VOV4.M’nông: Dŭt pơh rlau aơ, Quốc hội hŏ rƀŭn dĭng lĕ tâm ngih rƀŭn, dŏng âk mông gay tâm nchră mpeh nau nchră ntop nau tă geh nau ƀư nau nchrăp hun hao văng sa-rêh jêng ndrel tơm prăk ngih dak, nchră ăp nau kan nkân nau hao khlay, ndâk văng sa jêh bah srê. Ăp ntoh măt rnê prêh mpeh ăp nau tă dơi geh tâm nau kan njrăng rdâng srê Covid-19 nkre đă Chính phủ rgâl nau rnoh pring xăng ndrel rnoh ndơ sa. Bah năp măt kơl an nau đăp mpăn văng sa, nkân nau hao khlay ndơ, đăp mpăn nau rêh jêng.

            Âk ntoh măt rnê prêh nau rđau, đă ngăn, geh nau tơm, nkô̆ nau khlay bah Chính phủ, ndrel nau kơl an bah ƀon lan, văng sa, rêh jêng tâm ăp khay bôk năm geh âk nau rgâl mhe ueh, geh âk nau dơi tâm ăp nau kan. GDP 3 khay bôk năp hao 5,03% lah rnoh hun hao prêh rđil đah nkuăl ndrel lam ntur neh. Ntuh kơl dak ba dih lŏ hao âk, nâp lơn, aơ lah rnoh khlay geh nau dơi rnơm bah dak ba dih đah nau ndâk, hun hao văng sa, rêh jêng bah neh dak. Ăp nau tă dơi geh tâm nau njrăng rdâng srê Covid-19 hŏ njêng nau ueh tâm lam nau rêh, rgop nau n’hao, ƀư nâp nau rnơm bah ƀon lan tâm nau rđau kan bah Đảng. Wa Nguyễn Minh Tâm, rmôt kan ntoh măt Quốc hội n’gor Quảng Bình, mbơh:

            ‘Gâp ngăn ngên uănh dơi đah nau geh nâp bah Neh dak kơl an nau njrăng, rdâng srê Covid-19. Mra dơi saơ Quốc hội, Chính phủ kŏ hŏ geh nau ueh tâm nau dŏng dơi nau tă geh bah nau ơm bah u che nơm lah “têm nkrem”, “ăp nŭih ƀon lan lah ăp tahen”, “du ƀon xã lah du n’gâng tơm tâm nau njrăng rdâng srê”. Rnơm nê, jêh du năm lăp ƀư ân rjăp tât rnôk aơ nơm hŏ ăp nhoat pơk tay mpông vơt ăp năch tă bah dak ba dih leo văng sa tâm dak nơm ăp nhoat ndâk tay. Nau dơi tâm nau rêh geh plŏ tay nâm ơm ân geh kơp dơn ăp nau dơi têh bah ntŭk kan dak si”.

            Yơn lah, rơh rƀŭn Quốc hội hôm âk nŭih ntoh măt ntoh nau hôm rvê rnôk prăk ma mô dơi geh leo dŏng kan. Âk ntŭk kan tăch rgâl, nŭih pah kan, ƀon lan ndơn geh nau khuch bah srê mbrơi geh nau kơl an prăk kaih. Wa Trịnh Xuân An, rmôt kan ntoh măt Quốc hội n’gor Đồng Nai, mbơh:

            ‘Geh du nau rvê ngăn rnôk ma nơm geh prăk ma mô dơi geh dŏng. Bol ma nau ŭch ndrel nau kan ndơ̆ luh lah dŭt têh ndrel ma ndal. Ndri ma, đă Chính phủ ăp n’gâng kan, ntŭk kan, nkuăl ân geh nau ƀư rjăp lơn tâm nau ntrŭnh ƀư nau kan hành chính, jut jăng lơi nau ƀư kol, ntă nkô̆ nau tâm di nau dơi ân geh rklaih nkre, der nau dăn nau rgop đă jŏ jong bah ăp ntŭk kan, n’gâng kan ndrel nsŭn ăp nau ân Chính phủ”.

            Nau đă nsôih gay hun hao văng sa rơh tât geh ăp ntoh ămt ndơn lah hôm tât ntơm bah nkuăl FDI, yor nau ntop ân nau ntuh kơl ntŭk kan êng hôm jêr, ê dơi ndâk ngăch yor nau khuch bah srê. Tâm rnôk ntŭk kan tăch rgâl mâp nau jêr, tơm prăk dŏng mbrơi, tĭng wa Nguyễn Duy Minh, rmôt kan nkuăl ƀon têh Đà Nẵng ri rnoh hun hao ntuh kơl tâm ntŭk bah dih ngih dak, tơm prăk soay hao âk ân geh nau mbơh ân rjăp, gay uănh năl ngăn nau kan dôl geh:

            ‘Tăch luh dak ba dih hao khlay yơn rnoh rgop bah nkuăl FDI hôm âk ngăn tâm năm. Năm 2021 rgop kơl an 74% rnoh prăk tăch luh. Nau aơ nkoch kloh nau kan tăch luh nsing tâm nkuăl văng sa geh tơm prăk ntuh kơl dak ba dih. Yơn kŏ dôl ma njêng luh âk nau mô ueh, hôm nau khuch ân jâng văng sa. Âk dak têh geh nau dơi mât ƀư nau kan tăch rgâl kŏ kơt lah nau rgâl ngăch bah khoa học ndrel công nghệ. Ndri ma, ân geh bonh đă ăp ntŭk kan tăch rgâl tâm dak pơk hvi nau kan tăch rgâl, ngăn lah tâm ăp nau kan ê nkra ndrel công nghệ prêh gay ma ƀư nâp nau dơi công nghiệp têh tâm dak, n’hao nau nâp ân tơm ƀư nau kan”.

            Ăp ntoh măt hŏ ndơ̆ luh âk nau kan gay ntrŭt dăng văng sa tâm rơh tât lah ân geh nau dơi hun hao dak nơm hao 6-6,5%, nkân nau hao khlay 4% tâm năm aơ. Tâm nê đă Chính phủ ân ơm ndâk ntrong kan tâm ban, ntơm bah gleh jêng jong, tâm di ma nau ƀư. Chính phủ ân geh uănh kơl an nau kan tuch tăm, du nau kan khlay tâm rnôk neh dak dôl mâp nau jêr, ƀư nau rêh ƀon lan jêr ndrel mô dơi nau ntuh kơl tuch tăm. Wa Nguyễn Tạo, Rmôt kan Quốc hội n’gor Lâm Đồng, đă:

            ‘Đă Chính phủ geh nau kan kơl an năn gay ma ƀư đăp mpăn nau dơi nkân lơi rnoh hao khlay bah phân poh, ndơ dŏng ân nau kan tuch tăm, pring xăng. Nkre lah kŏ ân geh ntrong ƀư nsôih rjăp lơn tâm nau ƀư rlăm nau kan tăch rgâl ngăn lah đah nau kan tăch phân poh, dak si mât tơm tăm rlăm. Uănh khlay nau rklaih trong kan hành chính gay ntrŭt dăng ngăch nau pă tơm prăk manh kan, ngăn lah 3 bôk nau kan bah neh dak, bôk nau kan ƀon lan mhe, bôk nau kan jut n’huch ach o, bôk nau ƀư nau ntrŭnh mrô 88 hun hao văng sa nkuăl rnoi mpôl đê̆ ndrel gôl yôk”./.

                        Nŭih rblang: H’Thi