VOV4.M’nông-   Ôi nar 19/7, di rơh kahgĭt 75 năm nar tahen sôt rmanh, tahen khĭt tâm lơh kăl e, Quân Ủy Trung ương n’gâng kan mât rnă njrăng ngih dak geh tâm mâp đại biểu nuĭh geh kan đah cách mạng n’hanh rnăk vâl nuĭh tahen khĭt dôl pah kan tâm tahen. Ta rơh tâm mâp, Đại tướng Phan Văn Giang- n’gâng kan mât rnă njrăng ngih dak njoăl nău rhơn ueh tât ăp nuĭh mê̆ Việt Nam anh hùng, ăp tahen sôt rmanh, rnăk vâl tahen khĭt n’hanh nuĭh dôl nti, pah kan ta ăp ntŭk kan lam n’gâng kan tahen. Đại tướng lah na nê̆, nău kan tâm pêt tâm kơl n’hanh tâm kơl an ăp rnăk vâl nuĭh dơi kơl tâm ntŭk kan tahen geh uănh năl lah du nău kan khlăy bâh nău kan đảng, nău kan chính trị tâm n’gâng kan tahen. Tât aƀaơ lĕ geh rlău 130 rbăn nuĭh mê̆ Việt Nam anh hùng geh ryơk rnê. Lĕ rngôch ăp nuĭh mê̆ Việt Nam anh hùng geh ăp ntŭk kan n’hanh n’gâng kan tahen mât rong. 5 năm ba năp, ăp ntŭk kan lĕ geh rgŏ jă cán bộ, tahen n’hanh rgum lĕ rnoh tâm rgop prăk tâm pêt tâm kơl an rlău 400 rmen prăk, rdâk njêng rlău 4 rbăn ngih tâm rŏng, mât kơl an 2.879 nuĭh mê̆ Việt Nam anh hùng.

Nuĭh rblang: Thị Đoắt