕ rngôch kon se plơ̆ nti tay lôch bah kơi Tết Nguyên đán, yơn nkô̆ nău ndơ̆ luh lah ân geh ăp trong nkra mât đăp mpăn n'hanh nkoch trêng gĭt gay mpăn nuih n'hâm an me bơ̆ kon se, njêng nău tâm ban ŭch n'hanh rgop kan nsum tĭng ƀư ăp trong nkra njrăng n'gang nuh srê. Hà Nội tă mâp nău mĭn rvê dja đŏng rnôk plơ̆ nti tay, êng geh jrô nti tă bah klach rvê nuh srê dơn geh 1 hê kon se nti hăn tât dơm. Wa Trần Thế Cương, Giám đốc Sở Giáo dục n'hanh Đào tạo nkual ƀon têh Hà Nội an gĭt, nchrăp nar 7 n'hanh 8/ 2 mbra an kon se nti ntơm bah jrô 7 tât jrô 12 plơ̆ nti tay. N'gâng kan ntĭm nti n'hanh n'gâng kan dơi kan hŏ rdâk njêng ăp trong nchrăp lor dŭt đăp mpăn an kon se nti rnôk hăn nti na nê̆. Yơn lah, dŭt jêr jŏt aƀaơ lah nkô̆ nău tơm  nuĭh kan dak si tâm nhih nti gay mât chăm n'hâm suan an kon se nti:

       Aƀaơ, nău kan dak si tâm nti mô tŏng dŭt âk. Êng đah Hà Nội lah bơi 450 nuĭh kan dak si tâm nhih nti. Yor kơt nê̆ ma aƀaơ Hà Nội dôl geh trong nchrăp rgum dŏng tay nuĭh kan dak si hŏ rlu ranh nuĭh ŭch râng êng nău kan dak si tâm ăp nhih nti. Tâl 2 lah dăn đă nhih dak si ăp xã, phường, thị trấn kơl, yơn jêr jŏt ngăn. Dăn đă Bộ Giáo dục- Đào tạo, Bộ Y tế, Bộ Nội vụ mât uănh mhâm ƀư an ăp n'gor geh nuĭh kan dak si ta nhih nti, đăp mpăn, mât chăm n'hâm suan an ăp kon se nti, lơn lah tâm nô nău nuh srê COVID.

       Thứ trưởng Bộ Y tế Nguyễn Trường Sơn ŭch đah nău dăn đă pơk tay nhih nti đŏng yor Việt Nam hŏ geh rnoh nkrum lam vaccine n'glai 2 bơi 100%. Kon se ntơm bah 12 tât 17 năm deh hŏ dơi chuh nkrum lam vaccine đŏng n'hanh bơi tât nchrăp chuh an kon se ntơm bah 5 tât 11 năm deh:  

       Nău njŭn ăp kon se plơ̆ nti tay lah dŭt n'hâm khlay tâm rnôk dja. Rnôk dja ri ƀon lan bah he geh rnoh dăng chŏl lĕ. Tâl 2 đŏng lah nău pơk mpông nhih nti an ăp kon se plơ̆ nti tay hôm nsing tâm ăp nău đăp mpăn đŏng, tâm nê rnăk wâl ân đăp mpăn, nhih nti ân đăp mpăn n'hanh lĕ ma nsum mpôl nău rêh ta n'gor nê ân đăp mpăn n'hanh gâp mĭn lôch Tết Nguyên đán lah tâm di.)

         Gay nta trong dơh an ăp n'gor pơk tay mpông nhih nti, let năp tay, Bộ Y tế mbra ơm geh si ƀŭt rđău đă rgâl di mpeh rnoh gưl nuh srê. Bộ Giáo dục n'hanh Đào tạo tĭng nê mbra an n'gluh si ƀŭt đă rgâl ăp si ƀŭt ơm gay tâm di đah nău ntĭm nti bah Bộ Y tế tâm nô nău mhe. Rlău ma nê, Bộ Giáo dục n'hanh Đào tạo mbra geh tay du đêt trong ntĭm nti an gưl mầm non gay nta trong dơh an ăp n'gor ƀư./.

Nuĭh rblang: Điểu Thân